Upieršyniu ŭ historyi Mieksiki prezidentam abrali žančynu. Jana nobieleŭskaja łaŭreatka

Prezidentam Mieksiki ŭpieršyniu ŭ historyi stanie žančyna: na vybarach, jakija prajšli ŭ niadzielu, upeŭniena pieramahaje byłaja mer Miechika i prateže dziejnaha prezidenta Kłaŭdyja Šejnbaŭm, piša Bi-bi-si.

Pavodle pieršych źviestak chutkaha padliku CVK, zasnavanych na apracoŭcy biuleteniaŭ z 7500 učastkaŭ, Šejnbaŭm nabiraje 58,4% hałasoŭ, jašče adna žančyna — jaje hałoŭnaja supiernica, sienatar — Ksatčytl Halvies — 30,4%.

Ekzit-poł, praviedzieny kampanijaj Parametria, pakazaŭ, što za Kłaŭdyju Šejnbaum prahałasavali 56% vybarščykaŭ, a za Ksačytl Halvies — 30%. Ekzit-poł kampanii Enkoll daŭ padobnyja vyniki: 57,8% za Šejnbaum i 29,1% za Halvies.

61-hadovaja Kłaŭdyja Šejnbaum była vyłučana ŭ prezidenty kaalicyjaj Sigamos Haciendo Historia («Praciahniem tvaryć historyju»), u jakuju ŭvajšli try levyja partyi, u tym liku kiroŭnaja partyja Moreno dziejnaha prezidenta Andresa Manuela Łopiesa Abradora.

Sam Łopies Abrador pa Kanstytucyi nie moža bałatavacca na druhi termin i tamu padtrymaŭ Šejnbaŭm.

Šejnbaum vyrasła ŭ Miechika ŭ jaŭrejskaj siamji (jaje dziadula i babula pa linii baćki emihravali siudy ŭ 1920-ja ź Litvy, a babula była z bałharskich jaŭrejaŭ) i spačatku atrymała viadomaść jak fizik, a ŭ 2007 hodzie atrymała kalektyŭnuju Nobieleŭskuju premiju miru ŭ jakaści člena Mižuradavaj hrupy ekśpiertaŭ pa źmianieńni klimatu.

U 2000 hodzie Łopies Abrador, jaki byŭ tady meram Miechika, pryznačyŭ Šejnbaum sakratarom pa pytańniach navakolnaha asiarodździa stalicy, a ŭ 2018 hodzie jana źmianiła Abradora, jaki pieramoh na prezidenckich vybarach, na pasadzie mera.

Šejnbaum abiacaje praciahnuć i raźvić palityku Łopiesa Abradora.

Adzin z hałoŭnych punktaŭ jaje pieradvybarnaj prahramy — baraćba sa złačynnaściu. Na pasadzie mera Miechika joj udałosia źnizić kolkaść naŭmysnych zabojstvaŭ u stalicy da samaha nizkaha ŭzroŭniu za bolš čym try dziesiacihodździ, i jana źbirajecca raspaŭsiudzić hety vopyt na ŭsiu krainu.

Šejnbaŭm abiacaje zrabić upor na kaardynacyi pamiž Nacyjanalnaj hvardyjaj, palicyjaj Štataŭ i prakuraturaj, a taksama na pracu raźviedvalnych i śledčych słužbaŭ.

Baraćba sa złačynnaściu, zrešty, była adnym z hałoŭnych punktaŭ prahram usich troch kandydataŭ (trecim byŭ deputat parłamienta štata Sakatiekas Chorchie Alvares Majnies).

Z 2018 pa 2022 hod štohadovaja kolkaść naŭmysnych zabojstvaŭ u Mieksicy pieravyšała 30 tysiač, pryčym pik pryjšoŭsia na 2020 hod, kali ŭ krainie zabili 36 773 čałavieki. Z 2020 hoda ŭzrovień zabojstvaŭ źnižaŭsia i ŭ 2023 hodzie ŭpieršyniu za piać hadoŭ apuściŭsia nižej za 30 tysiač, ale heta ŭsio roŭna vielmi šmat dla 130-miljonnaj krainy i vyšej za siaredni ŭzrovień 1990—2017 hadoŭ.

Šmatlikimi zabojstvami była azmročana i ciapierašniaja pieradvybarčaja kampanija. 2 červienia ŭ Mieksicy vybirali nie tolki prezidenta, ale i hubiernataraŭ niekalkich štataŭ i tysiačy deputataŭ roznych uzroŭniaŭ, i padčas hetaj kampanii byli zabityja 36 kandydataŭ.

• 0
• 9
• 0
• 1
• 3
• 1
• 1