U Litvu bieź ježy, napojaŭ i cyharet. Što adbyvajecca z uvozam biełaruskich tavaraŭ u Litvu?
Ad 3 červienia nabyła moc zabarona na ŭvoz u Litvu sielskahaspadarčaj pradukcyi i karmoŭ z Rasii i Biełarusi. Ale jak vyśvietliłasia, pad zabaronu trapiŭ našmat bolšy pieralik tavaraŭ, čym možna sabie ŭjavić, pračytaŭšy pra «sielskahaspadarčuju pradukcyju».
Made in Belarus bolš nie dla Litvy
Pačynajučy z 00:00 3 červienia, ź Biełarusi ŭ Litvu nielha ŭvozić amal ničoha.
Pad zabaronu trapili nie tolki sielskahaspadarčyja vyraby. Faktyčna zabaronieny ŭvoz lubych praduktaŭ charčavańnia, napojaŭ, ałkaholu, tytuniovych vyrabaŭ biełaruskaj abo rasijskaj vytvorčaści.
Pra toje, što Litva ŭvodzić abmiežavańni, stała viadoma zahadzia. Infarmacyja na sajcie litoŭskaj mytni źjaviłasia jašče 30 maja.
Pry hetym pieravozčyki mierkavali, što zabarona na ŭvoz budzie tyčycca tolki jurydyčnych asob, bo hety momant nie byŭ vyrazna akreśleny.
«Biełaruś taksama ŭviała niadaŭna sankcyi suprać Litvy, jakija zabaraniajuć ekspart šerahu tavaraŭ u Biełaruś. Ale na fizičnych asob heta nijak nie raspaŭsiudžvałasia, tamu my taksama spadziavalisia, što dla zvyčajnych ludziej ničoha nie źmienicca», — kaža pradstaŭnik pieravozčyka, jaki ažyćciaŭlaje rejsy ź Biełarusi ŭ Litvu.
U aŭtobus tolki z asabistymi rečami
Ciapier pry prodažy biletaŭ i pry pasadcy ŭ aŭtobus pieravozčyki buduć papiaredžvać pra toje, što Litva ŭviała ban na pravoz lubych praduktaŭ ź Biełarusi, kaža surazmoŭca, znajomy ź situacyjaj.
«Navat z ulikam taho, što nibyta zabarona nie tyčycca tranzitu, my budziem pierakonvać ludziej, kab jany ničoha nie brali z saboj, aproč asabistych rečaŭ. Heta ŭ ich ža intaresach, kab aŭtobus nie zatrymlivaŭsia na miažy», — miarkuje pieravozčyk.
Taksama mužčyna vykazaŭ zaściarohi nakont taho, što ciapier prajezd praź miažu budzie zajmać našmat bolš času, pakolki mytnikam daviadziecca bolš pilna praviarać bahaž kožnaha pasažyra.
Litoŭskija mytniki, jakija pracujuć niepasredna ŭ punktach propuska, jašče na vychodnych pačali raspaŭsiudžvać infarmacyju pra toje, što z 3 červienia nielha budzie ničoha vieźci ź Biełarusi. Adbyvałasia heta ŭ vusnaj formie. Papiaredžvali ŭ tym liku tych, chto 2 červienia viartaŭsia ź Litvy ŭ Biełaruś.
«Kali viartalisia ŭ Biełaruś, nas papiaredzili, što ciapier praź litoŭskuju miažu možna budzie pravozić tolki asabistyja rečy. Z taho, što dazvolać ź ježy — umoŭny buterbrod u kantejniery i butelku adkrytaj pitnoj vady. Taksama abiacali prybrać usie kantejniery, u jakija zvyčajna vykidajuć zabaronienaje. Navat pužali, što kali niechta pasprabuje pravieźci niešta, akramia buterbrodu i vady — viarnuć na biełaruski bok», — raspaviadaje padarožnik.
Čytaču «Našaj Nivy», jaki patelefanavaŭ u litoŭskuju mytniu, paćvierdzili, što zabarona na ŭvoz praduktaŭ ź Biełarusi tyčycca jak jurydyčnych, tak i fizičnych asob.
Što tyčycca sielhaspradukcyi, to vieźci nielha nie tolki sami pradukty, ale i nasieńnie, uhnajeńnie i pradukcyju dla apracoŭki.
Pradukty charčavańnia taksama pad zabaronaj, u tym liku lubyja cukierki, šakaład i šakaładnyja vyraby, kukuruznyja pałački, krupy i hetak dalej.
Što tyčycca lekaŭ, to čytaču paviedamili, što adzin čałaviek moža vieźci ź Biełarusi ŭ Litvu nie bolš za 10 upakovak lekaŭ, jak i raniej.
Kali leki, jakija viazuć ź Litvy ŭ Biełaruś, pradajucca ŭ Litvie tolki pa recepcie, to abaviazkova musić być recept. Tady litoŭskaja mytnia prapuścić ich.
U ideale recept musić być vypisany niepasredna na taho čałavieka, jaki pierasiakaje miažu. U advarotnym vypadku daviadziecca dakazać suviaź z tym čałaviekam, na imia jakoha vypisany recept, — patłumačyli čytaču ŭ litoŭskaj mytni.
Što z tranzitam?
Abmiežavańni na ŭvoz praduktaŭ biełaruskaj i rasijskaj vytvorčaści nie tyčacca tranzitu, ale kab skarystacca mahčymaściu pravieźci praź miažu ź Litvoj umoŭny lidski kvas i cukierki, treba budzie dakazać, što vy budziecie ŭ Litvie tolki tranzitam. Dla hetaha spatrebicca mieć kvitki na samalot abo broń u hateli ŭ inšaj krainie.
Što litoŭcy čaściej za ŭsio vieźli ź Biełarusi?
Šopinh u Biełarusi zaŭždy byŭ davoli papularnaj spravaj dla žycharoŭ Litvy. U asnoŭnym, kaniečnie, na zakupy ŭ našu krainu jeździli žychary pryhraničča. Praŭda, z zakryćciom čatyroch z šaści punktaŭ propusku na miažy ź Biełaruśsiu, kolkaść litoŭcaŭ, achvotnych jeździć u Biełaruś, skaraciłasia na 73%.
U Biełarusi susiedzi ŭ pieršuju čarhu kuplali aŭtamabilnaje paliva, cyharety, ałkahol, leki. Taksama papularnaściu zaŭždy karystalisia kukuruznyja pałački, kvas, cukierki, zhuščonka, krupy, dziciačaje charčavańnie.
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin13
Kamientary