Abrany prezident Donald Tramp u niadzielu paabiacaŭ «spynić transhiendarnaje varjactva» ŭ pieršy ž dzień svajho prezidenctva, bo respublikancy buduć kantralavać abiedźvie pałaty Kanhresa i Bieły dom, paviedamiŭ «Hołas Amieryki».
«Ja padpišu ŭkaz ab spynieńni seksualnaha kalečańnia dziaciej, admovie ad transhiendarnaj palityki ŭ armii, a taksama ŭ našych pačatkovych, siarednich i starejšych škołach», — zajaviŭ Tramp na mierapryjemstvie dla maładych kansiervataraŭ u Fieniksie, štat Aryzona.
Jon taksama paabiacaŭ «nie dapuskać mužčyn u žanočy sport», dadaŭšy, što «ŭrad Złučanych Štataŭ aficyjna budzie pryznavać tolki dva poły — mužčynski i žanočy».
Na minułym tydni, kali Kanhres, jaki kantralujuć respublikancy, uchvaliŭ štohadovy abaronny biudžet, u jaho było ŭklučana pałažeńnie, jakoje błakuje finansavańnie niekatorych vidaŭ dapamohi dzieciam transhiendarnych ludziej, jakija słužać u armii.
Vystupajučy na kanfierencyi AmericaFest, Tramp taksama paabiacaŭ žorstkija miery suprać «złačynnaści z boku mihrantaŭ» i paŭtaryŭ svaje abiacańni adnavić kantrol ZŠA nad Panamskim kanałam z-za vysokich taryfaŭ na prachod amierykanskich sudoŭ.
Prezident Panamy Chase Raul Mulina ŭ adkaz zajaviŭ, što «kožny mietr Panamskaha kanała naležyć Panamie i tak budzie». Suvierenitet i niezaležnaść krainy nie mohuć być pradmietam abmierkavańnia, dadaŭ Mulina.
U svajoj niadzielnaj pramovie Tramp vystupiŭ z prahramaj svajho druhoha prezidenckaha terminu, padvierhšy krytycy prezidenta Džo Bajdena i vice-prezidenta Kamału Charys.
«20 studzienia Złučanyja Štaty nazaŭsiody pierahornuć staronku čatyroch doŭhich, žudasnych hadoŭ niaŭdač, niekampietentnaści, nacyjanalnaha zaniapadu, i my adčynim novuju eru miru, kvitnieńnia i nacyjanalnaj vieličy, — skazaŭ Tramp. — Ja spyniu vajnu va Ukrainie. Ja spyniu chaos na Blizkim Uschodzie i praduchilu, abiacaju, Treciuju suśvietnuju vajnu», — zajaviŭ Tramp.
Pry administracyi Džo Bajdena ŭ kastryčniku 2021 hoda ŭ ZŠA ŭpieršyniu pačali vydavać amierykanskija pašparty z hiendarnym markieram «X».
Pašparty z takoj adznakaj pryznačany dla niebinarnych ludziej, interseks-ludziej i hiendarna-niekanformnych ludziej. Žychary Ńju-Jorka atrymali prava ŭkazvać u svaich asabistych dakumientach treci — «niavyznačany» poł, akramia mužčynskaha i žanočaha, u 2018 hodzie.
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova7
Kamientary