Ва Украіне грамадзяніна Беларусі асудзілі за перадачу звестак аб сілах абароны памежжа
Зарэчненскі раённы суд Ровенскай вобласці пакараў грамадзяніна Беларусі шасцю гадамі пазбаўлення волі за распаўсюд інфармацыі аб перамяшчэнні, руху і размяшчэнні Узброеных сіл Украіны ля мяжы з Беларуссю. Але мужчына не прызнаў сваёй віны, піша «Радыё Свабода».
Сам абвінавачаны назваў правакацыяй дзеянні «невядомых яму асоб, якія прапанавалі яму супрацу». На запісах ён прызнаў свой голас, але падкрэсліў, што не быў ініцыятарам такіх размоў і не збіраў забароненай інфармацыі.
Асуджаны — беспрацоўны, нарадзіўся і жыў у Ровенскай вобласці. У свой час ён ваяваў у Афганістане, быў там камандзірам падраздзялення дэсантна-штурмавых войскаў.
Згодна з Крымінальным кодэксам Украіны, беларусу паводле часткі 2 артыкула 114-2 пагражала да васьмі гадоў пазбаўлення волі. Раней яго ўжо прыцягвалі да адказнасці за апраўданне і падтрымку расійскай агрэсіі супраць Украіны.
На пасяджэнні суда абвінавачаны паведаміў, што ў канцы лютага 2023 года да яго дадому прыязджалі невядомыя асобы, якія назвалі сябе супрацоўнікамі консульства Рэспублікі Беларусь. Падчас размовы яны яго павіншавалі з Днём вываду войскаў з Афганістана, далі дзве тысячы грыўняў (крыху больш за 50 даляраў у эквіваленце) і тэлефон чорнага колеру. Яму таксама паведамілі, што будуць тэлефанаваць, калі нешта будзе патрэбна.
«Цягам красавіка-мая ён размаўляў па тэлефоне з асобай, якая прадставілася, і расказваў інфармацыю, якая яму была вядомая ад жыхароў сяла пра размяшчэнне сіл тэрытарыяльнай абароны і вайскоўцаў Узброеных сіл Украіны», — адзначаецца ў судовым рашэнні.
У судзе ў якасці сведкі дапыталі брата абвінавачанага, які паведаміў, што той яму расказваў, як да яго дадому прыязджалі «супрацоўнікі Службы бяспекі Украіны, якія прадставіліся яму супрацоўнікамі беларускага консульства» і паабяцалі яму дапамагаць, а праз некаторы час ягонага брата арыштавалі.
Яшчэ адзін сведка, оперупаўнаважаны ўпраўлення СБУ ў Ровенскай вобласці, паведаміў у судзе, што ў час сваёй службы атрымаў інфармацыю, што абвінавачаны грамадзянін Беларусі «трапіў у поле зроку беларускіх спецслужбаў, падтрымлівае сувязі з колішнімі і дзейнымі вайскоўцамі Беларусі і Расіі». Гэтыя звесткі ён выклаў у рапарце на імя свайго кіраўніцтва.
Суд прызнаў вінаватым грамадзяніна Беларусі, бо следства пацвердзіла гэта пісьмовымі доказамі і аўдыяфайламі тэлефонных размоў.
7 чэрвеня 2022 года гэтаму грамадзяніну Беларусі ўжо прысудзілі тры гады пазбаўлення волі з адтэрміноўкай выканання пакарання на два гады за апраўданне расійскай агрэсіі.
Цяпер чытаюць
Ад прыватнікаў патрабуюць завесці ідэолага ў штаце — распыталі, што робяць кампаніі19
Каментары