«U ludziej nie było času narmalna sabracca». Stryžak pra detali apošniaj chvali evakuacyi ź Biełarusi
Za čas apošniaj abłavy na siemji palitviaźniaŭ słužba evakuacyi «Bajsoł» vyviezła ź Biełarusi bolš za 35 čałaviek. Kiraŭnik fondu Andrej Stryžak raskazaŭ «Našaj Nivie», čym hetaja chvala evakuacyi adroźnivałasia ad inšych.
Evakuacyjnaja słužba pracuje zaŭždy
Andrej Stryžak kaža, što ŭ fondzie zaŭždy hatovyja da evakuacyi ludziej, i ŭ niejkim sensie paraŭnoŭvaje «Bajsoł» z padstancyjaj chutkaj dapamohi, jakaja ŭvieś čas hatovaja prymać vykliki.
«Navat u tyja dni, kali zapytaŭ mała abo ich zusim niama, my znachodzimsia na pastajannym dziažurstvie. Evakuacyjnaja słužba — adzinaja ŭ našaj arhanizacyi, jakaja pracuje paźmienna.
Kali zdarajecca niešta padobnaje na toje, što my bačyli naprykancy studzienia, to ŭsie pracujuć u režymie 24/7», — tłumačyć Stryžak.
Ź jaho słoŭ, paśla taho, jak siłaviki abviaścili, što jany nibyta nakryli kadravy rezierv Biełarusi, fond taksama znachodzicca ŭ režymie pavyšanaj hatoŭnaści ŭ čakańni novaj chvali zapytaŭ na evakuacyju.
Stryžak dadaje, što, pakul režym nie źmienicca i ŭ Biełarusi budzie panavać dyktatura, słužba evakuacyi biez pracy nie zastaniecca.
«Naturalna, što paśla taho, jak siłaviki pajšli pa svajakach palitviaźniaŭ, adbyŭsia ŭsplosk. Za hetyja try tydni było vyvieziena bolš za 35 čałaviek. A kali hladzieć na statystyku, to va ŭmoŭna spakojnym časie ciaham troch tydniaŭ było b čałaviek 10-15».
Vyjazdžali cełymi siemjami
Andrej Stryžak vyłučaje peŭnyja asablivaści apošniaj chvali. Adna ź ich u tym, što siarod evakujavanych było šmat ludziej, jakija jašče ranicaj byli ŭpeŭnienyja, što ŭ ich žyćci ničoha nie źmianiłasia, a ŭžo viečaram byli na evakuacyjnaj trasie.
«To-bok u ludziej banalna nie było času, kab padrychtavacca i narmalna sabracca. Inšaja śpiecyfika składałasia z taho, što było šmat evakuacyj siemjami. Ludzi byli vymušanyja źjazdžać jak z małymi dziećmi, tak i sa starymi baćkami.
Praz heta była vialikaja raźbiežka pa ŭzroście. Kali samym maładym było mienš za 10 hadoŭ, to samym darosłym užo bolš za 60».
Navošta hetyja čystki ŭładam?
Na dumku Stryžaka, pakolki biełaruskaja ŭłada znachodzicca ŭ z usich bakoŭ asadžanaj krepaści, to joj vielmi važna pastajanna trymać u tonusie ŭ tym liku svaich prychilnikaŭ.
«Tamu ja dumaju, što ŭsie hetyja dziejańni ciapier bolš nakiravanyja nie na tych, chto suprać siońniašniaj ułady, a chutčej na tych, chto za. Im treba pakazać, što hranica na zamku, unutranyja i źniešnija vorahi pieramožanyja i pravilnaść kursa paćvierdžanaja. Tamu jość takoje mierkavańnie ŭ mianie, što heta chutčej zroblena dla ŭnutranaha ŭžyvańnia samoj sistemy. Im važna rabić akty lehitymacyi samich siabie pierad samimi saboj».
Stryžak nie ličyć, što varta raźličvać na niejkuju adlihu paśla zaviaršeńnia elektaralnaj kampanii.
«Mahčyma, nie budzie takich vialikich kampanij, jak ciapier, kali sotni ludziej padviarhajucca vobšukam. Ale ŭsio roŭna treba pamiatać, što ŭ nas adbyvajecca da 10 aryštaŭ u dzień navat va ŭmoŭna spakojny čas. Tamu niejkaj adlihi paśla vybaraŭ čakać nie varta, bo łukašysty ciapier nie ŭ tym stanoviščy, kali jany mahli pahandlavać z Zachadam».
Čytajcie taksama:
Śviatłana Aleksijevič: Zianon mieŭ racyju. A my vieryli ŭ Rasiju, čakali dapamohi ad Rasii i rasijskaj intelihiencyi
Jak vyhladajuć debaty na BT: manałohi kandydataŭ, a paśla dźvie chviliny abmierkavańnia Kurapataŭ
-
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni
-
Chalezin: Samyja vialikija hanieńni na Svabodny teatr byli pry Łatušku. Ale jamu nie treba kajacca pierada mnoju
-
Ci mohuć nie puścić u kramu za 5 chvilin da zakryćcia i da jakoha času pavinny pracavać kasirki
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni14
Kamientary