Turecki abituryjent pierabraŭ z technałohijami padčas śpisvańnia ekzamiena i trapiŭ u turmu
Detali vykarystanaha chłopcam «inavacyjnaha» mietadu apisała miascovaja palicyja.
Pavodle spravazdačy palicyi tureckaha horada Isparta (kala Antalii), na jakuju spasyłajecca vydańnie Daily Mail, adzin z abituryjentaŭ padčas zdačy «ekzamienu vyšejšych navučalnych ustanoŭ» (YKS, anałah biełaruskaha centralizavanaha ekzamienu) vykarystaŭ štučny intelekt i «šmat roznaj techniki», kab śpisać test, za što byŭ zatrymany.
Na aficyjnym videa palicyi Isparty supracoŭnik apisaŭ miechanizm śpisvańnia, jaki ładziŭ abituryjent pierad aryštam.
«Padčas TYT (Basic Proficiency Test, bazavy test na viedy), jaki źjaŭlajecca pieršym etapam ustupnaha ekzamienu va ŭniviersitet (YKS), arhanizavanaha ŭ Isparcie, u vyniku vobšuku, jaki my praviali ŭ abituryjenta, pavodziny i dziejańni jakoha byli padazronymi, była vyjaŭlenaja technika dla padmanu ekzamienataraŭ.
Nievialičkaja kamiera, schavanaja ŭ huziku kašuli, rabiła zdymki ekzamienacyjnych zadańniaŭ, maršrutyzatar u padešvie krasoŭka zabiaśpiečvaŭ internet-suviaź, a adkazy na pytańni abituryjent atrymlivaŭ ad ChatGPT apošniaj madeli praz maleńkuju słuchaŭku, schavanuju ŭ vuchu», — raskazvaje turecki palicyjant u videa.
Tureckija miedyja taksama adznačajuć, što akramia abituryjenta byŭ zatrymany i jahony pamočnik, jaki ŭdzielničaŭ u arhanizacyi miechanizma śpisvańnia testu, adnak jon byŭ vypuščany adrazu paśla dopytu.
A abituryjent, jakoha złavili za śpisvańnie, byŭ źmieščany ŭ turmu i ŭsio jašče zastajecca tam u čakańni suda.
Samu videaspravazdaču tureckaj palicyi z anhlijskimi subtytrami vy možacie pahladzieć nižej.
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda14
Kamientary