«Sa mnoj usio prosta i biaspłatna». Adšukali biełarusaŭ, jakija, jak Duraŭ, chočuć dzialicca śpiermaj i pakidać šmat naščadkaŭ
Historyja pra toje, što Pavieł Duraŭ byŭ donaram śpiermy i maje bolš za 100 dziaciej, šmat kaho ŭraziła. «Naša Niva» pahladzieła, ci isnujuć takija vałanciory ŭ Biełarusi (spojler: ich chapaje), a taksama vyśvietliła, kolki ž biełarus moža zarabić na svaim bijałahičnym materyjale.
Pačniom z płatnych varyjantaŭ. Pieršaje, što prapanoŭvaje huhł, — klinika «Jeva». Zdać svaju śpiermu tut mohuć mužčyny va ŭzroście ad 18 da 35 hadoŭ. Patencyjnamu donaru nieabchodna nie tolki prynieści vypiski ad roznych daktaroŭ i prajści miedycynskaje abśledavańnie, ale i pakazać daviedku z MUS ab adsutnaści sudzimaści. Paznačana, što maksimalna mahčymaja suma ŭznaharodžańnia — 500 rubloŭ.
U RNPC «Maci i dzicia» hatovy brać donarami śpiermy mužčyn da 40 hadoŭ. I daviedku z MUS tut nie prosiać. Pamier uznaharodžańnia za mužčynskija pałavyja kletki tut anałahičny — da 500 rubloŭ.
Pa zapycie «stać donaram śpiermy Minsk» huhł prapanoŭvaje sajt mužčyny ź Minska, jaki hatovy padzialicca svaim bijałahičnym materyjałam biaspłatna.
Mužčynu zavuć Dzianis, i jon piša pra toje, što čałaviek u hetym žyćci moža vydzialicca dvuma sposabami: «Pieršy — heta ŭpisać siabie ŭ historyju. Dla hetaha treba naradzicca vialikim navukoŭcam, piśmieńnikam, akcioram ci paetam. Bolšaści ludziej pa plačy druhi sposab. Prosta pakinuć naščadkaŭ».
U jakaści prykładu jon pryvodzić Valancinu Chramych ź vioski Znamienskaje Lipieckaj vobłaści Rasii, jakaja naradziła dvanaccać synoŭ i vosiem dačok.
Dzianis śćviardžaje, što, kab spaznać matčynaje ščaście, usie srodki dobryja: «Pa statystycy 40% ludziej nie znachodziać kachańnie ŭ svaim žyćci, ale heta nie značyć, što treba stavić kryž na funkcyi praciahu rodu. Heta važny prajekt u žyćci kožnaha čałavieka, i ŭsie da hetaha pryjduć, jak kažuć, saśpiejuć. Možna, kaniešnie, źviarnucca ŭ śpiecyjalizavanuju miedycynskuju ŭstanovu, ale tam absłuhoŭvajuć ludziej, jakija znachodziacca ŭ aficyjnych adnosinach, i heta doraha. Sa mnoj usio našmat praściej i biaspłatna».
A voś jak mužčyna ŭjaŭlaje sabie mahčymy varyjant donarskaj dapamohi: «Pryjazdžaju ŭ vaš horad padčas avulacyi i zasialajusia ŭ hateli. Sustrakajemsia ŭ numary i kamunikujem. Asabisty kantakt vielmi važny ŭ hetym pytańni. Kali ŭsich usio zadavalniaje, to prystupajem da dziejańniaŭ. Vy vychodzicie ŭ kalidor i čakajecie kala 10 chvilin, u hety čas ja zdabyvaju materyjał. Potym zaprašaju ŭ numar i vy ŭvodzicie jaho ŭ siabie. Heta treba zrabić jak maha chutčej, pakul materyjał ciopły. Ranicaj my paŭtarajem praceduru».
Na sajcie Dzianis śćviardžaje, što maje troch svaich dziaciej — navat jość asobnaja ŭkładka «Maje dzieci», ale dva z troch fota ŭziaty ź internetu.
Žurnalistka «Našaj Nivy» źviazałasia ź Dzianisam pad vyhladam žančyny, jakaja šukaje donara śpiermy. Jon paćvierdziŭ, što, pakul jahony sajt isnuje ŭ internecie, prapanova aktualnaja. Taksama mužčyna zapeŭniŭ, što donaram jon hatovy być na vałanciorskaj asnovie.
Dzianisu 40 hadoŭ. Kažučy pra matyvacyju rašeńnia dzialicca bijałahičnym materyjałam, jon rastłumačyŭ, što byŭ žanaty, ale šlub nie pa jaho inicyjatyvie raspaŭsia. U šlubie ŭ Dzianisa dziaciej nie było, bo jon ich nie chacieŭ. A paśla razvodu vyrašyŭ vypravić situacyju. I ciapier, jak śćviardžaje mužčyna, u jaho jak u donara jość užo try dziciaci.
Na całkam łahičnaje pytańnie, ci nie baicca jon, što niejkaja žančyna paśla taho, jak zaciažaryć ad jaho, pačnie patrabavać alimienty na dzicia, Dzianis adkazaŭ:
— Ja nie suprać alimientaŭ. Alimienty — heta samaje małoje, što mužčyna moža dać dziciaci. Žančyna ŭ pieršuju čarhu naradžaje dla siabie. Ad alimientaŭ jašče nichto nie padnimaŭsia.
Kolki ž usiaho dziaciej jon choča začać, Dzianis pakul nie vyrašyŭ.
Va «UKantakcie» isnuje supołka «Donary śpiermy Minsk». Tam taksama možna pasprabavać znajści taho, chto padzielicca svaim bijałahičnym materyjałam.
Jość mužčyny z roznych haradoŭ Biełarusi. Voś, naprykład: «Mahu stać donaram śpiermy, lubyja pravierki, chłopiec 23 hady, rost 200, vaha 95, simpatyčny, niama prablem sa zdaroŭjem, zajmajusia sportam hadoŭ 5, ałkahol nie ŭžyvaju naohuł, sa škodnych zvyčak vejp i toje redka. Dziaciej niama. Pisać u luby čas. Brest. Hatovy pryjechać u inšy horad na niekalki dzion (hrafik pracy sam sabie vyznačaju)».
Adzin z donaraŭ, raskazvajučy pra siabie, paviedamlaje: «Adčuvaju, jak z 23 hadoŭ chaču dziaciej i NIE chaču być mužam ci siemjaninam u zvykłym razumieńni. Chaču pakinuć paśla siabie jak maha bolš zdarovych uśviadomlenych dziaciej (užo jość)». Jon ža piša, što dla jaho hałoŭnaja apłata — heta abmien enierhijaj.
Donaraŭ śpiermy, jakija padychodziać da pytańnia surjozna, vidać adrazu. Jany i vyniki analizaŭ vykładvajuć na svaich staronkach, i imknucca ŭrazić patencyjnuju maci faktami sa svajho žyćcia. Voś, naprykład: «U minułym aktyŭna zajmaŭsia: šašłyki, spartyŭnaja himnastyka, parkur, aŭtahonki. Maralna i fizična mocny». Umieńnie rabić šašłyki — heta, viadoma, važki arhumient dla začaćcia.
Cikava, što niekatoryja donary ličać važnym padkreślić, što achryščany ŭ pravasłaŭi. I šmat chto robić akcent na tym, što «zaŭsiody adčuvaŭ ciahu tolki da žančyn». Pry hetym, mužčyny pišuć, što hatovy dapamahčy «stać mamaj i tatam ci mamaj i mamaj».
Jość u supołcy i varyjanty dla biełarusak u Jeŭropie. Adzin z donaraŭ piša, što maje vizu i časta byvaje ŭ Jeŭrasajuzie, tamu hatovy tam sustrecca i abmierkavać pytańnie.
Ale, imavierna, najbolš surjozna ŭsio ž nastrojeny toj donar, jaki dla avatara sfatahrafavaŭsia z dypłomam u rukach na fonie čyrvona-zialonaha ściaha ŭ Akademii kiravańnia.
Siarod entuzijastaŭ, jakija prapanujuć biełaruskam svoj bijałahičny materyjał, chapaje i mužčyn z Rasii. Naprykład, Barys z Navasibirska (miž inšym, fanat vajny i ideałohii ruskaha nacyjanalnaha adzinstva) z entuzijazmam abiacaje biaspłatna dapamahčy adčuć ščaście maciarynstva lubym mietadam. Svaju dziejnaść mužčyna nazyvaje donarskaj misijaj. Piša, što čaściej za ŭsio žančyny naradžajuć ad jaho dziaŭčynak.
Da rekłamy samoha siabie Barys padyšoŭ z usioj adkaznaściu: «Pieršapačatkova prytrymlivajusia zdarovaha ładu žyćcia, suprać vakcynacyi, donar kryvi. U rodzie doŭhažychary. Vyhladaju na 10-15 hadoŭ maładziejšym. Vyšejšaja techničnaja adukacyja z adznakaj. Harmanična raźvitaja asoba. Ruskaje dvaranskaje pachodžańnie. Zajmajusia fizičnaj kulturaj i dyjetałohijaj».
Barys zapeŭnivaje, što hatovy pryjechać u luby horad ci viosku. Žurnalistka «Našaj Nivy» pacikaviłasia ŭ jaho, ci prylacić jon sa svajho Navasibirska ŭ stalicu Biełarusi. Vykanaŭca donarskaj misii adkazaŭ, što z radaściu pryjedzie i dapamoža začać dzicia.
Jašče adno miesca zboru donaraŭ-vałancioraŭ — śpiecyjalny sajt dla znajomstvaŭ dziela začaćcia «Dziciaci być», dzie chapaje ankiet biełarusaŭ. Pra jaho «Naša Niva» pisała raniej.
Kamientary