Zalevy, jakija nie spyniajucca ŭžo ceły tydzień, pryviali da mocnych pavodak u Ńju-Jorku i jaho vakolicach. Mer horada abviaściŭ nadzvyčajnuju situacyju, a hubiernatar štata papiaredžvaje pra pahrozu dla žyćcia. Hety vierasień užo nazvali samym daždžlivym u Ńju-Jorku z 1882 hoda, piša Bi-bi-si.
Z pačatku miesiaca i na ranicu piatnicy ŭ Ńju-Jorku vypała ŭžo amal 350 mm apadkaŭ. I choć ułady horada i štata pakul nie zafiksavali śmiarotnych vypadkaŭ abo ciažkich traŭmaŭ u vyniku pavodki, słužby vyratavańnia ŭžo šeść razoŭ vyzvalali ludziej z zatoplenych padvalnych pamiaškańniaŭ.
Mer Ńju-Jorka Eryk Adams pryniaŭ rašeńnie nie zakryvać škoł, bo navučencam nie pahražaje niebiaśpieka, adnak jon raić žycharam horada zachoŭvać asablivuju aściarožnaść i paźbiahać miescaŭ, schilnych da zatapleńnia.
U svaju čarhu hubiernatar štata Ńju-Jork Keci Chokuł nazvała zalevy niebiaśpiečnymi i navat pahroźlivymi žyćciu i zaklikała nasielnictva Ńju-Jorka, Łonh-Ajlenda i Chadsan-Ryvier-Veli nie ryzykavać i zastavacca na ŭzvyššach.
Palicyja Ńju-Jorka paviedamlaje, što mnohija darohi daviałosia pierakryć z-za pavodki, asabliva kali mahistrali prachodziać pad mastami abo ŭ tunelach.
Słužba haradskoha transpartu apaviaściła pasažyraŭ, što čatyry linii mietro zakrytyja całkam, a na 12 linijach nie pracujuć niekatoryja stancyi i nazirajucca značnyja zatrymki. Havorka idzie ab asnoŭnych maršrutach, jakimi karystajucca miljony ludziej.
Aeraport Ła-Huardyja ŭ rajonie Kuins abviaściŭ, što terminał A budzie časova zakryty.
Administracyja mižnarodnaha aeraporta imia Džona Kienedzi, dzie na ŭźlotnuju pałasu zranku vypała zvyš 100 mm apadkaŭ, paviedamlaje, što ŭ suviazi z umovami nadvorja rejsy mohuć zatrymlivacca ci navat admianiacca i rekamienduje pasažyram zahadzia spraŭdžvać raskład.
Što zapisana aficyjnaj pryčynaj śmierci adzinaha syna Jarmošynaj?9
Kamientary