Niekalkim supracoŭnikam Wargaming u Litvie niečakana anulavali DNŽ. Jany raniej słužyli ŭ vojsku pa kantrakcie
Jak stała viadoma vydańniu «Lusterka», u aŭtorak, 18 lipienia, supracoŭnikam litoŭskaha ofisa kampanii Wargaming pryjšoŭ list ad kiraŭnictva. U im administracyja papiaredziła, što Litva moža anulavać dazvoły na žycharstva tym, chto słužyŭ u biełaruskim vojsku pa kantrakcie. U liście išła havorka jak minimum pra dvuch supracoŭnikaŭ, jakich užo pazbavili DNŽ.
«U liście havorycca, što Litva anuluje dazvoły na žycharstva, što atrymali biełarusy, jakija raniej słužyli pa kantrakcie va Uzbrojenych siłach RB. Havorka pra praparščykaŭ i aficeraŭ. Pryčym anulujuć biez usiakaha papiaredžańnia — prosta staviać pierad faktam», — raskazała «Lusterku» krynica, znajomaja ź situacyjaj.
Infarmacyju paćvierdziŭ i dziejny supracoŭnik kampanii. Aficyjnaha kamientara ad Wargaming z nahody hetaj situacyi pakul što niama.
Pa kamientar «Lusterka» źviarnułasia taksama ŭ Departamient pa mihracyi pry MUS Litvy. Tam adznačyli, što nie kamientujuć piersanalnych kiejsaŭ pa anulavańni DNŽ i nie vałodajuć infarmacyjaj pra kolkaść supracoŭnikaŭ kampanii, jakich pazbavili hetaha dakumienta. Ale dadali, što, jak praviła, padobnyja rašeńni mihracyjnyja słužby prymajuć, zychodziačy z rekamiendacyj Departamienta dziaržbiaśpieki.
Pres-słužba Departamienta dziaržbiaśpieki Litvy prakamientavała situacyju tak:
«Departamient dziaržaŭnaj biaśpieki aceńvaje pahrozu dziaržaŭnaj biaśpiecy z boku zamiežnikaŭ u kožnym kankretnym vypadku z ulikam kankretnych abstavin. Acenka pahrozy, jakaja zychodzić ad asoby, moža być źmieniena pry vyśviatleńni novych abstavin u dačynieńni da asoby, a taksama pry źmienie hieapalityčnaj situacyi.
Pravavyja akty nie vyznačajuć paniaćcia pahrozy biaśpiecy dziaržavy abo vyčarpalnaha pieraliku pahroz biaśpiecy dziaržavy — acenka robicca z ulikam kankretnych abstavin, sudovaj praktyki i da t. p.
Źviartajem Vašu ŭvahu, što sudy nieadnarazova adznačali, što prava pryjazdžać u Litoŭskuju Respubliku i žyć tut nie źjaŭlajecca naturalnym, jano nie nadajecca aŭtamatyčna hramadzianam trecich krain i nabyvajecca tolki ŭ tym vypadku, kali hetyja asoby adpaviadajuć patrabavańniam zakona «Ab pravavym stanoviščy zamiežnych asob».
Kančatkovyja rašeńni ab anulavańni dazvołu na žycharstva ŭ Litvie prymaje Departamient mihracyi, aceńvajučy ŭsie adpaviednyja abstaviny ŭ kožnym kankretnym vypadku, uklučajučy acenku Departamienta dziaržbiaśpieki».
Pamiatajecie «paśpiachovuju miljanierku» Zareckuju? Vyhladaje, što jaje kampanija — usio19
Kamientary