«Vielmi chočacca ŭ vypadku čaho mieć mahčymaść chucieńka źjechać». Ci patrebnyja biełarusam polskija turystyčnyja vizy?
4 vieraśnia stała viadoma, što polskija konsulstvy adnaŭlajuć pryjom dakumientaŭ na turvizy va ŭsich vizavych centrach. Jak vyśvietliła vydańnie Ex-press.by, navina ŭzradavała i tych biełarusaŭ, jakija žyvuć u Polščy i chočuć čaściej bačyć svaich svajakoŭ, i tych, chto pryvyk jeździć u Biełastok na «zakupy».
«Upeŭnienaja, što miesiac-druhi, i ažyjataž spadzie, ceny ŭpaduć»
Ksienija, 25 hadoŭ:
«Ja žyvu ŭ Polščy ŭžo praktyčna hod. Paśla zatrymańnia ŭ 2021 hodzie za raspaŭsiud nibyta «ekstremisckich» materyjałaŭ praź niekatory čas ja zrabiła humanitarnuju vizu i źjechała. Dalej ja prajšła ŭvieś praces atrymańnia mižnarodnaj abarony ŭ Polščy i ciapier, naturalna, viartacca ŭ Biełaruś ja nie źbirajusia.
Kali ja źjazdžała, to vyrazna ŭśviedamlała, što pry hetaj uładzie ŭ krainu nie viarnusia. Ale zusim inšaja reč — baćki i blizkija siabry. U lubym vypadku bačycca niejak treba, i tut šmat zaležyć ad viz.
Hetym letam mnie ŭdałosia sustrecca sa svajoj siamjoj až u Vienhryi. Baćki zrabili mienavita vienhierskuju turystyčnuju vizu, dla hetaha treba było apłacić hatel i padać pakiet dakumientaŭ. U vyniku im vydali adnarazovuju vizu na 15 sutak. Heta było pradkazalna, uličvajučy ich całkam «čystyja pašparty».
Ciapier znoŭ paŭstała pytańnie: jakim čynam adkryć vizu, a samaje hałoŭnaje — jakoj krainy. Zrazumieła, što adnaŭleńnie vydačy polskich turystyčnych viz nam vielmi darečy, nie pryjdziecca dziela sustrečy z rodnymi jechać u Vienhryju abo ŭ niejkuju inšuju krainu.
Było b vydatna, kali b paśla vienhierskaha turystyčnaha šenhiena baćkam vydali polskuju vizu choć by na paŭhoda. Pakul što zapis praz ahienctva kaštuje niejkich kašmarnych hrošaj, ja čuła, što mnohija biaruć ledź nie 1000 rubloŭ, ale ja ŭpeŭnienaja, što miesiac-druhi — i ažyjataž spadzie, i ceny ŭpaduć, pierapłačvać nie vielmi chočacca.
«Ludzi ŭsio jašče praciahvajuć jeździć zakuplacca ŭ Biełastok»
Aleh, 31 hod:
«Ciapier ja sa svajoj siamjoj žyvu ŭ Minsku. U mianie dvoje dziaciej, i raniej, jašče ŭ dakavidnyja časy, my ŭvieś čas jeździli ź siamjoj «na zakupy» ŭ Biełastok. Usio pačałosia z 2016 hoda, spačatku była adnarazovaja viza, potym na paŭhoda, a zatym i ŭvohule dali na try, jana skončyłasia ŭ 2020 hodzie. Z taho času vizy ŭ mianie nie było.
Nakolki mnie viadoma, navat niahledziačy na toje, što bolšaja častka prapusknych punktaŭ z Polščaj zakrytaja, ludzi ŭsio jašče praciahvajuć jeździć zakuplacca ŭ Biełastok. Ja daŭno dumaŭ ab tym, kab adkryć pracoŭnuju vizu dla hetaha, ale razumieju, što mianie ŭ luby momant mohuć prosta nie ŭpuścić u krainu z-za niametavaha vykarystańnia vizy. A voś turystyčnaja viza — heta vydatnaje rašeńnie prablemy.
Razvah u mianie niama zusim nijakich. Ja dakładna budu rabić turystyčnuju vizu, chaj navat pieršy raz jana i budzie adnarazovaja. Druhuju ž užo dakładna daduć «bolš surjoznuju», lubyja vydatki na afarmleńnie vizy dakładna akupiacca, uličvajučy ceny na pradukty ŭ Biełastoku.
Pryjemnaj dapamohaj tut słužyć i TaxFree, jaho afarmlajuć navat na biełastockim rynku, prynamsi, tak było raniej».
«Vielmi chočacca mieć mahčymaść chucieńka źjechać»
Safija, 24 hady:
«Letaś ja pierajechała pa pracoŭnaj vizie ŭ Polšču i žyła ŭvieś hety čas u Varšavie. U žniŭni termin dziejańnia vizy skončyŭsia, i ja viarnułasia ŭ Biełaruś.
U Polšču ja źjazdžała, tak skažam, prosta pahladzieć, nakolki tam usio pa-inšamu. Ale ŭ niejki momant zrazumieła, što emihracyju ja «nie vyvožu» i treba było b pakul što zastacca ŭ Biełarusi.
Ja pracuju dyzajnieram u internecie, i jakraz ciapier zmahła znajści sabie novuju pracu mienavita ŭ Biełarusi, tamu ŭ paŭtornym pierajeździe ŭ mianie patreby niama. Adnak pry hetym vielmi chočacca ŭ vypadku čaho (usie my razumiejem, što ciapier Biełaruś za kraina) mieć mahčymaść chucieńka źjechać.
I tamu varyjant z polskim turystyčnym šenhienam ja razhladaju, tym bolš što jaho vidavočna praściej adkryć, čym pracoŭnuju vizu».
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady44
Kamientary