Płastykavaja butelka z vadoju na soncy vydzialaje taksiny. Voś što treba pra heta viedać
Vučonyja vyjavili novuju ryzyku ŭžyvańnia vady z płastykavych butelek.
Navukoŭcy ź Czinańskaha ŭniviersiteta (Kitaj) praanalizavali sumieś latučych arhaničnych rečyvaŭ (ŁAR), jakija vydzialajucca z šaści typaŭ płastykavych butelek z vadoj, kali jany stajać na soncy. Plaški z vadoju byli pryviezienyja z roznych krain (Kanada, Italija, Novaja Ziełandyja, Japonija i Kitaj).
Vyniki svajho daśledavańnia vučonyja apublikavali ŭ časopisie Eco-Environment & Health. Jak śćviardžajuć aŭtary, usie butelki pad uździejańniem sonca vydzialali ceły nabor vysokataksičnych latučych arhaničnych rečyvaŭ (ŁAR). Siarod ich i n-hieksadekan, jaki vyklikaje rak. Čym bolš praciahłym byŭ čas znachodžańnia butelek na soniečnym śviatle, tym vyšejšaj była kancentracyja škodnych rečyvaŭ.
Akramia hetaha vučonyja zaŭvažyli ŭpłyŭ składu vady na vychad ŁAR. Tak, minieralnaja vada pavialičvała ich vydzialeńnie, a hazavanaja zapavolvała.
«Vyniki dajuć pierakanaŭčyja dokazy taho, što płastykavyja butelki pad uździejańniem soniečnaha śviatła mohuć vyłučać taksičnyja złučeńni, jakija ŭjaŭlajuć niebiaśpieku dla zdaroŭja. Spažyŭcy pavinny viedać ab hetych ryzykach, asabliva va ŭmovach, kali vada ŭ plaškach padviarhajecca ŭździejańniu soniečnaha śviatła na praciahu doŭhaha času», — pišuć aŭtary.
Na dumku navukoŭcaŭ, razumieńnie taho, jak umovy navakolnaha asiarodździa mohuć upłyvać na vydzialeńnie chimičnyja rečyvaŭ u butylavanuju vadu, moža dapamahčy vytvorcam zabiaśpiečyć biaśpieku svajoj pradukcyi i zachavać zdaroŭje nasielnictva.
U toj ža čas jany adznačajuć, što ŭličvajučy nievialiki abjom adnoj płastykavaj butelki z vadoju, navat paśla praciahłaha ŭździejańnia soniečnaha śviatła vydzialeńni ŁAR buduć niaznačnymi. Tamu patencyjnyja ryzyki dla zdaroŭja, źviazanyja ź ich udychańniem pry adkryćci butelki i ŭžyvańni vady padajucca minimalnymi.
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi1
Kamientary