Ukrainskaja armija, imavierna, vychodzić z Aŭdziejeŭki

Aficyjnych zajaŭ ab adstupleńni ŭkrainskaj armii z bolšaj častki Aŭdziejeŭki pakul niama, ale suma paviedamleńniaŭ vajennych błohieraŭ i vykazvańniaŭ vajskoŭcaŭ dazvalaje vykazać zdahadku, što paśla taho, jak rasijanie na hetym tydni pierarezali hałoŭny šlach zabieśpiačeńnia, padraździaleńni USU pastupova pakidajuć bolšuju častku razburanaha horada, a niekatoryja ź ich apynulisia ŭ akružeńni, piša Bi-bi-si.

Pra vychad USU z Aŭdziejeŭki pišuć i rasijskija, i, što važniej, ukrainskija vajennyja kamientatary.

«U Aŭdziejeŭcy žyćcio i razumny sens pieramahli», — napisaŭ u čaćvier uviečary ŭkrainski vajskovy žurnalist Bahdan Mirošnikaŭ.

«Dalej buduć novyja ciažkija rašeńni i naviny. Naš harnizon zastajecca ŭ 9-m kvartale i na AKCHZ. U inšych častkach — dzieści vyjšli, dzieści viadziem bai. Ale tendencyja, dumaju, zrazumiełaja», — praciahnuŭ Mirošnikaŭ.

9-y kvartał — heta zachodniaja ŭskraina Aŭdziejeŭki, praź jakuju pralahaje adkryty šlach adychodu z horada na zachad, praz pali. AKCHZ — Aŭdziejeŭski koksachimičny zavod, jaho vialikaja terytoryja prylahaje da horada z poŭnačy.

Ukrainski vajenna-analityčny prajekt DeepState u čaćvier uviečary paviedamiŭ, što rasijanie padniali svoj ściah nad umacrajonam «Zienit» na poŭdni horada.

«U apošnija dni pazicyi tam byli ŭ poŭnym akružeńni. Siońnia asnoŭnyja siły vyjšli z pazicyj, ale vyjści atrymałasia nie ŭsim, to-bok nie ŭsio tak radasna, jak sprabujuć padać inšyja», — pišuć aŭtary DeepState

Pra toje, što niekatoryja ŭkrainskija padraździaleńni ŭ Aŭdziejeŭcy faktyčna apynulisia ŭ akružeńni, skazaŭ u efiry Radyjo Svaboda i pres-ataše 3-j asobnaj šturmavoj bryhady USU, niadaŭna kinutaj na dapamohu aŭdziejeŭskamu harnizonu.

«Ukrainskija siły zaraz znachodziacca ŭ składanym farmacie abarony. Niekatoryja padraździaleńni pracujuć u nas na 360 hradusaŭ. Heta značyć […] vorah moža na niekatorych učastkach paražać amal całkam na 360 hradusaŭ. Heta nie kaža, što my całkam akružanyja na hetych učastkach, ale heta značyć, što paražać jon moža», — skazaŭ Alaksandr Baradzin.

Narešcie, z zajavaj ab Aŭdziejeŭcy ŭ pačatku nočy na ​​piatnicu vystupiŭ kamandujučy dziejnaj na hetym froncie ŭkrainskaj hrupoŭki «Taŭryja», bryhadny hienierał Alaksandr Tarnaŭski.

Hienierał Tarnaŭski zapeŭnivaje, što bai iduć u horadzie, što harnizon trymajecca, što jamu adpraŭlenyja padmacavańnie i bojeprypasy – i ŭ toj ža čas u zajavie hienierała jość nastupnyja frazy:

«Padrychtavanyja novyja pazicyi i praciahvajuć rychtavacca mahutnyja ŭmacavańni z ulikam mahčymych scenaraŭ […] My cenim kožny kavałak ukrainskaj ziamli, ale najvyšejšaja kaštoŭnaść i pryjarytet dla nas — zachavańnie žyćcia ŭkrainskaha sałdata».

Pavialičyć

Aŭdziejeŭka znachodzicca ŭsiaho za niekalki kiłamietraŭ na poŭnač ad Daniecka, i akazałasia na linii frontu jašče padčas łakalnaj vajny ŭ Danbasie. Zatym, paśla poŭnamaštabnaha napadu Rasii, harnizon Aŭdziejeŭskaha ŭmacavanaha rajona doŭha i paśpiachova adbivaŭ sproby praciŭnika prasunucca na hetym napramku.

U pačatku kastryčnika rasijskaja armija raspačała masiravany šturm aŭdziejeŭskaha vystupu i jaho fłanhaŭ. Jak śćviardžajuć ukrainskija vajskoŭcy, za čatyry miesiacy pastajannych napadaŭ rasiejcy stracili tut šmat tysiač sałdat i sotni adzinak braniatechniki.

Płošča Aŭdziejeŭki — 29 kvadratnych kiłamietraŭ, heta značyć, ciapier heta vyciahnutaja z paŭdniovaha ŭschodu na paŭnočny zachad pałasa ruin šyrynioj dva-try kiłamietry i daŭžynioj dziesiać kiłamietraŭ.

• 6
• 1
• 0
• 28
• 6