Pa darozie ŭ Ivianiec zatrymana 46 aktyvistaŭ Sajuzu palakaŭ
A 17 hadzinie tut u Polskim domie maje raspačacca schod pa źmienie kiraŭnictva miascovaha adździeła, inicyjavany ŭładami.
Siońnia zranku kala 100 aktyvistaŭ Sajuzu palakaŭ u Biełarusi, jaki ačolvaje Anžalika Borys, vyjechali ŭ Ivianiec.
A 17 hadzinie tut u Polskim domie pavinien raspačacca schod pa źmienie kiraŭnictva miascovaha adździełu, inicyjavany ŭładami. Adnak dabracca da Ivianca pakul što zdoleli tolki kala pałovy delehataŭ z Hrodna.
Jak paviedamiŭ aktyvist SPB Andrej Pačobut, supracoŭniki DAI ŭžo zatrymali 46 čałaviek. U kiroŭcaŭ paprostu zabirajuć pravy i prymusova kanvajujuć u Ščučynski i Vałožynski adździeły RAUS.
«Na hetuju chvilinu zatrymana 46 čałaviek. Heta ludzi z Hrodna, jakija jechali padtrymać Ivianiecki adździeł. 9 čałaviek znachodziacca ŭ Ščučynie, u Ščučynskim RAUS, astatnija — u Vałožynie. DAI zatrymlivała mašyny, i, naprykład, tyja mašyny, jakija zatrymanyja ŭ vakolicach Vałožynu, — paprostu zabirali ŭ kiroŭcaŭ pravy i patrabavali, kab jany jechali pad kanvojem u Vałožynski RAUS. Niahledziačy na toje, što nas maksimalna sprabavali vyłapać,
užo kala 30 čałaviek užo tut:
kiraŭnictva arhanizacyi na čale z Anžalikaj Borys i namieśnicaj staršyni Anžalikaj Arechva — jany ŭžo ŭ Iviancy».
Taksama siońnia kiraŭnicu Ivianieckaha adździełu SPB Taresu Sobal vyklikali na dopyt u Vałožynski RAUS. Sustreča sa śledčym pryznačanaja na 16 hadzinu. Na dumku Andreja Pačobuta, kiraŭnicu miascovaha adździełu SPB vyklikajuć, kab pieraškodzić joj uziać udzieł u schodzie arhanizacyi. Pierad hetym adbyłosia pasiedžańnie praŭleńnia Sajuzu palakaŭ, jakoje adnahałosna padtrymała Taresu Sobal.
Ciapier čytajuć
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ11
Kamientary