«Ja nie jahnia i ich nie bajusia» — uładalnik klinik «Novy zrok» Aleh Kaŭryhin daŭ vialikaje intervju

Jak usio pačynałasia

Aleh Kaŭryhin adznačyŭ, što 17 studzienia 2023-ha hoda ŭ 16:55 u piać klinik «Novaha zroku» pa ŭsioj krainie pryjšło 150 supracoŭnikaŭ DFR.

«Sahnali daktaroŭ i miedsiaścior u adzin pakoj. Niekatorych dapytvali da piataj ranicy, advakaty adsutničali. Atrymali vyrvanyja kavałki pakazańniaŭ, ni na čym nie zasnavanyja. Ludzi paličyli, što praściej zaraz vyjści, padpisać niejkuju papierku, nie razumiejučy, što, padpisvajučy heta, ty ŭžo ŭviazvaješsia», — raspaviadaje biznesmien.

Pavodle słoŭ Kaŭryhina, analiz kampjutaraŭ, jakija byli kanfiskavanyja śledčymi, nie vyjaviŭ falšyvych apieracyj. Ale praź miesiac była zroblenaja paŭtornaja ekśpiertyza. Jana vyjaviła ŭ kampjutary dyrektara na pracoŭnym stale niejki dziŭny dakumient nakštałt viedamaści ab byccam by zarobkach u kanviertach. Ale sprava suprać samoha dyrektara nie zaviedzienaja.

«U toj čas, jak u niekatorych čynoŭnikaŭ znachodziać pa paŭmiljona ŭ haražach, pa našaj kryminalnaj spravie ab zarpłacie ŭ kanviertach niama nivodnaj fatahrafii, dzie raskładzieny navat 50 dołaraŭ. Niama nivodnaha dołara, nivodnaha kanvierta. Pra niešta ž heta kaža?» — adznačaje biznesmien.

Jak idzie śledstva

Kaŭryhin adznačaje, što na ludziej z boku śledstva akazvajecca cisk. Śledčyja try razy pryjazdžali da jaho 89-hadovaj maci, jakaja žyvie za 70 kiłamietraŭ ad Minska. Biznesmien dzivicca, što jany mahli tam šukać, kali jaho 12 hadoŭ nie było ŭ Biełarusi.

Pavodle słoŭ biznesmiena, na praciahu šaści miesiacaŭ raźlikovyja rachunki «Novaha zroku» byli zabłakavanyja, majomaść i ŭsie budynki — aryštavanyja. Niahledziačy na toje, što zakanadaŭstvam u takich umovach dazvolena apłočvać nabyćcio raschodnych materyjałaŭ, lekaŭ i aciapleńnia budynkaŭ za košt srodkaŭ kampanii, u vypadku «Novaha zroku» heta nie dziejničała.

Uładalnik raspavioŭ, što na rachunkach kampanii aryštavana 9 miljonaŭ rubloŭ. Ich chapiła b na raźlik z pastaŭščykami i vypłatu mahčymych štrafaŭ. Ale zamiest hetaha «my bačym rabotu pa spynieńni našaj dziejnaści».

27 lipienia ŭ advakata Kaŭryhina supracoŭniki DFR praviali vobšuk i zabrali ŭsie dakumienty kampanii. Biznesmien adznačaje, što byli zabrany taksama «absalutna ŭsie dakumienty, jakija datyčyli majoj abarony pa papiarednich kryminalnych spravach».

Pavodle słoŭ Kaŭryhina, «praź inšych ludziej pieradavali prośby ab tym, kab ja ničoha nie kazaŭ, nijakich intervju nie davaŭ, u pryvatnaści «Zierkału». Moj vypadak dastatkova typovy, jak ja razumieju. Vakoł prosta «maŭčańnie jahniataŭ». A ja nie jahnia i ich nie bajusia».

Što ciapier

Praz šeść miesiacaŭ, 27 lipienia 2023 hoda Ministerstva achovy zdaroŭja pazbaviła miedycynskija centry licenzii.

Pavodle słoŭ Kaŭryhina, ciapier nieabchodna zvolnić, i, pa mahčymaści, pracaŭładkavać, kala 500 čałaviek. Śpiecyjalistaŭ biaruć na pracu ŭ druhija miedycynskija centry. Ale chutka ŭsich pracaŭładkavać niemahčyma. Usie rabotniki całkam atrymali zarobak za lipień.

Biznesmien raskazaŭ pra svaje płany adkryć kliniki ŭ Łondanie i dadatkova na Malcie. Ale treba damovicca ab sproščanym pryjomie biełarusaŭ, tym bolš što «biełaruski pašpart časta, na žal, taksičny». Jon abiacaje zabrać usich prafiesijanałaŭ, chto zachoča pajechać pracavać za miažu.

Pavialičyć

Jak adznačaje biznesmien, usie zasnavalniki kampanii — zamiežniki. Tamu na ich akazvać cisk možna tolki virtualna. Ale jany ŭsie spakojna da hetaha staviacca. I dadaje:

«My razumieli, što pracujem u krainie vysokaj ryzyki, što buduć prablemy. My da hetaha hatovyja».

Pavodle słoŭ Kaŭryhina, ciapier razhladajucca varyjanty padačy sudovych pazovaŭ. I jon upeŭnieny ŭ ich paśpiachovaści.

«Mahčyma, situacyja pavierniecca, jak u małpy, jakaja trapiła ŭ pastku, uziaŭšy banan, što znachodzicca ŭ kakosie. Jana nie moža adpuścić banan i vyzvalić ruku z kakosa. I voś takim čynam palaŭničy jaje łović», — pryvodzić paraŭnańnie biznesmien.

Ci byli raniej kryminalnyja spravy adnosna «Novaha zroku»

Kaŭryhin zhadvaje, što, akramia ciapierašniaj, było jak minimum try kryminalnyja spravy.

Adnu ź ich, 2016 hoda, śledčyja zmahli adnavić. Pa joj «Novy zrok» abvinavačvajecca ŭ zakupkach miedycynskich tavaraŭ, daražejšych za canu vytvorcy. Uładalnik adznačaje, što tavary zakuplalisia praz dystrybjutaraŭ, što adbiłasia na canie.

«Nam ža zajavili: raz vy nie možacie padać dakumienty, što vy kupili miedtavary ŭ vytvorcy ad 2012 da 2016 hoda, značyć my ich aceńvajem u nul. To-bok hetyja sumy nie sychodziać u vydatki, a iduć u prybytak. I treba dapłacić padatak na prybytak, a heta vializnaja suma», — raspaviadaje biznesmien.

U 2013 hodzie suprać samoha Aleha Kaŭryhina była zaviedziena sprava za kantrabandu miedycynskaha abstalavańnie. Biznesmien zhadvaje, što suma raŭniałasia sučasnym 4 tysiačam rubloŭ.

«A ŭ padazreńniach skazana tak: u nieŭstanoŭleny čas u nieŭstanoŭlenym miescy na čale nieŭstanoŭlenaj hrupy asob ja pryvioz asabista miedycynskuju pryładu (čaho ja nie rabiŭ). Jakuju, mnie za niekalki hadoŭ tak nichto i nie skazaŭ. I heta artykuł ab kantrabandzie ŭ asabliva bujnych pamierach. Da 10 hadoŭ», — zhadvaje akaličnaści spravy Kaŭryhin.

Pavodle słoŭ biznesmiena, jak zdoleŭ vyśvietlić jaho advakat, na toj čas u pieraliku taho, što adnosicca da kantrabandy, nie było miedycynskaha abstalavańnia. Tamu śledčyja nie mieli prava navat zavodzić spravu pa takim artykule. U vyniku jaje zakryli.

Niepalityčnaja sprava

Uładalnik padkreślivaje, što zakryćcio klinik u Biełarusi — «sprava niepalityčnaja. Taki padtekst joj sprabujuć nadać, kab apraŭdać svaje dziejańni».

Aleh Kaŭryhin padkreślivaje, što jon — «absalutna nie palityčny čałaviek», nikoli nie ŭdzielničaŭ ni ŭ jakich palityčnych partyjach i ruchach. Jon nie rekamiendavaŭ supracoŭnikam i kiraŭnictvu ŭdzielničać u akcyjach, bo «revalucyja robicca na płoščach nie miedycynskimi rabotnikami», bo «daktary pavinny lačyć usich. Heta značyć, što kali b pryvieźli paranienaha AMAPAŭca, to lačyli b jaho, jak i čałavieka, jaki ŭdzielničaŭ u maršach».

Biznesmien kaža, što niekalki supracoŭnikaŭ udzielničali ŭ pratestach z ułasnaj inicyjatyvy i «trapili pad razdaču». Mahčyma, dapuskaje Kaŭryhin, z hetaj pryčyny «siłaviki zdoleli bolš raźviazać sabie ruki», ale «ŭ realnaści hetaja sprava nie palityčnaja, a bandytaŭ, jakija prosta vyrašyli zabrać biznes».

Na dumku Kaŭryhina, «pieršaja asoba dziaržavy ab hetym navat nie viedaje», ale joj ab hetym zrobiać spravazdaču «pad zručnym vuhłom». A mienavita «budzie prapanavanaja niejkaja pazicyja, jakaja stvoryć mierkavańnie ab tym, što narmalna, u nas usio dobra. Pakažuć ličbu 1,7%, zajaviać, što heta ŭvohule mizernaść i nie prynosić strataŭ dziaržavie».

Pavialičyć

Pavodle słoŭ biznesmiena, ciapier staić meta «prosta zabrać uvohule ŭsio biaspłatna». Dla hetaha śledčyja paličać nie atrymanyja padatki (pry tym, što pastajanna pravodziłasia šmat pravierak), i na hetaj padstavie kanfiskujuć nieruchomaść, abstalavańnie i inšuju majomaść, jakaja była aryštavanaja.

«Nakolki mnie viadoma, ciapier chodziać «chadaki» i prapanoŭvajuć da prodažu ŭsiu ŭłasnaść «Novaha zroku» roznym kamiercyjnym kampanijam», — havoryć Kaŭryhin.

Kamu vyhadnaja ciapierašniaja sprava

Biznesmien upeŭniena kaža, što nacyjanalizacyi majomaści nie budzie. Paśla taho, jak jana budzie vystaŭlenaja na tarhi, budzie mahčymaść pabačyć, chto jaje nabudzie:

«Tam my pabačym, u kaho śmiatanka na vusach. Navat kali heta budzie ŭmoŭny Ivanoŭ, za im zaŭždy možna budzie ŭbačyć realnaha ŭładalnika, tam usio heta vylezie».

Kaŭryhin ličyć, što sprava z «Novym zrokam» — nie ŭzrovień Łukašenki. A kali b jon pra jaje viedaŭ, to «ludzi, jakija tam udzielničali, atrymali b vialikija prablemy… U čas Stalina takich ludziej by rasstralali».

Svaju dumku jon abhruntoŭvaje tym, što zakryćcio klinik — nie dziaržaŭny padychod:

«My rabili sacyjalnyja rečy. Zvolnienyja da 500 čałaviek. Navat kali praź niejki čas pasprabavać usio adnavić, dyk heta budzie ŭžo niemahčyma. Hublajecca ŭnikalnaja mikrachirurhija, paraŭnalnaja z chirurhijaj u Vialikabrytanii i Japonii. My ŭžo nie źbiarom takoha kalektyvu, razumiejecie? A ŭ nas byli pieramovy ź viadučymi śpiecyjalistami suśvietnaha ŭzroŭniu. Išli pastaŭki samych lepšych raschodnych materyjałaŭ, pravodziłasia navukovaja praca. Nijakaja dziaržbalnica nie zmoža kankuravać navat blizka. A jany kažuć pra 1,7%».

Pavodle słoŭ uładalnika, u «Novym zroku» rabiła apieracyju žonka byłoha ministra achovy zdaroŭja Vasila Žarko. Da ich pryjazdžali vysokapastaŭlenyja čynoŭniki padbirać akulary.

Chabary i ich upłyŭ na biznes

Žurnalist spytaŭ Kaŭryhina, čamu było pryniata rašeńnie zakryć biznes. Licenzii prypyniali ŭ «Nardzina» i «Łade». Ale jany niejkim čynam adnavili pracu.

Pry adkazie na hetaje pytańnie biznesmien zhadaŭ dyjałoh z prafiesaram Praabraženskim, kali jaho prasili kupić časopisy ŭ dapamohu niamieckim dzieciam: «Ale čamu vy admaŭlajeciesia? — Nie chaču. — Vy nie spačuvajecie dzieciam Hiermanii? — Spačuvaju. — A, paŭrubla škada? — Nie. — Dyk čamu ž? — Nie chaču…»

Akramia hetaha, jon raskazaŭ pra sustreču ź Jaŭhienam Šyhalovym — uładalnikam rynku Ždanovičy, u jakoha była padobnaja situacyja ŭ 2008 hodzie. Biznesmiena aryštavali pa abvinavačańni ŭ niezakonnym zachopie ziamli i złoŭžyvańni słužbovymi paŭnamoctvami.

«Paśla taho jak jaho adpuścili, my sustrelisia ŭ samalocie, lacieli ź im u Łondan razam. Jon schudnieŭ mocna, pieranios infarkt. Ja spytaŭ u jaho, jak jon majecca. Jon kaža: «20 miljonaŭ dołaraŭ najaŭnymi i 30 miljonaŭ dołaraŭ štrafu», — zhadvaje Kaŭryhin.

Biznesmien zajaŭlaje, što ź vialikaj dolaj upeŭnienaści moža zajavić, što čakali, što buduć pieradadzieny niejkija sumy hrošaj, i spravu zakryjuć. Ale jon nie razhladaŭ takoha varyjanta.

«Ščyra kažučy, žadańnia zmahacca z šalonym sabakam u mianie niama. Kali ludzi nie ŭjaŭlajuć kaštoŭnaści dla dziaržavy, to akiej. Maja praca patrebna ŭsiudy, paviercie, jana budzie zapatrabavana ŭ inšaj krainie», —

adznačaje biznesmien. Paźniej jon dadaje:

«Jany pryjšli ŭ kampaniju z zachodnim myśleńniem, jakaja nie rabiła nielehalnych apieracyj i nie robić ničoha nielehalnaha. Pryjšli da čałavieka, jaki nie budzie rabić pa pstryčcy palcaŭ toje, što jany chočuć. Ja nikoli nikomu nie płaciŭ, navat rekieciram u svaje hady».

Kaŭryhin zhodny z publikacyjaj «Našaj Nivy», što «kali b u mianie pracavaŭ hienierał u adstaŭcy, jaki b zmoh damovicca, chiba što, tak, klinika pracavała»,

«Ale mnie ahidnaja sama dumka ab nielehalnym finansavańni tak zvanaha dachu. My nikoli i nikomu nie płacili», — padkreślivaje biznesmien i adznačaje, što mienavita patrabavańnie ad jaho chabaraŭ stali pryčynaj jaho adjezdu ź Biełarusi.

Biznesmien zhadvaje, što ŭ 2011 hodzie jon prydumaŭ kliniku «Žančyna», dzie b akazvali šyroki śpiektr pasłuh dla žančyn. U tym liku tam by znachodziŭsia pryvatny radzilny dom. Pad jaje budaŭnictva horadam była atrymanaja ziamla, zaklučany prajekt. Z anhlijskaha banka byŭ atrymany kredyt na 40 miljonaŭ funtaŭ sterlinhaŭ. I jamu prapanavali dać chabar — 10% adkatu — dla taho, kab pracavać dalej. «Ja prosta viarnuŭ hrošy nazad u bank. Budaŭnictva kliniki prypynili. Voś z-za čaho ja zjechaŭ ź Biełarusi», — raspavioŭ Kaŭryhin.

Biznesmien adznačaje, što strata biznesu ŭ Biełarusi jamu budzie kaštavać sotni miljonaŭ dołaraŭ: «Ja aceńvaju straty inviestaraŭ jak ekśpiert. Aryjencirovačna biznes pradajecca zaŭsiody z raźliku šeść hadavych dachodaŭ plus košt budynkaŭ, zbudavańniaŭ. Ja dumaju, havorka idzie pra sotni miljonaŭ dołaraŭ».

Pavialičyć

Sučasnaja situacyja ŭ aftalmałohii Biełarusi

Na pohlad Kaŭryhina, z zakryćciom jaho klinik aftalmałohija ŭ Biełarusi adkaciłasia na 20 hadoŭ nazad. Biezzvarotna. I budzie jašče horš.

«Samaje hałoŭnaje, kali ja razmaŭlaŭ ź ludźmi, jakija majuć dačynieńnie da ŭłady, to zadavaŭ im pytańnie: vy razumiejecie, što heta budzie drennaja situacyja? A jany adkazvali (dasłoŭna): «Nam nas**ć», — raspaviadaje biznesmien.

Kaŭryhin padkreślivaje, što ŭ jaho klinikach karystalisia amierykanskim abstalavańniem. A apošnim hodam u Biełarusi ŭžo nie pradavali samych sučasnych pryładaŭ. «Novy zrok» atrymlivała hetaje abstalavańnie, pavodle słoŭ biznesmiena «šlacham, tak by mović, niepramych pastavak». Jon upeŭnieny, što dziaržaŭnyja kliniki takoha nikoli nie atrymajuć.

«Paśla taho, jak byli ŭviedzieny sankcyi, urad ZŠA zabaraniŭ pastaŭki ŭsich raschodnych materyjałaŭ i pryładaŭ. Zabarona pačała dziejničać 1 lipienia 2023-ha. U Biełaruś dazvolili pastaŭlać tolki rastvory dla kantaktnych linzaŭ, rastvory BSS (heta typu vadzički z sollu) i kryštaliki. Usio, jak dla Afhanistana, skažam tak. Astatniaje — nie. Ani pryładaŭ, ani eksimirna-łaziernych ustanovak, ničoha»,

— apisvaje situacyju Kaŭryhin.

Biznesmien źviartaje ŭvahu na toje, što ciapier zjaviŭsia paralelny impart. Ale kali budzie vialikaje žadańnie ŭrada ZŠA, to jon budzie spynieny. Kali ŭ vyniku hetaha da amierykanskich pryładaŭ nie buduć pastaŭlacca raschodnyja materyjały, to ŭ aftalmałohii krainy nastanie kamienny viek. Kaŭryhin adznačaje, što mienavita aftalmałohiju mocna zakranuli sankcyi. A mienavita jaho kliniki sprabavali ŭ takoj situacyi niešta rabić.

Ciapier ža ŭ krainie, pavodle słoŭ biznesmiena, vał adjezdaŭ daktaroŭ. Tolki ź jaho klinik zjechała šeść apošnim časam. «Dzie 6, tam i 26. Jany paciahnuć za saboju kaleh», — miarkuje Kaŭryhin.

«Daj boža, kab čynoŭniki vypravili situacyju niejkim čynam. Ale jak prafiesijanał ja liču, što heta ŭžo niemahčyma. Možna zrabić adnu dobruju balnicu, ale nie dziesiać u roznych abłaściach Biełarusi. A adna nie daść rady toj płyni, jakaja jość, ź nieabchodnaj jakaściu. Tak što nas čakaje paharšeńnie — heta dakładna», 

— pradkazvaje biznesmien.

Čytajcie jašče:

«Tyja ludzi, jakija prymajuć rašeńni, sami na sabie heta adčujuć». Zasnavalnik «Novaha zroku» prakamientavaŭ pazbaŭleńnie licenzii

«Kali b Kaŭryhin uziaŭ sabie ŭ mieniedžary adstaŭnoha hienierała, to abyšłosia b». Biznesoŭcy prakamientavali zakryćcio «Novaha zroku»

Što ŭjaŭlaje saboj impieryja «Novy zrok» i ŭ jakoj schiemie ich abvinavaciŭ DFR 

Hubiernatar Karelii vydzieliŭ apalnamu ŭ Biełarusi biznesmienu Kaŭryhinu nadzieł dla vočnaj kliniki

• 45
• 0
• 7
• 17
• 17
• 47
• 80
• 0