Vił Mirzajanaŭ
— Jak doŭha ŭ ciele pamierłaha moža zachoŭvacca jad «Navičok» abo jaho anałah? Ci možna znajści jaho ślady ŭ arhaniźmie praź miesiac?
— U vielmi małych kancentracyjach «Navičok» moža zachavacca, mahčyma, navat praź miesiac paśla atručvańnia.
— Ci mohuć ułady tearetyčna raspačać niejkija manipulacyi ź ciełam, kab prybrać śled «Navička»?
— Dumaju, nie. Pradukty raspadu zachavajucca nazaŭždy, pakolki bolš niama naturalnaha ich vykidu z mačoj i kałam. Sam «Navičok» taksama zachavajecca niapeŭna doŭha.
— U pieršym adkazie vy skazali, što praź miesiac «Navičok» zachavajecca ŭ vielmi małych kancentracyjach, a ŭ druhim adkazie ŭdakładnili, što paśla śmierci «Navičok» moža zachoŭvacca niapeŭna doŭha. Ci pravilna ja zrazumieŭ, što havorka idzie pra toje, što ź ciaham času kancentracyja jadu ŭ arhaniźmie budzie źnižacca, ale znajści jaho možna navat praź miesiacy, a, moža, i hady paśla atručvańnia?
— Zychodžu z vopytu lačeńnia Skrypaloŭ (Siarhiej Skrypal i jaho dačka Julija byli atručanyja ŭ Sołśbiery — Red.) anhličanami.
Paśla taho jak antydotami jany vyratavali žyćci, kancentracyja «Navička» nijak nie chacieła iści na źmianšeńnie. Pryjšłosia rabić vykryćcio i amal miechanična źniščać «Navičok» ź piečani i inšych orhanaŭ. Niečakanaść. Mabyć, malekuły «Navička» ŭstupajuć u suviaź z orhanami abo nabyvajuć achoŭnuju abałonku i dalej pieraškadžajuć dehazacyi. Adsiul majo zaklučeńnie, što «Navičok» na niejkim uzroŭni kancentracyi moža zachoŭvacca niapeŭna doŭha. Jak doŭha, my nie možam pakul viedać. Mahčyma, anhličanie heta viedajuć.
— Jość apisańnie taho, što adbyvałasia z Navalnym pierad śmierciu: pavodle zajavy FSVP, jon adčuŭ siabie drenna i praktyčna adrazu straciŭ prytomnaść. Maci i advakatam jaho skazali, što heta była raptoŭnaja śmierć (u hetym vypadku, pa słovach jaho byłoha doktara, jon moh navat nie paśpieć adčuć siabie drenna — prosta spyniła pracavać serca). Ci padobna jakoje-niebudź z hetych apisańniaŭ na nastupstvy prymianieńnia «Navička»? Kali tak, to nakolki surjoznaj mahła być doza?
— Ad vialikaj kancentracyi moža nastupić imhniennaje spynieńnie serca — paralič. Heta viadoma.
— Ci moža pradstaŭlać cieła atručanaha niebiaśpieku dla navakolnych? I kali tak, to jak doŭha?
— Viadoma, cieła atručanaha ŭjaŭlaje niebiaśpieku dla čałavieka biez abarony. Kali viersija atručvańnia dakładnaja, to naŭrad ci jaho addaduć maci.
Viersija paŭtornaha atručvańnia Navalnaha zjaviłasia praktyčna adrazu paśla paviedamleńnia FSVP pra śmierć palityka i niaŭdałych sprobaŭ baćkoŭ zabrać jaho cieła. U paniadziełak jaje ahučyła i ŭdava apazicyjaniera Julija. U svaim videazvarocie jana skazała, što ŭłady «čakajuć, kali tam źniknuć ślady čarhovaha pucinskaha «Navička».
Pra toje, što ahučany ŭ kałonii maci palityka dyjahnaz padobny ŭ tym liku na atručeńnie «Navičkom», kazaŭ i anastezijołah-reanimatołah Alaksandr Pałupan, jaki lačyŭ Navalnaha paśla atručvańnia ŭ 2020 hodzie.
Krynicy The Moscow Times raspaviali, što ŭłady abmiarkoŭvajuć roznyja varyjanty adkłaści vydaču cieła Navalnaha, adzin z varyjantaŭ dapuskaje, što svajaki nie atrymajuć cieła zusim.
Maci Navalnaha i advakatam pradstaŭniki Śledčaha kamiteta Rasiei ŭ paniadziełak paviedamili, što cieła palityka, pamierłaha ŭ kałonii, nakiravali na chimičnuju ekśpiertyzu, jakaja praciahniecca 14 dzion.
Čytajcie taksama:
Ruski dobraachvotnicki korpus płanavaŭ vyzvalić Navalnaha siłavym šlacham — voś jak
Ci moža śmierć Navalnaha padšturchnuć rasiejcaŭ da baraćby za svabodu?
Rasijskija žurnalisty znajšli videa z kartežam, u jakim mahli pieravozić cieła Navalnaha
