Jak pavodzicca padčas vichru i dzie niebiaśpiečna chavacca ad mocnaha vietru

Vichry nazirajucca pieravažna ŭ letnija haračyja dni ŭ vielmi niaŭstojlivych pavietranych masach trapičnaha pachodžańnia. Sinoptyki źviazvajuć źjaŭleńnie takoj pryrodnaj źjavy ŭ Biełarusi z paciapleńniem klimatu.

Što rabić, kali nabližajecca vichor?

Kali vy doma:

— Ščylna začynicie vokny i dźviery (nie zabudźciesia pra bałkonnyja).

— Kali bałkon nie zašklony, chutka prybiarycie rečy, jakija patencyjna mohuć raźbić škło pry mocnym vietry — naprykład, padłohavuju sušyłku dla bializny.

— Vyklučycie elektrabytavyja prybory.

— Kali na dvare ŭrahan, nie padychodźcie blizka da voknaŭ (navat kali vielmi chočacca źniać cikavaje videa dla TikTok), najbolš biaśpiečnaje miesca ŭ kvatery — vannaja abo kalidor.

— Kali vy znachodziciesia ŭ viaskovaj chacie, pry mahčymaści spuściciesia ŭ sklep. Vaźmicie z saboj vadu, ježu, lichtaryk, štości ź lekaŭ.

Kali vy dzieści ŭ horadzie:

— Kali vy ŭ transparcie (nie maje značeńnia, hramadskim abo asabistym), vychodźcie ź jaho i šukajcie prytułku. Mašynu rekamiendujecca pakinuć kala ściany pa chodzie vietru.

— Kali vy staicio na ŭzvyššy, spuściciesia jak maha nižej. Možna pajści ŭ padziemny pierachod ci mietro.

— U jakaści prytułku padydzie luby budynak — pošta, krama (u ideale bieź vialikich voknaŭ, tamu kaviarniaŭ z panaramnym škleńniem lepš paźbiahać). Niebiaśpiečnymi źjaŭlajucca šapiki typu «Biełsajuzdruka».

— Nielha chavacca pad mostam, a taksama znachodzicca pobač sa stancyjami elektrapieradačy, zapraŭkami i lubymi abjektami, jakija mohuć lohka zaharecca.

— Trymajciesia jak maha dalej ad dreŭ, słupoŭ, rekłamnych banieraŭ.

— Nie vychodźcie na vulicu praz paru chvilin paśla taho, jak viecier supakoiŭsia. Bo nieŭzabavie ŭsio moža pačacca znoŭ.

Kali vy za horadam:

— Kali vy jedziecie ŭ aŭtamabili, spyniciesia i schavajciesia ŭ kiuviecie nie zanadta blizka da aŭto. Pamiatajcie ab tym, što mocny viecier moža jaho pierakulić.

— Kali pobač z vami ahoń, zatušycie jaho jak maha chutčej.

— Nie sprabujcie schavacca ŭ namiocie. Šukajcie lubuju vyjemku — jamu, kanavu, roŭ — kładziciesia na dno i ščylna pryciskajciesia da ziamli.

— Starajciesia abaranić hałavu. Kali ŭ vas jość rovarny šlem i vy paśpiavajecie jaho apranuć — zrabicie heta. Možna prykryć hałavu zaplečnikam abo chacia b prosta rukami.

• 17
• 0
• 0
• 1
• 5
• 3
• 0
• 0