Za danaty asudzili nie mienš za 67 čałaviek

Na siońniašni dzień viadoma pra jak minimum 64 asudžanych za danaty pavodle art. 361-2 KK (finansavańnie ekstremisckaha farmavańnia). Ahułam ich asudzili na 192 hady i šeść miesiacaŭ pazbaŭleńnia i abmiežavańnia voli, piša «Viasna».

Heta ludzi roznych prafiesij, śfier dziejnaści i sacyjalnaha statusu: hałoŭny inžynier bujnoha pradpryjemstva i były supracoŭnik banka, syn palityka i vykładčyca anhlijskaj movy, psichałahinia i pres-sakratar.

Tak palitźniavolenuju minčanku Ksieniju Chodyravu zatrymali ŭ kastryčniku 2023 hoda za danaty i niekalki miesiacaŭ utrymlivali ŭ SIZA KDB. U lutym 2024 hoda jaje asudzili za «finansavańnie ekstremisckaj dziejnaści» i za «finansavańnie vajny» (č. 2 art. 361-3 KK) na piać hadoŭ kałonii. 

Hałoŭnaha inžyniera «Miłkavity» Alaksandra Struhalskaha asudzili ŭ lutym 2024 hoda za «finansavańnie ekstremisckaj dziejnaści» na try hady «chatniaj chimii». Jaho zatrymali jašče vosieńniu 2022 hoda. Pavodle praŭładnych th-kanałaŭ, mužčyna dasyłaŭ hrošy ŭ «Bajsoł». 

Tancorku i maci dvaich dziaciej Viktoryju Haŭrylinu asudzili ŭ vieraśni 2023 hoda na try hady i try miesiacy kałonii. Žančynu abvinavacili pavodle troch kryminalnych artykułaŭ, u tym liku za «finansavańnie ekstremisckaj dziejnaści» (art. 361-2 KK). Žančynu razam z mužam zatrymali zimoj 2023 hoda. Mužčynu paśla adbyćcia 30 sutak aryštu vypuścili na volu. 

Stvaralnika navukova-papularnaha časopisa Pamylka Juryja Adamava zatrymali viasnoju 2023 hoda. Jon udzielnik biełaruskaj supolnaści za svabodnaje prahramnaje zabieśpiačeńnie, pravioŭ niekalki daśledavańniaŭ pa fizicy ŭ ZŠA. Navukoŭca asudzili ŭ lipieni 2023 hoda za «finansavańnie ekstremisckaj dziejnaści» na try hady kałonii. 

Taksama ŭ Biełarusi adznačanyja vypadki pieraśledu pavodle art. 290-1 KK «finansavańnie terarystyčnaj dziejnaści» — za danaty ŭ roznyja inicyjatyvy, naprykład u BYPOL i «Kibierpartyzany». Pa im užo asudzili jak minimum traich čałaviek ahułam na 26,5 hadoŭ kałonii: Mikałaja Vasileviča na dzieviać hadoŭ i šeść miesiacaŭ kałonii, Dźmitryja Słuka na vosiem hadoŭ i šeść miesiacaŭ kałonii, Aleha Dziehciarenku na vosiem hadoŭ i šeść miesiacaŭ kałonii.

Jašče piać čałaviek ciapier znachodziacca pad vartaj u čakańni suda pa hetym artykule.

Treniera-masažysta ź Minska Mikałaja Vasileviča abvinavacili ŭ «stvareńni ekstremisckaha farmavańnia» (art. 361-1 KK), «finansavańni dziejnaści ekstremisckaha farmavańnia» (art. 361-2 KK) i «finansavańni terarystyčnaj dziejnaści» (č. 2 art. 290-1 KK).

Prapahandysckija ŚMI raspaviali, što ahułam za dva hady Mikałaj zrabiŭ nie mienš za 54 danaty ŭ fondy salidarnaści i roznyja inicyjatyvy.

Ahułam 12 vieraśnia 2023 hoda Mikałaja asudzili na 9,5 hadoŭ kałonii va ŭmovach uzmocnienaha režymu.

Babrujčanina Dźmitryja Słuka zatrymali 10 lutaha 2023 hoda. Jaho abvinavacili ŭ «finansavańni terarystyčnaj dziejnaści» (č. 1 art. 290-1 KK) za danaty «Kibierpartyzanam».

4 lipienia 2023 hoda jaho asudzili na 8,5 hadoŭ kałonii i štraf 300 bazavych vieličyniaŭ.

Pra spravu hamielčuka Aleha Dziehciarenki amal ničoha nieviadoma, bo sud adbyvaŭsia ŭ zakrytym režymie. Jaho abvinavacili va «ŭdziele ŭ ekstremisckim farmavańni» (č. 3 art. 361-1 KK) i «finansavańni terarystyčnaj dziejnaści» (č. 2 art. 290-1 KK). U Homielskim abłasnym sudzie siomaha sakavika 2024 hoda Alehu prysudzili 8,5 hadoŭ kałonii va ŭmovach uzmocnienaha režymu i štraf 100 bazavych vieličyniaŭ. 

Palitviaźnia Alaksandra Zijazetdzinava asudzili vosieńniu 2022 hoda za «finansavańnie dziejnaści ekstremisckaha farmavańnia» (č. 1 art. 361-2 KK) na try hady kałonii. Zimoju 2024 hoda jaho znoŭ pačali sudzić.

Da papiaredniaha artykuła jamu pastavili ŭ vinu «finansavańnie terarystyčnaj dziejnaści» (č. 2 art. 290-1 KK). Jamu pahražaje da 15 hadoŭ kałonii. Za niekalki miesiacaŭ da pačatku suda nad palitviaźniem, vyjšaŭ prapahandyscki film ź jaho ŭdziełam. Ź filma stała viadoma, što Alaksandr pisaŭ prašeńnie ab pamiłavańni i pieraličyŭ u jakaści vodkupu na rachunki miedyčnych ustanovaŭ 31 bitkojn (na siońnia heta prykładna dva miljony dalaraŭ). 

Śledčy kamitet u lutym 2024 hoda paviedamiŭ, što biełarusy zrabili «dobraachvotnych achviaravańniaŭ» na sumu bolš za 37 miljonaŭ rubloŭ (kala 11,5 młn. dalaraŭ). 

A 14 sakavika 2024 hoda UUS Minskaha abłvykankama paviedamiła, što tolki z pačatku 2024 hoda było vyjaŭlena 260 čałaviek, jakija rabili danaty inicyjatyvam i arhanizacyjam, pryznanym uładami «ekstremisckimi farmavańniami» na sumu bolš za 5000 dalaraŭ. Siłaviki prymusili zrabić «dobraachvotnyja achviaravańni» na sumu bolš za 356 tysiač dalaraŭ. 

• 0
• 0
• 0
• 0
• 1
• 1
• 16
• 0