Navukoŭcy ź Biełarusi i ZŠA praviali paśpiachovy ekśpierymient pa źniščeńni rakavych kletak
Novy ekśpierymient z kulturami rakavych kletak adkryvaje novy šlach baraćby z zachvorvańniem. Mižnarodnaja hrupa daśledčykaŭ ź Biełarusi i ZŠA vynajšła sposab vybaračna źniščać złajakasnyja kletki znutry.
«Nacelvańnie na adzinkavuju kletku źjaŭlajecca adnym z najbolš važnych pieravah nanamiedycyny, i naš padychod abiacaje, što zmoža dasiahnuć efiektu, łakalizavanaha ŭnutry asobnaj kletki, — kaža viadučy daśledčyk hetaha prajekta Dźmitryj Łapotka. — Ideja zaklučajecca ŭ tym, kab lačyć niezdarovyja kletki na rańniaj stadyi chvaroby, da momantu, kali jana pačynie prahresavać, a stan zdaroŭja čałavieka mocna pahoršycca».
Jašče ŭ minułym hodzie Dźmitryj i jahonyja kalehi z Łabaratoryi łazernych cytatechnałohij Instytuta ciepła‑ i masaabmiena NAN Biełarusi ŭstanavili, što nanačaścicy zołata, jakija płavajuć u bijałahičnym asiarodździ, pry apramieńvańni jarkim łazeram z peŭnymi paramietrami, imhnienna stvarajuć vakoł siabie raspalenyja burbałki paru, nazvanyja navukoŭcami «nanaburbałki». Jak paviedamili navukoŭcy ŭ svaim pres‑relizie na sajcie amierykanskaha univiersiteta Rice, pry peŭnych naładkach hetyja nanaburbałki mahli efiektyŭna razburać kletki.
U novym ekśpierymiencie na rakavych kletkach daśledčyki pakazali, što pry adnym uzroŭni apramieńvańnia załatyja nanačaścicy stvarajuć uspyški, dastatkova jarkija, kab ich možna było zdymać na videa praź mikraskop, a pra roście mahutnaści łazera tyja ž čaścicy źniščajuć znojdzienyja kletki.
Hetuju dvaistuju rolu załatych nanačaścic navukoŭcy ź Biełarusi i ZŠA nazvali theranostics process (terapija + dyjahnostyka) Jany vyprabavali hety mietad na lejkiemičnych i rakavych kletkach hałavy i šyi, nazvaŭšy jaho efiektyŭnym.
Daśledvańni dastupnyja ŭ on‑łajn režymie ŭ časopisie Nanotechnology .
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary