Zabojca, jaki zarezaŭ šeść čałaviek u handlovym centry Sidneja, śpiecyjalna abiraŭ žančyn
Adziny zahinuły mužčyna — achoŭnik centra 30-hadovy Faraz Tachir, jaki pasprabavaŭ spynić zabojcu.
Jak ličyć aŭstralijskaja palicyja, mužčyna, jaki zarezaŭ šaściarych naviedvalnikaŭ handlovaha centra ŭ Sidnei, vidać, vybiraŭ u jakaści achviar žančyn, piša Bi-bi-si.
Piać z šaści zahinułych ad ruk Džoeła Kaŭčy ŭ handlovym šmatludnym kompleksie Westfield Bondi Junction byli žančynami. Jašče niekalki čałaviek, u tym liku maleńkaja dziaŭčynka, atrymali ranieńni.
Jak skazała intervju aŭstralijskamu telekanału ABC News kamisar palicyi Novaha Paŭdniovaha Uelsa Karen Ueb, było «vidavočna», što Kaŭčy vybiraŭ u jakaści achviar mienavita žančyn.
Adziny zahinuły mužčyna — achoŭnik centra 30-hadovy Faraz Tachir, jaki pasprabavaŭ spynić zabojcu
Inšymi achviarami stali 47-hadovaja Džejd Janh, 55-hadovaja Pikryja Daršya, 25-hadovaja Doun Sinhłtan, 38-hadovaja Ešli Hud i Čen Isiuań, jakoj mierkavana było ad 20 da 30 hadoŭ.
«Videazapisy kažuć sami za siabie — skazała Ueb. — Dla mianie i dla inšych śledčych vidavočna … što złačynca zasiarodziŭsia na žančynach i paźbiahaŭ mužčyn».
«My nie viedajem, što rabiłasia ŭ hałavie ŭ złačyncy, i mienavita tamu važna, kab detektyvy, nie škadujučy času, apytali tych, chto jaho viedaje».
Ułady raniej zajavili, što ŭ Kaŭčy, chutčej za ŭsio, byli prablemy ź psichičnym zdaroŭjem.
Jaho baćka, Endru Kaŭčy, raspavioŭ žurnalistam, što Džoeł pakutavaŭ na psichičnyja zachvorvańni i niadaŭna spyniŭ pryjom lekaŭ.
«Dla vas jon pačvara. Dla mianie jon byŭ vielmi chvorym chłopčykam», — skazaŭ jon u videaroliku, apublikavanym hazietaj The Australian.
«Jon chacieŭ dziaŭčynu, u jaho nie było sacyjalnych navykaŭ, i jon byŭ zasmučany da straty rozumu», — dadaŭ jon, kali jaho spytali, čamu jaho syn moh napaści na žančyn.
Ešli Hud była śmiarotna paranienaja, sprabujučy abaranić svaju dzieviacimiesiačnuju dačku, jakaja taksama atrymała ranieńnie. Jaje terminova dastavili ŭ balnicu, i, pa słovach pradstaŭnikoŭ štata, paśla niekalkich hadzin ekstranaj apieracyi stan dziciaci značna palepšyŭsia.
Premjer-ministr Aŭstralii Entani Ałbaniz paćvierdziŭ, što kitajanka Čen Isiuań była studentkaj i vučyłasia ŭ Sidnei. Ab trahiedyi paviedamili členam jaje siamji, i zaraz jany jeduć u Aŭstraliju.
Pracadaŭca Doŭn Sinhłtan — z kramy modnaj vopratki ŭ handlovym centry — u svaim paviedamleńni ŭ sacyjalnych sietkach adhuknuŭsia pra jaje jak pra «miłaha, dobrasardečnaha čałavieka, u jakoha ŭsio žyćcio było napieradzie».
Faraz Tachir, pa słovach premjer-ministra, zusim niadaŭna imihravaŭ u Aŭstraliju z Pakistana.
Čatyry čałavieki, paciarpiełyja padčas napadu, užo vypisanyja ź lakarni. Pa danych miascovych ŚMI, jašče vosiem znachodziacca ŭ stanie ad ciažkaha da stabilnaha.
Dla rasśledavańnia incydentu była stvorana śpiecyjalnaja ŭdarnaja hrupa; palicyja štata Novy Paŭdniovy Uels zajaviła, što rasśledavańnie moža praciahnucca niekalki miesiacaŭ.
Premjer-ministr Novaha Paŭdniovaha Uelsa Krys Mins skazaŭ, što ŭvieś Sidnej uzrušany hetym złačynstvam, i abviaściŭ pra praviadzieńnie rasśledavańnia dziejańniaŭ palicyi.
Kaŭčy ŭžo traplaŭ u pole zroku palicyi ŭ svaim rodnym štacie Kvinślend, ale jaho nikoli nie aryštoŭvali i nie pryciahvali da adkaznaści. Pa dadzienych pradstaŭnikoŭ palicyi Kvinślenda, na praciahu niekalkich hadoŭ jon vioŭ vandroŭny ład žyćcia, a ŭ 17 hadoŭ u jaho ŭpieršyniu dyjahnastavali psichičnaje zachvorvańnie.
Infarmacyi pra lačeńnie Kaučy ad psichijatryčnych zachvorvańniaŭ u Novym Paŭdniovym Uelsie — štacie, dzie adbyŭsia napad, — nie, i ŭłady abiacajuć staranna rasśledavać situacyju.
Napad u adnym z samych bujnych i papularnych handlovych centraŭ krainy ŭzrušyŭ Aŭstraliju, dzie masavyja zabojstvy adbyvajucca redka.
U paniadziełak pa ŭsioj krainie pryspuścili ściahi, budynak Sidnejskaha opiernaha teatra padśviatlili ahniami ŭ znak pamiaci ab achviarach.
Da Bondi Junction prychodziać ludzi, kab pakinuć kvietki i paštoŭki la impravizavanaha miemaryjała.
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka48
Kamientary