Zialenski rezka raskrytykavaŭ pajezdku premjera Słavakii da Pucina

Prezident Ukrainy Uładzimir Zialenski rezka raskrytykavaŭ pajezdku premjer-ministra Słavakii Robierta Ficy ŭ Maskvu i jaho sustreču z rasijskim prezidentam Uładzimiram Pucinym. Siarod inšaha, Zialenski zajaviŭ, što pajezdkaj pavinny zacikavicca «słavackija pravaachoŭnyja orhany i śpiecsłužby», paviedamlaje Hołas Amieryki.

«Čamu hety lidar nastolki zaležny ad Maskvy? Čym jamu płaciać i čym jon raspłačvajecca?» — zadaŭ rytaryčnaje pytańnie Zialenski, adznačyŭšy, što dziejańni Ficy mohuć pastavić pad pahrozu biaśpieku nie tolki Słavakii, ale i ŭsioj Jeŭropy.

Fica naviedaŭ Maskvu z zahadzia nieabvieščanym vizitam uviečary ŭ niadzielu, staŭšy tolki trecim lidaram adnoj z krain ES, jaki sustrakaŭsia z Pucinym paśla pačatku maštabnaha ŭvarvańnia va Ukrainu ŭ 2022 hodzie.

Z momantu svajho prychodu da ŭłady naprykancy 2023 hoda słavacki premjer pravodzić palityku adnosna Ukrainy i Rasii, jakaja adroźnivajecca ad palityki bolšaści krain ES, vystupajučy suprać vajennaj dapamohi Kijevu.

Robiert Fica paźniej napisaŭ u fejsbuku, što «ŭ praciahłaj razmovie» z Uładzimiram Pucinym jany «abmianialisia mierkavańniami nakont vajennaj situacyi va Ukrainie, mahčymaści chutčejšaha mirnaha zaviaršeńnia vajny i adnosin pamiž Słavakijaj i Rasijaj». Niepasrednaj nahodaj dla vizitu stała chutkaje spynieńnie tranzitu rasijskaha hazu ŭ Słavakiju praz Ukrainu. Fica taksama adznačyŭ, što infarmavaŭ lidaraŭ ES pra svoj vizit.

Jak napisaŭ Zialenski ŭ sacsietkach, Maskva moža davać Ficu «značnyja źnižki», ale raspłačvacca za ich daviadziecca suvierenitetam. Akramia taho, jon namiaknuŭ na vykarystańnie «cieniavych schiem».

Pavodle słoŭ Zialenskaha, padrabiaznaści hetaha pytańnia byli raskryty padčas niadaŭniaj sustrečy jeŭrapiejskich lidaraŭ u Brusieli. Prezident Ukrainy taksama adznačyŭ, što Fica admoviŭsia ad mahčymaj kampiensacyi za admovu ad pastavak rasijskaha hazu, što, na dumku Zialenskaha, stała dokazam taho, što jon nie choča ŭdzielničać u sumiesnaj jeŭrapiejskaj pracy nad enierhietyčnaj niezaležnaściu, a «naadvarot — choča dapamahčy Rasii vycisnuć amierykanski haz i enierhietyčnyja resursy inšych partnioraŭ ź Jeŭropy», a taksama «dapamahčy Pucinu zarablać hrošy na finansavańnie vajny i asłabić Jeŭropu». Zialenski zaklučyŭ, što havorka idzie pra «pytańnie biaśpieki» Jeŭropy.

Raniej Robiert Fica śćviardžaŭ, što na niadaŭniaj sustrečy ŭ Brusieli Zialenski nibyta prapanoŭvaŭ jamu 500 miljonaŭ jeŭra z zamarožanych rasijskich aktyvaŭ u abmien na toje, što Słavakija padtrymaje ŭstupleńnie Ukrainy ŭ NATO. Hetaje śćviardžeńnie Zialenski nie kamientavaŭ. Nieviadoma, ci adnosiacca jaho słovy pra admovu Ficy ad «kampiensacyj» da hetaha epizodu.

Prezident Litvy Hitanas Naŭsieda vystupiŭ z krytykaj vizitu Ficy, taksama niehatyŭna pra jaho pajezdku vykazalisia ŭłady Čechii.

U stalicy Słavakii Bracisłavie prajšła akcyja pratestu suprać pajezdki premjera na pieramovy z Pucinym. Pavodle źviestak arhanizataraŭ, u joj uziali ŭdzieł da 3 tysiač čałaviek, u tym liku pradstaŭniki apazicyi i ŭkrainskija ŭciekačy.

Prezident Słavakii Pietier Pielehryni, palityčny sajuźnik Ficy, taksama zapatrabavaŭ ad premjera tłumačeńniaŭ u suviazi ź jaho pajezdkaj u Maskvu.

U Kramli pakul nie davali kamientaryjaŭ pa sutnaści sustrečy Pucina i Ficy. U pryvatnaści, sam Pucin jaje nie kamientavaŭ.

Fica, jak i premjer-ministr Vienhryi Viktar Orban, jaki taksama jeździŭ u Maskvu, zajaŭlaje pra siabie jak pra prychilnika nieadkładnaha pačatku pieramoŭ pra mir va Ukrainie. Jon ustrymlivajecca ad krytyki Maskvy za ŭvarvańnie va Ukrainu i, naadvarot, krytykuje Kijeŭ, abvinavačvajučy jaho ŭ imknieńni praciahvać vajnu. Fica taksama rezka krytykuje rašeńnie Ukrainy admovicca praciahvać pahadnieńnie ab tranzicie rasijskaha hazu.

• 5
• 0
• 0
• 0
• 0
• 0
• 2
• 0