U Livii katastrafičnaja pavodka: bolš za 3000 zahinułych i 10000 źnikłych bieź viestak
U Livii adbyłasia razburalnaja pavodka, paśla jakoj prapała bieź viestak kala 10 000 čałaviek. Kančatkovaja kolkaść zahinułych pakul nie vyznačanaja, ale jana moža składać tysiačy čałaviek. Asnoŭnyja achviary i razbureńni pryjšlisia na partovy horad Derna na ŭschodzie krainy — u im pad naporam vady prarvała dźvie płaciny, piša Bi-bi-si.
Ministr achovy zdaroŭja administracyi, jakaja kantraluje ŭschod Livii, zajaviŭ, što paćvierdžana śmierć bolš za 3000 čałaviek.
«Kolkaść źnikłych bieź viestak ličycca tysiačami, a kolkaść zahinułych, jak čakajecca, dasiahnie 10 000», — zajaviŭ jon telekanału «Al-Masar».
U Dernie byli zmytyja cełyja kvartały. Na mohiłkach sabrałasia bolš za 700 ciełaŭ, jakija čakajuć apaznavańnia, a miascovyja pradstaŭniki achovy zdaroŭja zajavili, što tysiačy čałaviek prapali bieź viestak.
Ministr hramadzianskaj avijacyi ŭ niepryznanym uradzie ŭschodniaj Livii, zajaviŭ, što situacyja ŭ Dernie katastrafičnaja.
«Cieły lažać paŭsiul: u mory, u dalinach, pad budynkami, — skazaŭ jon ahienctvu Reuters u telefonnaj razmovie paśla naviedvańnia horada. — Ja nie pierabolšvaju, kali kažu, što 25% horada źnikła. Mnohija, mnohija budynki abvalilisia».
Śpiecyjalisty i raniej papiaredžvali, što płaciny moža prarvać. Ale kali heta adbyłosia, žycharam Derny nichto nie paviedamiŭ. Na videa, raspaŭsiudžanym u sacsietkach, vidać, jak ludzi malili ab dapamozie i kryčali, kali kałamutnaja vada zatapiła ich damy. Na inšym videa bačna, jak patoki znosiać mašyny na vulicach, jakija pieratvarylisia ŭ reki.
Vyrvaŭšysia ŭ dalinu, vada raźliłasia pa vielizarnaj terytoryi. Akramia Derny, taksama paciarpieli harady Bienhazi, Susa i Al-Madž na ŭschodzie krainy. Padčas vyratavalnych rabot źnikła siamiora vajskoŭcaŭ livijskaj armii. Ułady na ŭschodzie Livii ŭviali kamiendanckuju hadzinu, a škoły i kramy zahadali začynić.
Livija padzielenaja pamiž dźviuma varožymi adna adnoj administracyjami paśla paŭstańnia, u vyniku jakoha ŭ 2011 hodzie byŭ skinuty Muamar Kadafi. Ni pryznany śvietam, ni niepryznany ŭrady nie ŭkładvali srodkaŭ u padtrymku i ramont infrastruktury, čym i mohuć tłumačycca katastrafičnyja nastupstvy pavodki.
U harach Kyrhyzstana z drona adšukali cieły źnikłych biełaruskich alpinistaŭ8
Kamientary