Viačorka raskryŭ vierahodnyja terminy pačatku vydačy alternatyŭnych biełaruskich pašpartoŭ i nazvaŭ kolkaść krain, užo hatovych ich pryznać
«My viedali, što Łukašenka budzie pomścić, i rychtavalisia. Padrabić našy novyja pašparty jon nie zmoža», — kaža Franak Viačorka.
Daradca Śviatłany Cichanoŭskaj Franak Viačorka adreahavaŭ na śviežy ŭkaz Łukašenki ab zabaronie vydačy biełaruskich pašpartoŭ za miažoj. Kamientar Viačorki prahučaŭ 5 vieraśnia ŭ efiry «Hołasa Amieryki».
Jak adznačaje daradca Cichanoŭskaj, biełaruskija demsiły rychtavalisia da padobnaha raźvićcia padziej i čakali ad Łukašenki pomsty za pratesty 2020 hoda.
Tamu i pačali pracu nad vypuskam alternatyŭnych biełaruskich pašpartoŭ, jakija dazvolać biełarusam mieć lehalny status u inšych krainach i padarožničać.
Viačorka nazvaŭ papiarednija terminy pačatku vypusku novych pašpartoŭ i kolkaść krain, jakija ŭžo vykazali hatoŭnaść ich pryznać.
«Techničny i vizualny składnik novaha biełaruskaha pašparta ŭžo padrychtavany. Jon adpaviadaje standartam ICAO i ŭžo ŭzhodnieny ź Jeŭrakamisijaj. Ciapier my zajmajemsia vyrabam pieršych uzoraŭ pašpartoŭ, jakija buduć adpraŭleny ŭ krainy Jeŭrasajuza i pa ŭsim śviecie dla analizu.
Spadziajemsia, što ŭžo ŭ pačatku nastupnaha hoda my pačniem vydavać pašparty. U ciapierašni momant užo jość dźvie dziaržavy, jakija papiarednie zajavili, što buduć hatovyja pieršymi pryznać našy novyja pašparty», — raspavioŭ «Hołasu Amieryki» Franak Viačorka.
Taksama Viačorka dadaŭ, što asablivaja ŭvaha budzie nadavacca biaśpiecy novych pašpartoŭ i vieryfikacyi ich budučych uładalnikaŭ.
Daradca Cichanoŭskaj prakamientavaŭ i aściarohi ab mahčymych padrobkach novych pašpartoŭ z boku siłavikoŭ Łukašenki.
«Pytańni bijamietryi i biaśpieki novych biełaruskich pašpartoŭ my abmiarkoŭvajem ź Jeŭrakamisijaj. Ich padrabić budzie niemahčyma, vypuskać ich u Minsku Łukašenka nie zmoža. Drukavać pašparty budzie vielmi aŭtarytetnaja firma, jakaja drukuje pašparty dla dziasiatkaŭ krain śvietu.
Taksama jość pracedura vieryfikacyi, kab čałaviek paćvierdziŭ, što źjaŭlajecca hramadzianinam Biełarusi i što jon nie jaki-niebudź ahient ci vahnieraviec. Paśla atrymanaja infarmacyja idzie našym partnioram dla ŭniasieńnia ŭ ahulnyja bazy danych, kab nie było prablem pry pierasiačeńni miažy», — padkreśliŭ Viačorka.
7 vieraśnia pačynaje dziejničać ukaz Łukašenki ab zabaronie pasolstvam Biełarusi vydavać i mianiać pašparty biełarusam za miažoj.
Karysnyja parady jurystaŭ i bolš padrabiaznaja, aktualnaja infarmacyja na hetu temu — nižej.
Važnaje pa temie biełaruskich pašpartoŭ:
Zakančvajecca biełaruski pašpart. I što ciapier rabić? Parady advakata
«My pracujem, kab biełarusy nie zastalisia biez pašpartoŭ» — Cichanoŭskaja
Stryžak: Pryjeduć mianiać pašpart i zusim niečakana trapiać u SIZA
Biełarusam, jakija žyvuć u Hruzii, varta pakłapacicca pra jeŭrapiejskuju vizu
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ6
Kamientary