Va Ukrainie hramadzianina Biełarusi asudzili za pieradaču źviestak ab siłach abarony pamiežža
Zarečnienski rajonny sud Rovienskaj vobłaści pakaraŭ hramadzianina Biełarusi šaściu hadami pazbaŭleńnia voli za raspaŭsiud infarmacyi ab pieramiaščeńni, ruchu i raźmiaščeńni Uzbrojenych sił Ukrainy la miažy ź Biełaruśsiu. Ale mužčyna nie pryznaŭ svajoj viny, piša «Radyjo Svaboda».
Sam abvinavačany nazvaŭ pravakacyjaj dziejańni «nieviadomych jamu asob, jakija prapanavali jamu supracu». Na zapisach jon pryznaŭ svoj hołas, ale padkreśliŭ, što nie byŭ inicyjataram takich razmoŭ i nie źbiraŭ zabaronienaj infarmacyi.
Asudžany — biespracoŭny, naradziŭsia i žyŭ u Rovienskaj vobłaści. U svoj čas jon vajavaŭ u Afhanistanie, byŭ tam kamandziram padraździaleńnia desantna-šturmavych vojskaŭ.
Zhodna z Kryminalnym kodeksam Ukrainy, biełarusu pavodle častki 2 artykuła 114-2 pahražała da vaśmi hadoŭ pazbaŭleńnia voli. Raniej jaho ŭžo pryciahvali da adkaznaści za apraŭdańnie i padtrymku rasijskaj ahresii suprać Ukrainy.
Na pasiadžeńni suda abvinavačany paviedamiŭ, što ŭ kancy lutaha 2023 hoda da jaho dadomu pryjazdžali nieviadomyja asoby, jakija nazvali siabie supracoŭnikami konsulstva Respubliki Biełaruś. Padčas razmovy jany jaho pavinšavali z Dniom vyvadu vojskaŭ z Afhanistana, dali dźvie tysiačy hryŭniaŭ (krychu bolš za 50 dalaraŭ u ekvivalencie) i telefon čornaha koleru. Jamu taksama paviedamili, što buduć telefanavać, kali niešta budzie patrebna.
«Ciaham krasavika-maja jon razmaŭlaŭ pa telefonie z asobaj, jakaja pradstaviłasia, i raskazvaŭ infarmacyju, jakaja jamu była viadomaja ad žycharoŭ siała pra raźmiaščeńnie sił terytaryjalnaj abarony i vajskoŭcaŭ Uzbrojenych sił Ukrainy», — adznačajecca ŭ sudovym rašeńni.
U sudzie ŭ jakaści śviedki dapytali brata abvinavačanaha, jaki paviedamiŭ, što toj jamu raskazvaŭ, jak da jaho dadomu pryjazdžali «supracoŭniki Słužby biaśpieki Ukrainy, jakija pradstavilisia jamu supracoŭnikami biełaruskaha konsulstva» i paabiacali jamu dapamahać, a praź niekatory čas jahonaha brata aryštavali.
Jašče adzin śviedka, opierupaŭnavažany ŭpraŭleńnia SBU ŭ Rovienskaj vobłaści, paviedamiŭ u sudzie, što ŭ čas svajoj słužby atrymaŭ infarmacyju, što abvinavačany hramadzianin Biełarusi «trapiŭ u pole zroku biełaruskich śpiecsłužbaŭ, padtrymlivaje suviazi z kolišnimi i dziejnymi vajskoŭcami Biełarusi i Rasii». Hetyja źviestki jon vykłaŭ u raparcie na imia svajho kiraŭnictva.
Sud pryznaŭ vinavatym hramadzianina Biełarusi, bo śledstva paćvierdziła heta piśmovymi dokazami i aŭdyjafajłami telefonnych razmoŭ.
7 červienia 2022 hoda hetamu hramadzianinu Biełarusi ŭžo prysudzili try hady pazbaŭleńnia voli z adterminoŭkaj vykanańnia pakarańnia na dva hady za apraŭdańnie rasijskaj ahresii.
«Dobry lesarub, ale sa źviazanymi rukami». Dypłamaty padsumoŭvajuć vyniki pracy zvolnienaha ministra Alejnika2
Kamientary