Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant
Natalla Piatkievič — adzin z samych paznavalnych tvaraŭ biełaruskaj palityki 2000-ch. Znoŭ ubačyć jaje na viaršyni palityčnaha Alimpu ŭ pačatku 2020-ch — dziva dla analitykaŭ. Piatkievič jak kandydaturu na vysokija pasady nie ŭzhadvaŭ badaj nichto z ekśpiertaŭ. Tym nie mienš ad siońnia mienavita jana pieršaja namieśnica kiraŭnika Administracyi prezidenta.
«Naša Niva» ŭzhadvaje pakručastuju bijahrafiju Natalli Piatkievič.
Rasijskija karani
Baćka Natalli Piatkievič — stamatołah Uładzimir Kraŭčanka. Jon naradziŭsia ŭ Navasibirskaj vobłaści Rasii, ale paśla Druhoj suśvietnaj vajny siamja asieła ŭ Biełarusi.
Uładzimir Kraŭčanka zrabiŭ dobruju karjeru — jašče ŭ 1976-m jon uznačaliŭ tolki što stvoranuju 7-ju stamatałahičnuju palikliniku Minska, staŭšy samym maładym hałoŭnym doktaram u stalicy. Na pasadzie jon pratrymaŭsia kala 40 hadoŭ. Byŭ zaadno deputatam Minharsavieta, uznačalvaŭ praŭładny Biełaruski ruch miedycynskich rabotnikaŭ.
Va Uładzimira Kraŭčanki jość i minułaje ŭ šerahach siłavikoŭ — prynamsi padčas vybaraŭ u kancy 2010-ch jon traplaŭ u vybarčyja kamisii jak siabar Biełaruskaha sajuza aficeraŭ.
Maci Natalli Piatkievič była nastaŭnicaj.
Karjera ŭ Administracyi prezidenta
Hałoŭnaje miesca ŭ pracoŭnaj knižcy Natalli Piatkievič zajmaje Administracyja prezidenta. U 1994 jana, vypusknica jurydyčnaha fakulteta BDU, trapiła ŭ AP — i pratrymałasia na roznych pasadach 20 hadoŭ.
Spačatku pracavała viadučym śpiecyjalistam, zatym načalnikam upraŭleńnia dziaržaŭnaha i mižnarodnaha prava Hałoŭnaha dziaržaŭnaha pravavoha ŭpraŭleńnia.
U 2001-2004 Natalla Piatkievič była pres-sakratarom Alaksandra Łukašenki. Heta taja pasada, jakuju ŭ 2014 hodzie zaniała Natalla Ejsmant. Admietna, što ŭ pramiežak času pamiž imi ŭ Łukašenki nie było pres-sakratara — byli tolki kiraŭniki pres-słužby, status i ŭpłyŭ jakich byli istotna nižejšyja.
U 2004 hodzie Piatkievič stała namieśnicaj kiraŭnika Administracyi, adkazvała za ideałohiju.
Jana nie mieła nijakaha pijetetu da biełaruskaści, faktyčna źjaŭlałasia ŭvasableńniem reakcyjnaj linii, supraćstajała svajmu niepasrednamu kiraŭniku Uładzimiru Makieju. Ale mienavita joj u 2008 byli daručanyja pieramovy z amierykancami, jakija mieli vynikam pieršaje addaleńnie Biełarusi ad Rasii.
U 2009 hodzie pasada stała jašče vyšejšaj — pieršaja namieśnica kiraŭnika Administracyi. Piatkievič pratrymałasia da śniežnia 2010 hoda.
Nastupnaja pasada taksama farmalna ŭvachodziła ŭ struktury Administracyi prezidenta — Piatkievič pracavała pamočnicaj Łukašenki ŭ 2011-2014. Jana kantralavała dostup da cieła i pa-raniejšamu mieła vielizarny ŭpłyŭ.
Ciažka skazać, što pryviało da apały Natalli Piatkievič. Samy apošni skandał, u jaki jana ŭlapałasia pierad zvalnieńniem — rozyhryš prankiera Vavana. Heta ciapier jon vyhladaje štatnym supracoŭnikam rasijskaha FSB, a tady byŭ prosta internet-žartaŭnikom. Pad vyhladam syna Viktara Janukoviča Vavan źviazaŭsia z Łukašenkam — naŭprost praź jaho pamočnicu, hołas jakoj byŭ nadzvyčaj padobny da hołasu Piatkievič.
Žyćcio paśla palityki
Niejki čas Natalla Piatkievič pabyła biez raboty, a paśla ŭładkavałasia da miljaniera Alaksandra Šakucina. Jon padbiraŭ usich źbitych namienkłaturnych lotčykaŭ, spadziejučysia karystacca ich raniejšymi kantaktami. Praź jaho chołdynh «Amkador» prachodzili i byłyja pamočniki Łukašenki, i byłyja siłaviki — jakaja-nijakaja niapylnaja praca znachodziłasia ŭsim.
Natalli Piatkievič delehavali raźvićcio prajekta «Šanter» — heta turystyčny biznes, u jaki ŭvachodzili haścinicy, azdaraŭlenčyja centry, palaŭničyja ŭhodździ.
Niekalki hadoŭ Piatkievič papracavała ŭ Šakucina, a paśla źjechała žyć u ZŠA, choć i znachodziłasia pad amierykanskimi sankcyjami. Jak tak vyjšła? Spačatku treba raskazać pra asabistaje žyćcio čynoŭnicy.
Try šluby
Pieršym mužam Natalli Kraŭčanki staŭ Uładzisłaŭ Piatkievič. Heta adzin z hałoŭnych łatarejščykaŭ Biełarusi, jaki ad pačatku 2000-ch uznačalvaŭ RUP «Nacyjanalnyja spartyŭnyja łatarei».
Druhi muž — telefunkcyjanier Alaksandr Martynienka. Jon byŭ viadučym, paśla daros da pasady namieśnika staršyni Biełteleradyjokampanii, a paśla pierabraŭsia ŭ Biełahraprambank.
A voś treci muž — Valancin Rybakoŭ. Jon, uradženiec rasijskaha Tomska, zrabiŭ u Biełarusi dypłamatyčnuju karjeru. Byŭ i pamočnikam Alaksandra Łukašenki (2006-2013), i namieśnikam ministra zamiežnych spraŭ (2013-2017).
U 2017 Rybakova pryznačyli pradstaŭnikom Biełarusi pry AAN, jon pierajechaŭ u Ńju-Jork. Praz hod dypłamat pabraŭsia šlubam z Natallaj Piatkievič, i jana pierajechała da muža ŭ ZŠA — zastajučysia pad sankcyjami. Farmalna ŭ jaje isnujuć abmiežavańni na pierasoŭvańnie pa krainie.
Ad pieršaha šlubu ŭ Natalli Piatkievič jość syn Filip. Jon pajšoŭ jaje šlacham, skončyŭ jurydyčny fakultet BDU. Razam z maci jon pierabraŭsia ŭ ZŠA.
«Filip Piatkievič — juryst ź licenzijaj advakata ŭ Ńju-Jorku, jaki śpiecyjalizujecca na karparatyŭnym i finansavym pravie, a taksama sankcyjnym rehulavańni, — rekłamujucca jaho pasłuhi. — Jon paśpiachova stvaryŭ chiedž– i vienčurnyja fondy na sumu bolš za $50 miljonaŭ».
Filip viadzie ruskamoŭny telehram-kanał pra kryptavalutu. Praŭda, padpisčykaŭ niašmat, usiaho 170 čałaviek.
Darečy, syna Valancina Rybakova ad pieršaha šlubu kličuć hetaksama — Filip.
Susiedzi pa Drazdach
Natalla Piatkievič nie tolki pracavała razam z budučym mužam u Administracyi prezidenta, ale jany jašče i byli susiedziami. I Piatkievič, i Rybakoŭ trapili ŭ pryzyŭ łukašenkaŭskich čynoŭnikaŭ, jakim razdavali ziamielnyja nadzieły ŭ Drazdach.
Ciapier u Piatkievič dvuchpaviarchovy cahlany dom na vulicy Pakroŭskaj. Ahulnaja płošča składaje kala 350 m2.
Pa infarmacyi «Biełpoła», u spadčynu ad baćki joj dastalisia trochpakajoŭka płoščaj 90 m2 na vulicy Prytyckaha ŭ Minsku, a taksama pamiaškańnie salaryja ŭ «Słavianskim kvartale» na praśpiekcie Pieramožcaŭ i haraž na vulicy Chałturyna.
Valancin Rybakoŭ padzialiŭ sa svaim synam Filipam svoj katedž u Drazdach pa vulicy Cichaj. Ahulnaja płošča doma — kala 630 m2.
Aproč taho, Filip Rybakoŭ nabyŭ sabie dźvie kvatery: płoščaj 90 m2 u «Majaku Minska» i 67 m2 na praśpiekcie Pieramožcaŭ kala «Alimpik-Areny». A ad babuli-dziaduli pa matčynaj linii jamu dastałasia pałova trochpakajoŭki na vulicy Jakuba Kołasa.
U Filipa Piatkieviča nieruchomaści ŭ Minsku niama.
Kamientary