Biełaruskuju delehacyju na pieramovach uznačalvaje vice‑premjer Andrej Kabiakoŭ.
Paradak zaličeńnia i raźmierkavańnia ŭvaznych pošlin, padatkaŭ i zboraŭ budzie abmiarkoŭvacca 27 studzienia ŭ Maskvie na pasiadžeńni Kamisii Mytnaha sajuza Biełarusi, Kazachstana i Rasii. Biełaruskuju delehacyju na pieramovach uznačalvaje vice‑premjer Andrej Kabiakoŭ.
Pavodle infarmacyi pres‑słužby biełaruskaha MZS, udzielniki pasiadžeńnia taksama razhledziać płan farmavańnia adzinaj ekanamičnaj prastory, pytańni funkcyjanavańnia adzinaj sistemy nietaryfnaha rehulavańnia, adzinaj tavarnaj namienkłatury źniešnieekanamičnaj dziejnaści Mytnaha sajuza i šerah inšych aktualnych pytańniaŭ.
Jak adznačaje rasijskaje vydańnie »Kommiersant'», siońniašniaje pasiadžeńnie Kamisii — pieršaje z momantu nabyćcia mocy pahadnieńniami Mytnaha sajuza, adnak
«hałoŭnuju dla sajuza na ciapierašni momant prablemu, naftavuju vajnu Rasii i Biełarusi, baki buduć abmiarkoŭvać za miežami kamisii».
«Kommiersant'» źviartaje ŭvahu na toje, što «mienavita paśla zapusku novych pravił Mytnaha sajuza Rasija i Biełaruś ustupili ŭ kanflikt ŭ handli enierhanośbitami». «Hałoŭnaj prablemaj sajuza na hety momant stanie pazicyja Biełarusi», — ličyć vydańnie.
***
Siońnia ž u Maskvie buduć praciahvacca pieramovy ab ŭmovach pastaŭki ŭ Biełaruś rasijskaj nafty. Čarhovy pieramoŭny raund pačaŭsia 25 studzienia. Aficyjnyja pradstaŭniki chod dyskusii nie kamientujuć, ale, pavodle infarmacyi krynic, blizkich da pieramoŭ, jany prachodziać «u vielmi składanych umovach». «Členy biełaruskaj delehacyi praktyčna nie vykazvajuć hnutkaść, bo stajać na pazicyjach, zadadzienych kiraŭnictvam Biełarusi», — paviedamiła žurnalistam viečaram 26 studzienia rasijskaja krynica.
Pavodle jaje słoŭ, «baki pačali ŭdakładnieńnie pazicyj pa canie tranzitu rasijskaj nafty». Rasijski bok aścierahajecca mahčymych raskradańniaŭ tranzitnaj nafty, bo zapasaŭ syraviny na biełaruskich NPZ zastałosia na tydzień, adznačyła krynica.
23 studzienia pieršy vice‑premjer RF Ihar Šuvałaŭ, jaki ŭznačalvaje rasijskuju delehacyju na siońniašnim pasiadžeńni Kamisii Mytnaha sajuza, zajaviŭ: biełaruska‑rasijskaja sprečka ab pošlinach na naftu nie maje nijakaha dačynieńnia da farmavańnia Mytnaha sajuza Rasii, Biełarusi i Kazachstana.
«My zychodzim z taho, što ŭnutranyja pošliny pavinny być admienieny za niekatorym vyklučeńniem, napeŭna, pra jakoje my damovimsia pry farmiravańni adzinaj ekanamičnaj prastory, — skazaŭ Šuvałaŭ u prahramie »Viesti» telekanała «Rośsija». — Farmiravańnie ž Mytnaha sajuza — heta abaviazacielstva dla nas mieć adziny mytny taryf na źniešniaj miažy, a pa tym, jak tavary buduć pieramiaščacca ŭnutry, heta pradmiet našych dalejšych damoŭlenaściaŭ».
Kamientary