Adyjoznaha byłoha pres-sakratara Minabarony ŭznaharodzili Nacyjanalnaj litaraturnaj premijaj
Łaŭreatam Nacyjanalnaj litaraturnaj premii ŭručyli ŭznaharody na adkryćci XXX Dnia piśmienstva ŭ Haradku. U publicystycy łaŭreatam premii staŭ Uładzimir Makaraŭ za knihu «U imia budučyni krainy. Ab pryjarytetach nacyjanalnaj biaśpieki ŭ novym stahodździ». Uładzimir Makaraŭ — były pres-sakratar Minabarony.
Jak paviedamlaje aficyjny Sajuz piśmieńnikaŭ Biełarusi, u knihu ŭvajšli raboty, apublikavanyja aŭtaram u biełaruskich pieryjadyčnych vydańniach, «u tym liku ŭ navukovych časopisach».
«Heta praciah knihi «Vybar biełaruskaha naroda — praryŭ u budučyniu». U novaj knizie pradoŭžana tema sacyjalnaj revalucyi i vajny ŭ kantekście zabieśpiačeńnia nacyjanalnaj biaśpieki.
Raskryvajucca asablivaści hłabalnych tendencyj u śfiery kamunikacyj «epochi postpraŭdy» i technałohii palityčnaj destabilizacyi, jakija prymianiajucca padčas «kalarovych» revalucyj, jakija zjaŭlajucca dziaržaŭnymi pieravarotami epochi postmadernu. Pakazana biezhruntoŭnaść sprob užyvańnia takich technałohij suprać Biełarusi», — havorycca ŭ prezientacyi knihi.
Pałkoŭnik Uładzimir Makaraŭ byŭ zvolnieny z pasady načalnika ŭpraŭleńnia infarmacyi hałoŭnaha ideałahičnaha ŭpraŭleńnia Ministerstva abarony 31 sakavika 2020 hoda.
Za čas svajoj raboty Makaraŭ zapomniŭsia mnohimi adyjoznymi vykazvańniami. Aproč inšaha, jon nazyvaŭ praciŭnikaŭ paradaŭ «idejnymi naščadkami Kube», a taksama admaŭlaŭ nieasprečny fakt rasstrełaŭ NKVD u Kurapatach.
Čytajcie taksama:
Minabarony pra dyjałoh svajho pres-sakratara i žurnalista «NN»: Z Makaravym praviedziena razmova
«Kali ty nie ŭ hetym śpisie, to budzieš u druhim». Jak u Biełarusi źbirajuć podpisy za Łukašenku11
Kamientary