Hrodzienskaje kotakafe pierajazdžaje. A vy ci viedali pra jaho isnavańnie i ci bačyli jaho miłych nasielnikaŭ?
Hrodzienskaje kotakafe «Koščyn dom» nie budzie pracavać u kastryčniku 2023 hoda. Pryčyna — pierajezd na novy adras, paviedamili ŭ instahramie ŭstanovy.
«My začyniajemsia… Ale tolki dla taho, kab adčynić svaje dźviery ŭ novaj chatcy dla kocikaŭ», — pišuć arhanizatary kafe. Jany rajać paśpieć zapisacca na naviedvańnie ŭ vieraśni, bo ŭ kastryčniku buduć zajmacca pierajezdam i rabić ramont u novym pamiaškańni, piša hrodna.life
Što za «Koščyn dom» i dzie jon raźmiaščaŭsia
«Koščyn dom» — pieršaje kotakafe ŭ Hrodnie. Jaho adkryła siamiejnaja para Andrej i Volha Łastoŭskija ŭ žniŭni 2022 hoda. Uvachod u kafe płatny — 12 rubloŭ. Naviedać «Koščyn dom» možna pa papiarednim zapisie hrupami da piaci čałaviek.
Da kastryčnika kafe raźmiaščajecca pa adrasie Vilenskaja, 6 — u zvyčajnaj kvatery staroha budynka. U «Koščyn dom» traplajuć katy, jakich znajšli na vulicy albo jakich pieradali vałanciory.
Pieršaje kotakafe ŭ śviecie adkryli ŭ 1998 hodzie ŭ tajvanskim horadzie Tajbej, adtul moda pierajšła ŭ Japoniju. Pieršaje kotakafe ŭ Jeŭropie adkryli ŭ Sankt-Pieciarburhu ŭ 2011 hodzie.
Viadomaje mnohim biełarusam kotakafe ŭ Vilni pracuje z 2014 hoda. Asnoŭnaja zaduma takich ustanovaŭ — pahladzieć na katoŭ i pahulać ź imi.
Kotakafe ŭ Vilni albo Biełastoku adroźnivajucca ad hrodzienskaha: tam jany pracujuć jak sapraŭdnyja kaviarni sa svajoj kuchniaj, a ŭ nas jano nahadvaje chutčej antykafe. U Minsku kotakafe isnuje ŭ Muziei kata, što niepadalok ad Kastryčnickaj płoščy.
U kotakafe ŭ Hrodnie pravodziać 1,5-hadzinnuju ekskursiju, u čas jakoj raskazvajuć pra prajekt i los žyvioł, jakija tam žyvuć. Taksama možna vypić harbaty albo kavy. Dziaciej na ekskursiju puskajuć z 10 hadoŭ — kali dzicia ŭžo navučana, jak abychodzicca z žyviołami. «Ale kali baćki vielmi prosiać, to idziom na sastupki», — kazała Volha Łastoŭskaja.
U katoŭ jość svoj ułasny pakoj
Katy — samastojnyja žyvioły, prychodziać ci sychodziać, kali chočuć. U kafe dla ich arhanizavany asobny pakoj adpačynku, kudy jany mohuć pajści.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary