Kolki hadoŭ spatrebicca siaredniestatystyčnamu biełarusu, kab naźbirać na kvateru
Dniami namieśnik ministra architektury i budaŭnictva Alaksandr Švajunoŭ zajaviŭ, što siaredniaja biełaruskaja siamja moža naźbirać na kvateru za 6,4 hoda. Praŭda, dla hetaha treba budzie całkam admovicca ad lubych inšych vydatkaŭ, u tym liku na ježu (i navat tady dla Minska budzie mała). «Naša Niva» padličyła, što spadar Švajunoŭ pierabolšvaje.
Minsk
Siaredniaja naličanaja zarpłata ŭ Minsku pa vynikach červienia 2023 hoda skłała 2598 rubloŭ, ci 2234 rubli «na ruki». Heta kala 738 dalaraŭ pa siarednim kursie za lipień.
Siaredni košt «kvadrata» na druhasnym rynku staličnaj nieruchomaj majomaści składaje kala $1350.
Takim čynam, dvuchpakajoŭka płoščaj 50 m² kaštuje kala 67 500 dalaraŭ ZŠA. Minčuk ź siaredniaj zarpłataj u teoryi zmoža naźbirać hetuju sumu za 7,6 hoda. Ale heta pry ŭmovie, što 100% zaroblenych hrošaj buduć štomiesiac adkładacca na kvateru, što niemahčyma ŭ realnym žyćci. Jak minimum čałavieku treba kuplać sabie ježu i adzieńnie dy płacić kamunałku. Tamu padobnyja padliki, chutčej, nahadvajuć zamiery siaredniaj tempieratury pa balnicy.
Kolki hrošaj realna adkładać?
Ahulnapryniatym ličycca, što adkładać treba 10% ad zarobkaŭ. To-bok dla siaredniestatystyčnaha minčuka heta $74 u miesiac. Ale kali adkładać na kvateru tolki pa 10% ad siaredniaj zarpłaty, jość usie šansy nikoli na jaje nie naźbirać — kali tolki ty nie maješ spadčyny, — bo na heta pojdzie 76 hadoŭ.
Tamu kali vy majecie metu naźbirać na kvateru, adkładać 10% — zusim nie varyjant.
Kab daviedacca, jaki pracent ad zarpłaty dazvalajuć sabie adkładać biełarusy, my źviarnulisia z takim pytańniem da našych padpisčykaŭ u telehramie.
Na žal, 50% respandentaŭ adkazali, što naohuł nie mohuć ničoha adkładać sa svajoj zarpłaty.
14% apytanych adkładajuć 10%.
10% mohuć sabie dazvolić adkłaści 20%.
21% apytanych adkładaje 30% i bolej ad zarpłaty.
Abapirajučysia na vyniki apytańnia, my vyrašyli ŭziać 30%, jakija ŭ teoryi čałaviek ź siaredniaj zarpłataj moža adkładać na kuplu kvatery.
Takim čynam atrymajem, što za miesiac na kvateru budzie adkładzieny 221 dalar. U takim vypadku hrošy na dvuchpakajoŭku ŭ Minsku buduć nakoplenyja praz 25 hadoŭ.
Kali na dvuchpakajoŭku budzie źbirać siamja z dvuch čałaviek i kožny ź ich budzie atrymlivać siaredniuju zarpłatu i adkładać ad jaje 30%, to nieabchodnaja suma budzie sabranaja praz 12,5 hoda.
A što ŭ rehijonach?
Nieruchomaja majomaść u rehijonach kaštuje tańniej, čym u stalicy, ale i zarobki tam bolš ścipłyja.
Naprykład, u Hrodnie siaredniaja naličanaja zarpłata za červień skłała 1945,9 rubla. Na ruki atrymałasia 1673 rubli, ci kala 553 dalaraŭ ZŠA pa siarednim kursie za lipień.
Siaredni košt «kvadrata» ŭ hetym abłasnym centry — $785. Vynikaje, što kvatery na 50 m² buduć kaštavać kala 39 tysiač dalaraŭ.
Pry ŭmovie, što siaredniestatystyčny hrodzieniec budzie adkładać usiu zarpłatu, hrošy na kvateru ŭ jaho źjaviacca ŭžo praz 5,9 hoda.
Kali brać u raźlik, što na kuplu kvatery budzie adkładacca 10% ($55), to na kvateru źbirać pryjdziecca ciaham amal 60 hadoŭ. Adkładajučy 30% ($166) ad zarobku, hrodzieniec ź siaredniaj zarpłataj naźbiraje na kvateru za 19,5 hoda. Adpaviedna, kali na kvateru budzie adkładać siamja, dzie aboje atrymlivajuć siaredniuju pa horadzie zarpłatu, to naźbirać zapavietnuju sumu možna budzie mienš čym za 10 hadoŭ.
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary
A naohuł było b cikava pahladzieć mahčymaści nie praz pryzmu siaredniaha, a praź miedyjannyja zarobki. Tady b było jašče bolš vidavočna, jak šmat ludziej nie majuć mahčymaściej mieć narmalnaje žyllo