Fota: vecteezy
Zhodna z novym daśledavańniem, ekśpierymientalnaja hiennaja terapija, jakaja vykarystoŭvaje madyfikavany virus hierpiesu, pierśpiektyŭnaja dla lačeńnia raku mozha. Pry daśledavańni pieršaj fazy terapii byli vyjaŭlenyja dokazy taho, što virus moža biaśpiečna vyklikać imunny adkaz, jaki atakuje rak. Terapija taksama pavialičyła praciahłaść vyžyvańnia ŭ tych, chto ŭžo mieŭ antycieły da virusa.
Rak hałaŭnoha mozha — adzin z samych składanych dla paśpiachovaha lačeńnia, asabliva kali razmova idzie pra hlijabłastomu — najbolš časta dyjahnastavanuju formu raku mozha. Hlijabłastoma nievierahodna ahresiŭnaja i moža chutka raspaŭsiudžvacca na inšyja ŭčastki mozha, što robić poŭnaje chirurhičnaje vydaleńnie puchliny praktyčna niemahčymym. Pramianiovaja i chimijaterapija zvyčajna nie pryvodziać da poŭnaha źniščeńnia raku, i siońnia hetaja forma ličycca nievylečnaj. Siaredniaja praciahłaść vyžyvańnia vahajecca ŭ miežach vaśmi miesiacaŭ.
Ale daśledčyki z Brigham and Women's Hospital miarkujuć, što jany, mahčyma, znajšli novy sposab baraćby z padobnymi vidami raku, vykarystoŭvajučy našaha ŭsiudyisnaha zaklataha voraha — hienietyčna madyfikavany virus prostaha hierpiesu (herpes simplex I virus).
Hlijabłastoma zdolnaja paźbiahać našych ułasnych imunnych kletak, jakija aktyŭna zmahajucca z puchlinaj, rastłumačyŭ u kamientary dla Gizmodo adzin z aŭtaraŭ daśledavańnia. U łabaratoryi na asnovie virusa hierpiesu navukoŭcy raspracavali sielektyŭny bijałahičny preparat dla ŭviadzieńnia ŭ puchlinu z metaj daviedacca, ci mahčyma źmianić formu hlijabłastomy, kab taja straciła zdolnaść paźbiahać imunnych kletak pacyjenta.
Isnujuć i inšyja mietady lačeńnia raku, zasnavanyja na virusie hierpiesu, jakija znachodziacca ŭ stadyi raspracoŭki abo ŭžo ŭchvalenyja dla lačeńnia peŭnych vidaŭ raku, naprykład, takich, jak miełanoma. Novy mietad, jaki atrymaŭ nazvu CAN-3110, krychu adroźnivajecca ad inšych terapieŭtyčnych viersij, bo ŭsio jašče źmiaščaje hien, jaki dapamahaje dzikamu virusu hierpiesu vyklikać zachvorvańnie ŭ ludziej pad nazvaj ICP34.5. Daśledčyki ličać, što ICP34.5 źjaŭlajecca nieabchodnym dla pravakacyi dastatkova mocnaha imunnaha adkazu na rakavyja kletki, ale jany pasprabavali hienietyčna zaprahramavać CAN-3110 nie atakavać zdarovyja kletki.
U ich apošnim daśledavańni, apublikavanym u sieradu ŭ Nature, terapija, zdajecca, maje šmatspadzieŭny pačatak. Kamanda navukoŭcaŭ dała 41 pacyjentu z puchlinami hałaŭnoha i śpinnoha mozha, u tym liku 32 čałaviekam z recydyvam hlijabłastomy, adnu dozu CAN-3110. Pieršaja faza vyprabavańniaŭ u asnoŭnym pryznačanaja dla paćviardžeńnia karotkaterminovaj biaśpieki ekśpierymientalnaha lačeńnia, i, zdajecca, lačeńnie ŭ cełym dobra pieranosiłasia (u dvuch pacyjentaŭ zdaryŭsia prystup, jaki, mahčyma, źviazany z novym preparatam).
Kala dźviuch tracin pacyjentaŭ užo mieli antycieły da virusa hierpiesu — i ŭ hetych pacyjentaŭ daśledčyki taksama znajšli dokazy taho, što lačeńnie ŭzmacniła reakcyju imunnaj sistemy na rak. Važna adznačyć, što siaredniaja vyžyvalnaść hetych pacyjentaŭ składała kala 14 miesiacaŭ u paraŭnańni z pryblizna vaśmiu miesiacami dla tych, chto raniej nie padviarhaŭsia ŭździejańniu hierpiesu.
Viadoma, spatrebicca značna bolš daśledavańniaŭ, kab paćvierdzić, ci moža CAN-3110 być žyćciazdolnym mietadam lačeńnia raku hałaŭnoha mozha, u tym liku ŭ ludziej, u minułym nie zaražanych hierpiesam (darečy, bolšaść ludziej va ŭsim śviecie majuć antycieły da jaho). CAN-3110 atrymaŭ licenziju na dalejšaje raźvićcio, i, dziakujučy hrantu ad daśledčaha fondu Break Through Cancer, kamanda navukoŭcaŭ užo pracuje nad svaim nastupnym daśledavańniem, jakoje maje vyznačyć aptymalnuju dazoŭku terapii.
Čytajcie taksama:
