Гродзенскае котакафэ пераязджае. А вы ці ведалі пра яго існаванне і ці бачылі яго мілых насельнікаў?
Гродзенскае котакафэ «Кошчын дом» не будзе працаваць у кастрычніку 2023 года. Прычына — пераезд на новы адрас, паведамілі ў інстаграме ўстановы.
«Мы зачыняемся… Але толькі для таго, каб адчыніць свае дзверы ў новай хатцы для коцікаў», — пішуць арганізатары кафэ. Яны раяць паспець запісацца на наведванне ў верасні, бо ў кастрычніку будуць займацца пераездам і рабіць рамонт у новым памяшканні, піша hrodna.life
Што за «Кошчын дом» і дзе ён размяшчаўся
«Кошчын дом» — першае котакафэ ў Гродне. Яго адкрыла сямейная пара Андрэй і Вольга Ластоўскія ў жніўні 2022 года. Уваход у кафэ платны — 12 рублёў. Наведаць «Кошчын дом» можна па папярэднім запісе групамі да пяці чалавек.
Да кастрычніка кафэ размяшчаецца па адрасе Віленская, 6 — у звычайнай кватэры старога будынка. У «Кошчын дом» трапляюць каты, якіх знайшлі на вуліцы альбо якіх перадалі валанцёры.
Першае котакафэ ў свеце адкрылі ў 1998 годзе ў тайванскім горадзе Тайбэй, адтуль мода перайшла ў Японію. Першае котакафэ ў Еўропе адкрылі ў Санкт-Пецярбургу ў 2011 годзе.
Вядомае многім беларусам котакафэ ў Вільні працуе з 2014 года. Асноўная задума такіх установаў — паглядзець на катоў і пагуляць з імі.
Котакафэ ў Вільні альбо Беластоку адрозніваюцца ад гродзенскага: там яны працуюць як сапраўдныя кавярні са сваёй кухняй, а ў нас яно нагадвае хутчэй антыкафэ. У Мінску котакафэ існуе ў Музеі ката, што непадалёк ад Кастрычніцкай плошчы.
У котакафэ ў Гродне праводзяць 1,5-гадзінную экскурсію, у час якой расказваюць пра праект і лёс жывёл, якія там жывуць. Таксама можна выпіць гарбаты альбо кавы. Дзяцей на экскурсію пускаюць з 10 гадоў — калі дзіця ўжо навучана, як абыходзіцца з жывёламі. «Але калі бацькі вельмі просяць, то ідзём на саступкі», — казала Вольга Ластоўская.
У катоў ёсць свой уласны пакой
Каты — самастойныя жывёлы, прыходзяць ці сыходзяць, калі хочуць. У кафэ для іх арганізаваны асобны пакой адпачынку, куды яны могуць пайсці.
Чаму ў Гаазе не будуць расследаваць катаванні і забойствы ў Беларусі? Тлумачыць Латушка і дэпутат Еўрапарламента ад Літвы5
Каментары