Temp padzieńnia zołatavalutnych reziervaŭ u studzieni akazaŭsia bolšy, čym siaredniemiesiačny letašni.
Mižnarodnyja reziervavyja aktyvy Biełarusi, raźličanyja pavodle standartaŭ MVF, skaracilisia ŭ studzieni na $379 młn (6,7%). Na 1 lutaha jany skłali $5273 młn proci $5652 młn na pačatak hoda.
Takija źviestki apublikavaŭ Biełstat.
Heta vysoki pakazčyk jak dla studzienia — miesiaca, kali ekanamičnaja dziejnaść ścišajecca.
Za 2009 hod zołatavalutnyja reziervy Biełarusi pabolšali na $2,5 młrd. Adnak heta adbyłosia tolki dziakujučy aktyŭnym zapazyčvańniam na zamiežnych rynkach. Kredyty i dachody ad pryvatyzacyi, jakija byli zaličany ŭ skład ZVR, skłali bolš za $5,5 młrd. Bieź ich uliku zołatavalutnyja zapasy skaračalisia letaś u tempie kala $250 młn u miesiac. Takim čynam,
temp padzieńnia ZVR u studzieni bolšy, čym siaredniemiesiačny letašni.
La paraŭnańnia: za studzień 2009 hoda zołatavalutnyja reziervy Biełarusi skaracilisia na 132 młn dołaraŭ, niahledziačy na pastupleńnie tady pieršaha tranšu kredytu MVF u pamiery 788 młn dołaraŭ. Z ulikam srodkaŭ MVF, što pastupili, realnaje źnižeńnie zołatavalutnych reziervaŭ u studzieni 2009 hoda skłała 919,7 młn dalaraŭ. Takaja vysokaja ličba tłumačyłasia panikaj na finansavym rynku paśla raptoŭnaj devalvacyi rubla z 2 studzienia.
Skaračeńnie valutnych reziervaŭ vyklikana deficytam biahučaha rachunku. Kraina ŭvozić bolš pradukcyi, čym vyvozić. Spažyvaje bolš, čym vyrablaje.
Nie varta čakać palapšeńnia situacyi paśla adnaŭleńnia pastavak nafty ŭ Mazyr i Navapołack. U vyniku taho, što adhetul Biełaruś vymušana budzie płacić myty za naftu, pradukcyja ź jakoj paśla reekspartujecca.
Pavodle acenak Mižnarodnaha valutnaha fondu, sioleta Biełarusi budzie treba $5 młrd zamiežnaha finansavańnia, na častku jakoha kraina jašče nie damoviłasia.
Kamientary