«Chaj hetaja Hiulčataj adkryje tvaryk». Siarod vykładzienych Kibierpartyzanami, vyjaviŭsia i list Fiaduty

Alaksandr Fiaduta ŭ svaim charakternym styli pisaŭ asabista staršyni Kamiteta dziaržaŭnaj biaśpieki Valeryju Vakulčyku.

«Pavažany Valery Paŭłavič! Usie ŭžo paradavalisia spynieńniu spravy ab «Biełym Lehijonie»? Vydatna. Zaraz davajcie choć by niešta ŭ hetaj krainie daviadziem da kanca.

Ja pra zahadkavuju «frau A.», na pakazańniach jakoj, jak ja razumieju, častkova hruntavałasia śledstva ŭ momant najvyšejšaha svajho ŭzbudžeńnia.

Maŭlaŭ, voś, pryjšła dama i paviedamiła našamu pasolstvu (ci nie pasolstvu?) infarmacyju, ź jakoj usio i pajšło-pajechała. Jak u školnaj zadačy pra dźvie truby — u adnu ŭciakaje, ź inšaj vyciakaje. U dadzienym vypadku zadačku vyrašyć treba — inakš chren usim žurnalistam cana.

Takim čynam, pytańnie pieršaje: u jakoje mienavita pasolstva pryjšła zahadkavaja «frau A.»? Śpis adkaznych supracoŭnikaŭ na sajcie ambasady pavinien być — a ŭžo ŭ adździele kadraŭ MZS dakładna, dyk chto dapuściŭ hetuju małaŭniatnuju asobu na achoŭnuju terytoryju, Uładzimir Makiej dakładna viedaje. Chaj adkaža — chto.

Ab padpałach našych pasolstvaŭ ničoha čuvać nie było, tamu kniha, u jakoj fiksujucca ŭsie (!!!) naviedvalniki, tam napeŭna zachoŭvajecca. I ŭ knizie, stała być, danyja zahadkavaj frau taksama pavinny być zafiksavanyja. Chaj MZS ich pradjavić. Mnie tut zapis u kaściolnaj knizie ab chryščeńni Tadevuša Bułharyna niejak spatrebiłasia znajści — znajšoŭsia, ujaŭlajecie? A tut, badaj, času mienš prajšło.

Zatym varta padać pazoŭ ab abaronie honaru i hodnaści da hetaj miłaj panienki. Kali jana isnuje (!!!), jana napeŭna adkaža, što ničoha kankretnaha ni pra kaho jana nie paviedamlała. Tady paŭstaje pytańnie ab pravamiernaści dziejańniaŭ tych, chto zavodziŭ kryminalnuju spravu z nahody piersanalij, vidavočna paciarpiełych u vyniku niepravamiernych śledčych dziejańniaŭ, Kali jany sapraŭdy byli niepravamiernymi — a voś pra heta pavinna budzie publična i piśmova adkazać prakuratura — jość ža toj jaje supracoŭnik, chto davaŭ sankcyju na aryšt, skažam, Łazoŭskaha? Čym jon kiravaŭsia? Jakija danyja byli jamu pradjaŭlenyja? I čamu hetych źviestak chapiła na aryšt, ale nie chapiła na sud. Cikava ž? Mnie taksama cikava.

Zrešty, biełaruskaja častka hetaha siužeta, bajusia, pry ciapierašniaj uładzie raskrytaja publicy nie budzie. Ale historyju z frau A. — davodźcie da kanca, chłopcy. Biełteleradyjokampanija, naprykład, zhodna z zakonam, pavinna praviarać infarmacyju, jakuju vypuskaje ŭ efir. Jak jaje supracoŭniki praviarali, ci adpaviadaje rečaisnaści piśmo frau? Ci isnuje hety tekst, jaki składaŭ u toj momant śledčuju tajamnicu? Chto pradjaviŭ jaho žurnalistam z BTRKa? I hetak dalej. Jano jornična hučyć, viadoma. Ale nahadaju: u 2010 hodzie Daškieviča i Łobava sadžali na padstavie skarhi pierson, jakija siadzieli ŭ susiednim pakoi i nie vychodzili ŭ zału pasiadžeńniaŭ. Kab žurnalisty asob ich nie ŭbačyli, paciarpiełych hetych.

Frau A. paciarpiełaj nie była.

Paciarpiełymi akazalisia «lehijaniery». U ich jość poŭnaje prava damahacca pakarańnia paklopnicy pavodle zakonaŭ toj krainy, dzie jana žyvie. Albo — pakarańnia supracoŭnikaŭ biełaruskaha MZS, jakija raptam (!!!) stracili ŭsiu infarmacyju ab padazronaj ciotcy, jakaja sprabavała abhavaryć mirnych našych suhramadzian. U pieršym vypadku chaj adkazvaje jana, u druhim — architektar biełaruskaj adlihi spadar Makiej.

Dakładniej, jaho padnačalenyja. Abo-abo. Jano, imavierna, niepryhoža vyhladać budzie: mała chto ź dziaržsłužačych tak ščyra staraŭsia, kab «lehijanieraŭ» vypuścili jak maha raniej, i navat damohsia hetaha. Ale ministr pa spravach libieralizacyi pavinien zrazumieć i nas: jaho ž viedamstva budzie i nadalej zastavacca krajnim, kali frau A. nie budzie znojdziena.

«Ženščynu» ŭ studyju! Tolki chaj hetaja Hiulčataj taki adkryje tvaryk. Vy žyviacie za moj košt i ja chaču viedać praŭdu. Patrabuju adkazać na maje pytańni.

Vaš stary znajomy, Fiaduta».

Alaksandr Fiaduta skančaje hety dziorzki list iraničnym podpisam «vaš stary znajomy», imavierna, nahadvajučy pra svajo źniavoleńnie ŭ SIZA KDB u 2010—2011 hadach.

Nahadajem, što Alaksandra Fiadutu zatrymali 12 krasavika 2021 hoda. Jaho abvinavacili ŭ zmovie z metaj zachopu ŭłady. Razam ź im pa spravie prachodzili juryst Juraś Ziankovič, palityk Ryhor Kastusioŭ, aktyvist Dzianis Kraŭčuk i supracoŭnica ofisa Ziankoviča Volha Hałubovič. U vieraśni 2022 hoda Fiadutu dali 10 hadoŭ pazbaŭleńnia voli. Jaho ŭtrymlivajuć u katavalnych umovach u mahiloŭskaj kałonii №15.

• 97
• 0
• 15
• 3
• 5
• 7
• 7
• 0