U Vašynhtonie adbyłosia ŭračystaje adkryćcio jubilejnaha samita NATO. Prezident Bajden vystupiŭ z pryvitalnaj pramovaj na śviatkavańni 75-hodździa NATO, paviedamlaje «Hołas Amieryki».
Aŭdytoryja Endru Miełona — histaryčnaja zała ŭ nieakłasičnym styli na 750 miescaŭ, raźmieščanaja ŭ tak zvanym Fiederalnym trykutniku, kudy ŭvachodziać jašče 9 bujnych haradskich i fiederalnych ofisnych budynkaŭ stalicy ZŠA. Padpisańnie Paŭnočnaatłantyčnaj damovy, jakaja zasnavała NATO, adbyłosia mienavita tut 4 krasavika 1949 hoda.
U svajoj pryvitalnaj pramovie kiraŭnik Biełaha Doma padrabiazna spyniŭsia na dasiahnieńniach i na novych vyklikach dla Paŭnočnaatłantyčnaha aljansu.
«Mnie pryjemna prymać vas u hety znamianalny hod, z honaram aziracca na ŭsio, čaho my dasiahnuli, i hladzieć u našu ahulnuju budučyniu ź siłaj i rašučaściu, — skazaŭ Bajden. — Siońnia NATO macniejšaje, čym kali-niebudź».
Vystupleńniu Bajdena papiaredničali kadry histaryčnych interviencyj NATO, zvaroty prezidentaŭ ZŠA da sajuźnikaŭ i emacyjnyja cytaty pra značeńnie słova «dobry siabar».
«Razam my adnavili Jeŭropu z ruin vajny, vysoka trymali pachodniu svabody na praciahu doŭhich dziesiacihodździaŭ chałodnaj vajny. Byłyja praciŭniki stali našymi tavaryšami pa demakratyi, — skazaŭ Bajden. — Kali na Bałkanach pačałasia vajna, my ŭmiašalisia, kab adnavić mir i spynić etničnyja čystki».
Bajden nahadaŭ, što kali 11 vieraśnia 2001 hoda byŭ ździejśnieny napad na ZŠA, to ŭsie sajuźniki pa NATO padtrymali Amieryku, upieršyniu ŭ historyi NATO vykarystaŭšy artykuł 5 Damovy ab kalektyŭnaj biaśpiecy i pryznaŭšy napad na Złučanyja Štaty — napadam na ŭsich členaŭ aljansu.
«Siońnia NATO macniejšaje, čym kali-niebudź. Na praciahu mnohich hadoŭ Finlandyja i Šviecyja byli našymi bližejšymi partniorami. Ciapier jany vyrašyli aficyjna dałučycca da NATO. Z hetaj pryčyny siła i značeńnie artykuła 5 NATO — uzraśli», — padkreśliŭ amierykanski prezident.
Bajden padrabiazna spyniŭsia na temie rasijskaj ahresii suprać Ukrainy.
«U Jeŭropie praciahvajecca ahresiŭnaja vajna Pucina suprać Ukrainy. I Pucin choča ni bolš ni mienš, jak poŭnaha padparadkavańnia Ukrainy, choča pakłaści kaniec ukrainskaj demakratyi, źniščyć ukrainskuju kulturu i ścierci Ukrainu ź ziamli.
Jon nie spynicca na Ukrainie, nie pamylajciesia. Ukraina moža spynić i jana spynić Pucina», — zajaviŭ kiraŭnik Biełaha doma.
Prezident ZŠA nahadaŭ: «Razam my stvaryli hłabalnuju kaalicyju, kab supraćstajać Rasii, dali značnuju humanitarnuju dapamohu, i razam my padali Ukrainie dastatkova, kab abaranić jaje i siabie: bajavyja braniravanyja mašyny, sistemy SPA, rakiety vialikaha radyusu dziejańnia i miljony adzinak bojeprypasaŭ».
«Pieravažnaja bolšaść amierykancaŭ razumiejuć, što NATO harantuje biaśpieku dla nas usich. Toj fakt, što abiedźvie partyi — Respublikanskaja i Demakratyčnaja — pradstaŭleny tut siońnia, źjaŭlajecca śviedčańniem hetaha, — skazaŭ Džo Bajden. —
Amierykanski narod viedaje, što ŭvieś prahres, dasiahnuty nami za apošnija 75 hadoŭ, adbyŭsia pad abaronaj NATO. I amierykanski narod razumieje, što adbyłosia b, kali b u Jeŭropie nie było amierykanskich vojskaŭ».
Adrazu paśla vystupleńnia Džo Bajden uručyŭ prezidencki miedal Svabody hienieralnamu sakrataru NATO Jensu Stołtenbierhu.
«Vy kiravali hetym aljansam u adzin z samych važnych pieryjadaŭ u jaho historyi … vy adkłali svaje siamiejnyja płany, kali pačałasia rasijskaja vajna va Ukrainie… siońnia NATA macniej i enierhičniej. I ludzi pa ŭsioj Jeŭropie i Paŭnočnaj Amierycy ŭ budučyni pažnuć plon vašaj pracy», — zajaviŭ prezident Złučanych Štataŭ.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu7
Kamientary