Najlepšy futbalist Biełarusi — viciabčuk z afrykanskimi karaniami. Chto taki Maks Ebonh?

Najdaražejšy ŭ svajoj lizie i adziny biełarus u jeŭrakubkach

Biełaruskija kłuby nie źziajuć na mižnarodnym uzroŭni, dyj zbornaja ledźvie pieramahaje Andoru — jaŭna nie futbolnaha hihanta. Jak u takich vypadkach vybirać futbalista hoda? Vidavočny varyjant na zvańnie — Illa Škuryn, forvard polskaj «Stali», jaki pakazvaje fajnuju statystyku ŭ tamtejšym čempijanacie. 

Ale ž spadziavacca na toje, što fiederacyja futboła ŭhanaruje Škuryna, nie davodziłasia, bo dobra viadoma — u 2020 hodzie Illa admoviŭsia vystupać za zbornuju Biełarusi, pakul krainaj kiruje Alaksandr Łukašenka. U takoj situacyi futbolnyja čynoŭniki vybrali Maksa Ebonha, i hety biełarus nasamreč maje peŭnyja dasiahnieńni za minuły hod.

24-hadovy paŭabaronca skončyŭ siezon u statusie srebnaha miedalista kazachstanskaha čempijanata i ŭ składzie «Astany» vystupaŭ na hrupavym etapie Lihi kanfierencyj — sioleta heta adziny biełarus na takim uzroŭni.

Dadamo, što chłopiec staŭ kapitanam biełaruskaj zbornaj. A ŭ listapadzie, paśla abnaŭleńnia tranśfiernych koštaŭ futbalistaŭ na resursie Transfermarkt, Ebonh akazaŭsia jašče i adnym z najdaražejšych hulcoŭ u čempijanacie Kazachstana: jaho, jak i jašče dvuch futbalistaŭ, acanili na miljon jeŭra.

Ekśpierty adznačajuć hulniavyja jakaści biełarusa. Naprykład, kazachstanski žurnalist Eryk Sadykaŭ nazyvaje Maksa dychtoŭnym futbalistam: «Jon i za zbornuju pyšna hulaje, razhaniaje ataki. Jamu treba źjazdžać». A biełaruski futbolny insajdar Uładzisłaŭ Tatur kaža, što chaciełasia b ubačyć Ebonha ŭ Jeŭropie.

Ros u niapoŭnaj siamji

Poŭnaje imia Ebonha — Afryd Maks Ebonh Nhomie, chłopiec naradziŭsia 26 krasavika 1999 hoda ŭ Viciebsku. Jaho maci — biełaruska Natalla, baćka — kamieruniec Esteł. Niekali jon pryjechaŭ u našu krainu sa stalicy Kamieruna Jaunde i pastupiŭ vučycca ŭ miedycynski koledž, dzie i sustreŭ budučuju žonku.

Mocnaj siamji, adnak, u Maksa nie było. U siaredzinie nulavych baćka pajechaŭ zarablać hrošy ŭ Rasiju, a potym viarnuŭsia ŭ Kamierun. Ni z žonkaj, ni z synam Esteł nie kantaktuje. Apošni raz Maks bačyŭ baćku piatnaccać hadoŭ tamu, kali naviedvaŭ taho ŭ Maskvie.

Pavialičyć

Plamieńnik viciebskaha futbalista

Maks — nie pieršy ŭ siamji, chto pryśviaciŭ žyćcio futbołu. U adnym ź niešmatlikich intervju chłopiec pryznavaŭsia, što brat jaho maci, Siarhiej Jaremienka, taksama byŭ prafiesijnym futbalistam. Vidać, nie ŭsio ŭ jaho atrymoŭvałasia — kažučy pra dziadźku, Maks pryznavaŭsia, što maci nahledziełasia na jaho traŭmy.

Siarhiej Jaremienka nasamreč hulaŭ u vyšejšaj lizie čempijanata Biełarusi ŭ składzie słonimskaha «Kamunalnika», ale da bujnych kłubaŭ nie dabraŭsia. Futbalist skončyŭ karjeru ŭ 2005-m u składzie «Oršy», ciapier jamu 50 hadoŭ.

Moh trapić u internat, a zamiest hetaha akazaŭsia ŭ kłubie z dahavarniakami

Pieršy trenier Ebonha — Uładzimir Vajciachovič z futbolnaj škoły «Kamsamolec», jon ža byŭ pieršym nastaŭnikam u futbole lehiendy BATE Vitala Radzivonava. 

Kali Maksu było 15, jaho kvateru naviedała inśpiekcyja, jakaja praviaraje abstanoŭku, dzie žyvuć vučni. Tady ŭ siamji było błaha z hrašyma: nakapilisia daŭhi, ŭ tym liku pa kamunałcy, navat adklučyli śviatło. Vyniki pravierki byli niesuciašalnyja — mamie junaha futbalista dali dva miesiacy, kab znajści miesca, dzie jon budzie dahledžany i nakormleny. Inakš — pazbaŭleńnie baćkoŭskich pravoŭ i internat dla chłopca.

Pavialičyć

Dapamoh Vajciachovič. Trenier pazvaniŭ znajomym z salihorskaha «Šachciora», jaki tady byŭ adnym ź lidaraŭ lihi, i sasvataŭ pierśpiektyŭnaha chłopca. Karocieńki prahlad – i Ebonhu prapanavali kantrakt.

U Salihorsku chłopiec zatrymaŭsia da 2020 hoda, pakul jaho nie pradali za 250 tysiač jeŭra ŭ «Astanu».

Maryć hulać u «Reale»

U vieraśni 2023-ha Ebonh daŭ nievialičkaje intervju, dzie padzialiŭsia ŭ tym liku i płanami na karjeru. U chłopca spytali, dzie b jon chacieŭ zajhrać, kali b byŭ šaniec apynucca ŭ adnoj ź jeŭrapiejskich top-lih.

Viciabčuk nazvaŭ ispanski čempijanat i padzialiŭsia ambicyjnaj maraj: «Što da kłuba, dumaju, va ŭsich jość mara patrapić u madrydski «Reał». Dla hetaha treba staracca i pracavać. Ale čamu b nie maryć pra heta?»

U BATE — najhoršyja vyniki za historyju. Top-5 pryčyn pravału

Viedajecie, chto abhaniaje «Barsiełonu» ŭ čempijanacie Ispanii? Zaštatny kłub z dvuma ŭkraincami ŭ składzie

Biełaruskaja spartoŭka zapisała kryk dušy: Ja stamiłasia vychodzić na pustyja stadyjony

• 7
• 0
• 1
• 0
• 2
• 1
• 5
• 0