Zacharaŭ nazvaŭ skład chakiejnaj zbornaj na Alimpijadu‑2010

Hałoŭny trenier zbornaj Biełarusi pa chakiei Michaił Zacharaŭ u sieradu 23 śniežnia nazvaŭ imiony kandydataŭ u nacyjanalnuju kamandu, jakija buduć rychtavacca da Alimpijskich hulniaŭ‑2010 u kanadskim Vankuviery.

Nastaŭnik biełaruskaj ladovaj družyny spyniŭ vybar na nastupnych chakieistach:

hałkipiery: Andrej Miezin, Vital Koval (abodva — «Dynama», Minsk);

abaroncy: Andrej Antonaŭ, Andrej Baško, Uładzimir Dzianisaŭ («Dynama», Minsk), Alaksandr Syrej, Vadzim Suško (abodva — «Šachcior», Salihorsk), Viktar Kaściučonak («Spartak», Maskva, Rasija), Mikałaj Stasienka («Amur», Chabaraŭsk, Rasija), Rusłan Salej («Kałarada», ZŠA, NCHŁ);

forvardy: Aleh Antonienka, Siarhiej Zadzialonaŭ, Alaksandr Kułakoŭ, Andrej Michaloŭ, Andrej Staś (usie — «Dynama», Minsk), Siarhiej Dziamahin («Naftachimik», Nižniakamsk, Rasija), Alaksiej Kalužny («Dynama», Maskva, Rasija), Kanstancin Kalcoŭ («Sałavat Jułajeŭ», Ufa, Rasija), Alaksiej Uharaŭ (MVD, Bałašycha, Rasija), Andrej Kaścicyn, Siarhiej Kaścicyn (abodva — «Manreal», Kanada, NCHŁ), Michaił Hraboŭski («Taronta», Kanada, NCHŁ).

Michaił Zacharaŭ padkreśliŭ, što heta nie kančatkovy śpis alimpijcaŭ, i tamu ŭ mnohich hulcoŭ jość jašče šaniec prabicca ŭ alimpijskuju družynu. Kančatkova proźviščy z 23 udzielnikaŭ Alimpijady buduć nazvany 15 lutaha ŭžo ŭ Kanadzie.

Na Alimpijadzie‑2010 u Vankuviery zbornaja Biełarusi, na papiarednim etapie zhulaje ŭ hrupie S, z kamandami Finlandyi (17 lutaha), Šviecyi (19 lutaha) i Hiermanii (20 lutaha).

Skład astatnich hrup: A — Kanada, ZŠA, Šviejcaryja, Narviehija; V — Rasija, Čechija, Słavakija, Łatvija.

Try pieramožcy kvartetaŭ, a taksama lepšaja siarod kamandaŭ, jakija zaniali druhija miescy, adrazu atrymajuć miescy ŭ 1/4 finału. Jašče čatyry čverćfinalisty vyznačacca ŭ tak zvanym kvalifikacyjnym raŭndzie płej‑of (23 lutaha),

dzie vystupiać astatnija ŭdzielniki hulniaŭ, pašychtavanyja pavodle ranžyru u zaležnaści ad ich turnirnych pakazčykaŭ papiaredniaj stadyi (miesca ŭ hrupie, kolkaść nabranych bałaŭ, roźnica šajbaŭ). U kvalifikacyjnym raŭndzie płej‑of 5‑ia kamanda sustreniecca z 12‑j, 6‑ia — z 11‑j, 7‑ia — z 10‑j, 8‑ia — z 9‑j. Pačynajučy z 1/4 finału (24 lutaha) alimpijski turnir projdzie pa kłasičnaj schiemie plej‑of. Paŭfinały pryznačanyja na 26 lutaha, matč za bronzu — na 27 lutaha, a finalny pajadynak adbudziecca 28 lutaha.

Dla biełaruskaj zbornaj heta zimovaja Alimpijada stanie treciaj.

Da hetaha jaje najvyšejšym dasiahnieńniem było 4‑ie miesca, zaniataje ŭ amierykanskim Sołt‑Łejk‑Sici ŭ 2002 hodzie. Tady haduncy Uładzimira Krykunova siensacyjna abyhrali ŭ 1/4 finału šviedaŭ i ŭvajšli ŭ čaćviorku najlepšych kamandaŭ, sastupiŭšy ŭ pajadynku za 3‑ie miesca rasijskaj kamandzie. U japonskim Nahana ŭ 1998 hodzie biełarusy na čale z Anatolem Varyvončykam ŭ čverćfinale prajhrali rasiainam. U Alimpijadzie ŭ Turynie ŭ 2006 h. biełarusy nie ŭdzielničali.

• 0
• 0
• 0
• 0
• 0
• 0
• 0
• 0