Stali viadomyja padrabiaznaści trahičnaj śmierci ministra Aŭramienki. Tut taksama śled KDB
Ministr transpartu i kamunikacyi Alaksiej Aŭramienka raptoŭna pamior 4 lipienia 2023 hoda. Nijakich padrabiaznaściaŭ trahiedyi dziaržaŭnyja ŚMI nie pryvodzili, tolki sam Alaksandr Łukašenka nazvaŭ čynoŭnika nie «pamierłym», a «zahinułym». Infarmavanyja surazmoŭcy «Našaj Nivy» raskazali akaličnaści taho, što zdaryłasia letam 2023 hoda.
Jak kažuć krynicy «Našaj Nivy», pry kancy žyćcia 46-hadovy Alaksiej Aŭramienka trapiŭ u pryceł orhanaŭ dziaržaŭnaj biaśpieki. Siłaviki padazravali, što ministr datyčny da machinacyj z pakazčykami pracy viedamstva.
«Sam Aŭramienka ličyŭ siabie sumlennym čałaviekam i z pretenzijami zhodny nie byŭ. Ja dumaju, što jon nie vytrymaŭ cisku i spyniŭsia na apošnim sposabie zachavać svajo dobraje imia i svabodu», — kaža naš surazmoŭca.
Znajomyja siamji pryvodziać padrabiaznaści taho, što adbyłosia.
«U haražy Aŭramienka vypiŭ techničnaj vadkaści dla achałodžvańnia ruchavika i straciŭ prytomnaść. Ale jaho cieła na padłozie vielmi chutka znajšoŭ adzin ź blizkich. Vyklikali chutkuju. Aŭramienku zavieźli ŭ balnicu i adkačali, časova viarnuli ŭ prytomnaść. Ale ŭnutranyja orhany ŭžo byli niezvarotna paškodžanyja. Aŭramienka jašče paśpieŭ patłumačyć, čamu sprabavaŭ zabić siabie. Ale nieŭzabavie pamior», — paviedamiła «Našaj Nivie» infarmavanaja krynica.
Alaksiej Aŭramienka byŭ ministram z 2019 hoda, a da taho pracavaŭ na roznych pasadach va ŭpraŭleńni transpartu i suviazi aparatu Savieta ministraŭ.
Alaksandr Łukašenka na cyrymoniju pachavańnia svajho ministra nie pryjechaŭ.
Aŭramienka staŭ druhim za karotki čas łukašenkaŭskim ministram, jaki ŭčyniŭ suicyd. U 2022 u svaim domie ŭ Drazdach, pa infarmacyi «Našaj Nivy», źvioŭ rachunki z žyćciom Uładzimir Makiej.
A tydzień tamu pajšoŭ z žyćcia pasoł u Hiermanii Dzianis Sidarenka. Jon nie vytrymaŭ dopytaŭ u KDB.
Ciapier čytajuć
Miunchienskaja pramova Vensa pra novuju palityku ZŠA i čakańni ad Jeŭropy — poŭny tekst28
Kamientary