U zakonie padrabiazna prapisali harantyi Łukašenku na piensii. Ci značyć heta, što jon sabraŭsia sastupić uładu?

Karbalevič: «Stvaraje dla siabie ŭmovy, kab nie zastacca ŭ projhryšy pry lubym raźvićci padziej»

Palityčny ahladalnik «Radyjo Svaboda» Valer Karbalevič kaža, što, niahledziačy na padrychtoŭku zakanadaŭstva, Łukašenka nikudy sychodzić nie źbirajecca.

«Vyłučeńnie Pucina na novy termin źniało apošniuju psichałahičnuju pieraškodu, kab Łukašenka ŭ 2025 hodzie taksama pajšoŭ na vybary», — ličyć Karbalevič.

Palitołah miarkuje, što zakanadaŭstva źmianiajuć na ŭsialaki vypadak. 

«Łukašenka stvaraje dla siabie ŭmovy, kab nie zastacca ŭ projhryšy pry lubym raźvićci padziej. Hetyja harantyi mohuć spatrebicca ŭ tym vypadku, kali jamu daviadziecca adyści ad ułady praz stan zdaroŭja».

Karbalevič ličyć, što kali sa zdaroŭjem u Łukašenki ŭsio budzie bolš-mienš dobra, to my dakładna ŭbačym jaho kandydaturu na nastupnych vybarach.

«U novaj Kanstytucyi jon zakłaŭ, što prezident adnačasova moža być kiraŭnikom Usiebiełaruskaha narodnaha schodu, pakinuŭ sabie mahčymaść dalej bałatavacca ŭ prezidenty. To-bok praduhledzieŭ dla siabie ŭsie mahčymyja varyjanty i stvaryŭ tak zvanuju padušku biaśpieki».

Kłaskoŭski: «Hety zakon najpierš pradyktavany źmienami ŭ Kanstytucyju»

Palityčny analityk infarmahienctva «Pozirk» Alaksandr Kłaskoŭski taksama ličyć, što Łukašenka nie źbirajecca na piensiju, a budzie trymać uładu da apošniaha.

Pavialičyć

«Pryniaćcie papravak ni ŭ jakim razie nie jość simptomam taho, što jon źbirajecca na piensiju paśla šostaj kadencyi. Hety zakon najpierš pradyktavany źmienami ŭ Kanstytucyju. Bolš žorstkija ŭmovy dla kandydataŭ, pavialičany da 40 hadoŭ uzrostavy cenz i h.d. Źmieny, jakija tyčacca dadatkovych harantyj biaśpieki i pryvilej, byli chutčej z razradu «chaj buduć na ŭsialaki vypadak».

Kłaskoŭski ličyć, što Łukašenka, jak daśviedčany i niedavierlivy palityk, razumieje, što jak tolki jon pakinie ŭładu, to ŭsie hetyja harantyi stanuć vielmi chistkimi.

«Ryzyki ŭźniknuć navat pry ŭmovie, što nastupnym prezidentam budzie staŭlenik z namienkłatury. Niama ŭpeŭnienaści, što na niejkim etapie jon nie pačnie intryhavać.

Tym bolš, što jość jaskravy prykład Kazachstana. Nazarbajeŭ nibyta ŭsio praduhledzieŭ, pryznačyŭ łajalnaha čałavieka. Ale na peŭnym etapie Takajeŭ adcisnuŭ Nazarbajeva i jahonych svajakoŭ», — nahadvaje Kłaskoŭski.

Analityk adznačaje, što ŭ 2020 hodzie sapraŭdy mahli iści razmovy pra vychad Łukašenki na piensiju, tamu i byŭ zapuščany praces kanstytucyjnaj reformy, praciaham jakoj i źjaŭlajucca źmieny ŭ zakon ab prezidencie.

«Na tle pratestaŭ Maskva sapraŭdy tady padšturchoŭvała Łukašenku da tranzitu ŭłady, tamu jon praduhledzieŭ hety Usiebiełaruski narodny schod ź vialikimi paŭnamoctvami, stvaryŭ novuju Kanstytucyju. Ale potym situacyja źmianiłasia.

Pavialičyć

Pa-pieršaje, Łukašenka vytrymaŭ i zacemientavaŭ svaje pazicyi, a pa-druhoje — Pucin pačaŭ vajnu. Tamu pytańnie pra adychod Łukašenki ad ułady pierastała być aktualnym dla Maskvy i ciapier takich płanaŭ niama.

Kłaskoŭski miarkuje, što Łukašenka zojmie miesca staršyni UNS i pry hetym zastaniecca na pasadzie prezidenta.

«Jon budzie trymać uładu, jak sam kaža, pasiniełymi palcami, pakul stan zdaroŭja budzie dazvalać. Bo jon razumieje, što ŭ inšym vypadku ryzyki vielmi vialikija.

Łukašenka aścierahajecca, što ŭ nastupnika mohuć uźniknuć spakusy «zdać» jaho, bo toj atrymaje krainu pad sankcyjami i z atručanymi adnosinami z Zachadam. Nastupny prezident zmoža zachacieć pieraharnuć hetuju staronku i paviesić usich sabak na Łukašenku».

Čytajcie taksama:

Jakaja piensija budzie ŭ Łukašenki paśla adychodu ad ułady?

• 7
• 0
• 1
• 5
• 0
• 8
• 11
• 0