Skłali na asnovie źviestak ad navukoŭcaŭ top azior, jakija vyłučajucca svajoj čyścinioj. Pra mnohija ź ich vy i nie viedali, a heta sapraŭdnyja smarahdy biełaruskaj pryrody.
U Biełarusi, jakaja ličycca aziornym krajem, prazrystaściu svajoj vady mohuć pachvalicca šmat jakija. Daśledčyki z hieahrafičnaha fakulteta BDU na praciahu bolš čym dva dziasiatki hadoŭ pravodziać daśledavańni azior Biełarusi. Pry hetym vymiarajuć i ich prazrystaść u letni pieryjad (lipień-žnivień). Pryvodzim šeść azior, jakija pa hetamu pakazčyku znachodziacca siarod lidaraŭ.
Voziera Biełaje Połacki rajon
Kaardynaty 55°37′20″, 28°37′46″
Voziera znachodzicca za 14 kiłamietrach ad Połacka siarod pahorkaŭ, parosłych lesam, maje płošču kala 100 hiektaraŭ i maksimalnuju hłybiniu 19,6 mietraŭ. Z hłybinioj zaŭvažna źmianiajecca i tempieratura vady. Kali na pavierchni jana 22 hradusy, to kala dna składaje ŭsiaho 8.
Letam 2022 hoda vučonyja zafiksavali ŭ Biełym najbolšuju prazrystaść vady (da 6,5 mietraŭ). I heta na 2,3 mietry bolš, čym 20 hadoŭ tamu.
Voziera źjaŭlajecca papularnym miescam adpačynku.
Voziera Hłybokaje Połacki rajon
Kaardynaty 55°41′36″, 29°27′06″
Druhoje pa prazrystaści voziera Biełarusi znachodzicca ŭ samaj hłušečy, za 47 kiłamietraŭ na paŭnočny-ŭschod ad Połacka na terytoryi aziornaha zakaźnika «Hłybokaje — Vialikaje Astravita» (pra druhoje voziera my raskažam nižej).
Voziera Hłybokaje moža pachvalicca prazrystaściu da 6 mietraŭ. Ale amal 50 hadoŭ tamu, u 1977 hodzie jano było rekardsmienam pa hetamu pakazčyku (9,5 mietraŭ!). Voziera maje płošču 42 hiektary i maksimalnuju hłybiniu 11,5 mietraŭ. Dziakujučy prazrystaści vady i jaje čyścini Hłybokaje nabyło papularnaść u biełaruskich dajvieraŭ.
Voziera Ilhinija Miadzielski rajon
Kaardynaty 54°54′43″, 26°49′48″
Treciaje miesca pa prazrystaści z pakazčykam 4,6 mietraŭ zaniało voziera Ilhinija, jakoje znachodzicca ŭ Miadzielskim rajonie za 33 kiłamietry na paŭnočny-zachad ad hetaha rajcentra ŭ zakaźniku «Błakitnyja aziory». Jano maje zusim nievialikuju płošču 8 hiektaraŭ. Ale pry hetym hłybinia voziera dasiahaje 15,6 mietraŭ.
Vakoł voziera — malaŭničaja miascovaść, jakuju z-za składanaha reljefu nazyvajuć Biełaruskaj Šviejcaryjaj.
Ilhinija raźmiaščajecca ŭ hłybokaj upadzinie i spuskacca da jaho daviadziecca ź vialikaj aściarožnaściu trymajučysia za drevy. Vada ŭ voziery letam dobra prahravajecca, ale jano nie ŭparadkavana dla turystaŭ.
Voziera Biełaje Łuniniecki rajon
Kaardynaty 52°22′59″, 26°38′37″
Prazrystaść voziera Biełaje, što znachodzicca za 17 kiłamietraŭ na paŭnočny zachad ad Łuninca, składaje 4 mietry. Pry hetym jaho maksimalnaja hłybinia — 17 mietraŭ. Voziera zajmaje kala 23 hiektaraŭ i znachodzicca ŭ pieravažna raŭninnaj miascovaści, jakaja pakrytaja hustym lesam.
Na bierazie voziera raźmieščany dziciačyja azdaraŭlenčyja łahiery. A samo jano ŭvachodzić u zakaźnik «Łuninski», što abmiažoŭvaje jaho vykarystańnie ŭ rekreacyjnych metach. Naprykład, na adnym miescy možna pastavić nie bolš za 6 pałatak, u jakich budzie raźmieščana nie bolš za 20 čałaviek. Možna palić kastry, ale nielha vysiakać kusty i drevy.
Vialikaje Astravita Połacki rajon
Kaardynaty 55°41′36″, 29°31′58″
Voziera Vialikaje Astravita znachodzicca za 50 kiłamietrach na paŭnočny-ŭschod ad Połacka na terytoryi zakaźnika kala samaj rasijska-biełaruskaj miažy.
Płošča voziera składaje 48 hiektaraŭ, a maksimalnaja hłybinia — 6 mietraŭ. Prazrystaść vady — 3,5 mietra. Voziera znachodzicca na miascovaści, jakaja pakryta ŭzhorkami parosłymi lesam. Schiły voziera krutyja, vyšynioj miescami da 11 mietraŭ. Tolki na poŭdni jany pakatyja i nizkija. Ale tut da voziera padychodzić častka suchoha vierchavinnaha bałota.
Voziera znachodzicca ŭ słaba asvojenaj i addalenaj ad nasielenych punktaŭ miascovaści. Dziakujučy hetamu skład jaho vady vielmi blizki da naturalnaha.
Voziera Śviciaź Navahrudski / Karelicki rajony
Kaardynaty 53°26′29″, 25°55′00″
Voziera Śviciaź pa svajoj płoščy 224 hiektary pieraŭzychodzić usie pieraličanyja aziory. U apošnija dziesiacihodździ jano pieratvaryłasia ŭ sapraŭdnuju mieku dla adpačynku, što nie mahło nie adbicca na prazrystaści. Kali dvaccać hadoŭ tamu jana składała 7 mietraŭ, to ciapier — tolki 2,7 mietra.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary