«Łajkaŭ dopisy z Pucinym». Ukrainski NAK suprać udziełu ŭ Alimpijadzie biełaruskaha čempijona Tokia-2021 Ivana Litvinoviča
A taksama jašče čatyroch atletaŭ ź Biełarusi.
Va ŭkrainskim alimpijskim viedamstvie znajšli dokazy dačynieńnia šerahu biełaruskich alimpijcaŭ, čyj vystup MAK uchvaliŭ u niejtralnaj jakaści, da siłavych struktur Biełarusi, abo śviedčańni padtrymki ŭłady pa ŭkrainskim pytańni.
NAK Ukrainy aficyjna źviarnuŭsia da MAKa nie dapuskać da ŭdziełu ŭ Alimpijadzie batutysta Ivana Litvinoviča, jaki byŭ adzinym biełaruskim załatym miedalistam u 2021-m, bronzavaha pryziora ČS-2024 Anastasiju Škurdaj, a taksama tchekvandysta Hieorhija Hurcyjeva, strałka Darju Čuprys i viełasipiedystku Hannu Cierach.
Naprykład, Ivanu Litvinoviču zakidvajuć zakliki biełarusaŭ hałasavać na refierendumie 27 lutaha 2022 hoda, udzieł u prapahandysckim mierapryjemstvie razam ź Viktaram Łukašenkam — prezidentam Nacyjanalnaha alimpijskaha kamiteta Biełarusi, a taksama toje, što łajkaŭ dopisy z Pucinym i praŭładnaj lohkaatletkaj Mirončyk-Ivanovaj.
Płyŭčysie Anastasii Škurdaj zakidajuć udzieł u mierapryjemstvie sa staršynioj Bresckaha abłasnoha vykanaŭčaha kamiteta Juryjem Šulejkam.
Darja Čuprys źjaŭlajecca členam spartyŭnaha kamiteta Uzbrojenych sił Respubliki Biełaruś i źjaŭlajecca taksama, pavodle ŭkrainskaha NAK, vajskoŭcam i lubić fatahrafavacca ź biełaruskimi vajskoŭcami.
Raniej paviedamlałasia, što Mižnarodny alimpijski kamitet nakiravaŭ zaprašeńni 23 biełaruskim spartsmienam. Siamiora ź ich — piaciora bajcoŭ i tenisistki Viktoryja Azaranka i Aryna Sabalenka — admovilisia ŭdzielničać u Alimpijskich hulniach.
Alimpijada projdzie ŭ Paryžy z 26 lipienia pa 11 žniŭnia.
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»19
Kamientary