Raskryta asoba zasnavalnika hrupoŭki Killnet. Raniej toj pahražaŭ łukašenkaŭcam
Prapahandysckaje vydańnie Hazieta.Ru pry dapamozie krynic raskryła sapraŭdnaje imia chakiera pad nikam Killmilk — lidara rasijskaj hrupoŭki Killnet, jakaja atakavała šmatlikija celi na Zachadzie i pahražała śpiecsłužbam Łukašenki. Raskazvajem, kim akazaŭsia hety chakier.
«Zasnavalnikam rasijskaj chakierskaj hrupoŭki Killnet, jaki zaŭsiody dziejničaje pad nikam Killmilk, akazaŭsia 30-hadovy Mikałaj Sierafimaŭ. U minułym mužčyna adbyvaŭ pakarańnie ŭ kałonii za vytvorčaść i raspaŭsiud narkatyčnych rečyvaŭ», — paviedamiŭ prakramloŭski resurs Hazieta.Ru.
Infarmacyju Haziety.Ru ab asobie lidara Killnet paćvierdzili pradstaŭniki inšych chakierskich hrupovak Rasii i krynicy ŭ siłavych viedamstvach. Tyja adznačyli, što ŭ Sierafimava nazapasiłasia šmat vorahaŭ unutry krainy, u tym liku i ŭpłyvovych.
Sam Sierafimaŭ nie paćvierdziŭ, ale i nie abvierhnuŭ infarmacyju pra svaju rolu. Jak napisała Hazieta.Ru, chakier źviazvaŭsia z karespandentam vydańnia i sprabavaŭ vyśvietlić, chto jaho źliŭ. Lidar Killnet patłumačyŭ svaju cikavaść žadańniem abaranić svaju siamju, adnak prakramloŭskaje vydańnie admoviła jamu, paśla čaho toj vydaliŭ pierapisku.
«Killmilk umieje pierakonvać i prasoŭvać svaje idei. Jon padobny na błohieraŭ-infamachlaroŭ, razumiejecie? Pry hetym, jak techničny śpiecyjalist Sierafimaŭ vielmi słaby. Jon, kaniešnie, maje niekatoryja navyki ŭ DDoS-atakach, ale jon karystajecca tolki čužymi botnetami, a asnoŭnuju pracu ŭ chakierskim kirunku za jaho robiać inšyja ludzi», — raspavioŭ na ŭmovach ananimnaści adzin z byłych čalcoŭ Killnet.
Pryvodziačy prykład infamachlarstva Mikałaja Sierafimava, krynicy vydańnia Hazieta.Ru raspaviali ab prajekcie «Dark-škoła», dzie toj praź internet pradavaŭ ludziam kursy pa chakierskim majsterstvie.
Pa słovach tych, chto kupiŭ hetyja kursy (adzin kurs kaštavaŭ 250 dalaraŭ, usiaho ich nabyli kala 150 čałaviek), infarmacyja adtul «nie ŭjaŭlała praktyčnaj kaštoŭnaści i była sastarełaj i lohka dastupnaj u internecie». Viarnuć hrošy nie atrymałasia.
Byŭ taksama i inšy momant, za jaki Sierafimava mocna nie lubili, ale pry hetym bajalisia vystupać suprać jaho napramuju.
«Mnohija ad jaho stamilisia. U kułuarach suprać Killmilk vystupaje značnaja častka prarasijskich hrupovak. Adnak jany bajacca varahavać ź im publična, bo Killmilk lubić raskryvać asoby svaich kankurentaŭ i zatym šantažavać ich hetaj infarmacyjaj», — adznačyŭ u kamientarach da Haziety.Ru chakier z rasijskaj hrupoŭki Net-Worker.
Prakramloŭskaje vydańnie taksama pacikaviłasia ŭ inšych śpiecyjalistaŭ, jakoj mahła być sapraŭdnaja pryčyna deanonu lidara takoj vialikaj chakierskaj sietki, jakaja pracuje ŭ intaresach rasijskich śpiecsłužbaŭ i kiraŭnictva krainy.
Jak miarkuje adzin z surazmoŭcaŭ Haziety.Ru, usiamu vinoj razborka pamiž siłavymi viedamstvami.
«Ja amal upeŭnieny, što Killmilk staŭ achviaraj kuratarskich razborak pamiž siłavymi strukturami na fonie płanaŭ Kramla ab aficyjnym farmavańni kibierarmii.
Pakolki peŭnyja viedamstvy kaardynujuć dziejnaść niekatorych chakierskich hrupovak, to jany ž sprabujuć zahadzia dzialić biudžet na budučuju kibierarmiju. Samoha biudžietu, darečy, dahetul nie isnuje», — miarkuje Pavieł Sitnikaŭ, stvaralnik rasijskaj kampanii XPanamas, jakaja raspracoŭvaje sistemy infarmacyjnaj biaśpieki.
U svaju čarhu, inšyja surazmoŭcy ličać, što pryčyna deanonu Sierafimava prosta kryjecca ŭ jaho nieprafiesijanaliźmie, a taksama ŭ niezadavalnieńni z boku astatnich čalcoŭ Killnet.
Hrupoŭka Killnet stała najbolš viadomaj, dziakujučy kibieratakam na mnohija bujnyja abjekty ZŠA i Jeŭrasajuza, jakija pačali aktyŭna ładzicca paśla pačatku rasijskaha vajennaha ŭvarvańnia va Ukrainu.
U hetym hodzie pad pryceł hrupoŭki patrapili i śpiecsłužby režymu Łukašenki, jakija viasnoj zatrymali ŭradženca Homiela Arsienija Jelisiejeva, lidara chakierskaj sietki Anonymous Russia, jakaja taksama ŭvachodziła i ŭ Killnet (u vieraśni nad 18-hadovym chłopcam pačaŭsia sud, jaho abvinavačvajuć pavodle dvuch kryminalnych artykułaŭ).
Tady zasnavalnik Killnet Mikałaj Sierafimaŭ u svaim telehram-kanale napisaŭ, što «Respublika Biełaruś — u čornym śpisie», i pačaŭ pahražać łukašenkaŭskim śpiecsłužbam kibieratakakami, kab jany vyzvalili Jelisiejeva.
Ale potym Sierafimaŭ vydaliŭ svaje pahrozy i pryznačyŭ novaha kiraŭnika Anonymous Russia.
«Naša Niva» — bastyjon biełaruščyny
PADTRYMAĆTur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii7
Kamientary