«Pačućciu humaru i pryhažości dziciaci buduć zajzdrościć vašy siabroŭki i čužyja dzieci». Jak ja šukała donara, kab zaciažaryć
Na admysłovym sajcie aŭtarka «Našaj Nivy» zarehistravałasia dziela ekśpierymientu. I nie čakała, što joj napiša stolki mužčyn. Ale pa paradku.
U internecie daŭno isnuje śpiecyjalny sajt dla znajomstvaŭ dziela začaćcia «Dziciaci być». Jon prapanoŭvaje takuju kancepcyju: pošuk partniora abo partniorki — abmierkavańnie ŭsich aśpiektaŭ budučych adnosin — abśledavańnie i kansultacyja ŭ klinicy — płanavańnie i naradžeńnie dziciaci.
Kali zapaŭniaješ ankietu, treba paznačyć, što mienavita ty šukaješ na sajcie: prosta donara śpiermy, čałavieka dla sumiesnaha baćkoŭstva (heta značyć, što bijałahičny baćka budzie brać udzieł u žyćci dziciaci) abo mužčynu, jaki aproč usiaho inšaha hatovy zaklučyć i aficyjny šlub.
Ankiet biełaruskich mužčyn na sajcie bolš za sotniu.
Rehistrujusia.
«Pačućciu humaru, pryhažości i kiemlivaści dziciaci buduć zajzdrościć vašyja siabroŭki i čužyja dzieci»
Asobnyja ankiety ździŭlajuć svajoj naiŭnaściu: naprykład, 61-hadovy mužčyna (u ankiecie paznačana, što dziaciej u jaho niama) piša, što maryć dapamahčy pryhožaj maładoj dziaŭčynie zaciažaryć tolki naturalnym šlacham.
Niechta padychodzić da samarekłamy maksimalna pa-dziełavomu: «Davajcie supracoŭničać. Mahčymy vyjezd u rehijony». Chtości sprabuje kreatyvić (časam dziŭna): «Pačućciu humaru, pryhažości i kiemlivaści dziciaci buduć zajzdrościć vašy siabroŭki i čužyja dzieci». A niechta čamuści pościć statusy z VK, jakija byli papularnymi hadoŭ z 10-15 nazad: «Dla kahości dźvie pałoski — heta žach. A dla kahości — mara…»
Chapaje tych, chto adrazu ŭ ankiecie tłumačyć svaju matyvacyju padzialicca bijałahičnym materyjałam.
Naprykład, F. piša, što ažaniŭsia z žančynaj ź dziciom, vychoŭvaje dziaŭčynku jak svaju dačku, ale ŭsio adno choča mieć rodnaje dzicia (razhladaje tolki varyjant sumiesnaha baćkoŭstva).
M. — hiej, tamu prapanuje pasiabravać dziela ahulnaha dziciaci: «Moža być, dobry siabar lepš, čym prosta mužyk u chacie? A kachańnie i inšaje zaŭsiody možna znajści dadatkova».
B. adrazu infarmuje, što ŭ razvodzie i ŭžo maje dvuch dziaciej: «Chaču pakinuć paśla siabie bolš dziaciej, mahu ich zabiaśpiečyć. Ale biez stvareńnia siamji. Ja lublu samotnaść, adsutnaść šumu i absalutnuju svabodu dziejańniaŭ, svoj hnutki hrafik. I ŭsio heta zusim nie viažacca ź siamiejnym žyćciom».
A. taksama ŭ razvodzie, maje dvuch dziaciej, ale žadaje mieć bolej. Kaža, što jamu padabajecca bavić čas ź dziećmi i čamuści ich navučać. Sumiesnaje baćkoŭstva jamu zdajecca idealnym varyjantam. Paznačaje: «Paluboŭnicu dakładna nie šukaju, tamu źniešnija danyja nie majuć značeńnia».
V. žyvie razam z byłoj žonkaj, kab być pobač sa svaimi dziećmi, ale choča jašče raz stać baćkam. Byłaja žonka dapamahać u hetym pytańni nie žadaje.
A N. adrazu paznačaje, što maje žonku dy dvuch dziaciej i šukaje žančynu, jakaja zachoča stać jaho druhoj žonkaj i budzie dobra stavicca da jaho dzietak (i narodzić jašče).
R. jašče ŭ ankiecie pačynaje z pretenzij: «Žančyny! Nichto nie budzie siadzieć na hetym sajcie, majučy vyniki analizaŭ. Kali spatrebicca, tady i pajdu ŭ kliniku» (spojler: potym šmat mužčyn buduć prapanoŭvać dasłać mnie svaje analizy).
U. pastaviŭ na avatar fota maleńkaj dziaŭčynki — zdajecca, svajoj dački. Mabyć, dumaje, što heta dla jaho dobraja rekłama.
U chutkim časie na maju poštu pačynajuć litaralna sypacca paviedamleńni…
Kab mieć mahčymaść na hetym sajcie pisać pieršaj, treba apłacić aktyŭny status. Bieź jaho ty možaš tolki adkazvać tym, chto piša tabie. Ja pačynajuć chvalavacca — ci prajavić chtości cikavaść da majoj napaŭpustoj ankiety? Ale daremna.
U chutkim časie na maju poštu pačynajuć litaralna sypacca paviedamleńni, u jakich mužčyny raspaviadajuć nie tolki pra svaje źniešnija danyja, ład žyćcia i ŭzrovień IQ, ale i jakaść śpiermy. Naprykład, S. adrazu ŭdakładniaje: «Śpiermahrama ŭ normie, kolkaść śpiermatazoidaŭ u 4-5 razoŭ vyšejšaja za minimalnuju kolkaść normy».
Ad takoj kolkaści achvotnych apładnić mianie mužčyn pačynaje krychu kružycca hałava. Vyrašaju napisać tamu samamu S. Baču pa ankiecie: u jaho jość žonka i dačka. Pa-pieršaje, sprabuju daviedacca pra matyvacyju mužčyny, a taksama ci viedaje žonka pra jaho rašeńnie (naŭrad ci šmat žančyn žadajuć apynucca ŭ centry takoj siamiejnaj dramy).
S. adkazvaje spakojna, i jahony łahičny cynizm krychu biantežyć: tak, žanaty. Vyśvietliłasia, što ŭ žonki jość davoli ciažkaje hienietyčnaje zachvorvańnie, jakoje tearetyčna mahło pieradacca i ich dačce. S. padkreślivaje, što dačku vielmi lubić i ŭ składanaj situacyi (kali takaja zdarycca) nie kinie, ale choča na ŭsialaki vypadak mieć jašče bijałahičnych dziaciej — biez emacyjnaj pryviazki da ich i jakoha-niebudź udziełu ŭ ich žyćci. Tearetyčna hatovy abmiarkoŭvać pytańnie znajomstva z novymi dziećmi paśla ich paŭnalećcia.
S. udakładniaje: kali b płanavaŭ sumiesnaje baćkoŭstva, to pradjaŭlaŭ by značna bolšyja patrabavańni i da patencyjnaj maci, i da vychavańnia dziciaci ŭ budučyni. Ale ž i tak pytajecca pra maju pracu i toje, jak ja płanuju zabiaśpiečvać dzicia chacia b da troch hadoŭ, kali jano zmoža chadzić u sadočak.
Hatovy pradstavić usie svaje analizy za apošnija 5 hadoŭ. Uzamien prosić pakazać jamu «bijachimiju kryvi chacia b za hod, ahulny analiz kryvi, hlukozu, analiz mačy, VIČ, hiepatyty V, S plus analizy na chvaroby, jakija pieradajucca pałavym šlacham».
«S Biełoruśsijej u nas žie bieźviz»
Ździŭlajusia tamu, što aktyŭna pišuć mnie i mužčyny ź inšych krain — asabliva časta z Rasii. Ł. cikavicca, ci zhodnaja ja bačyć jaho donaram (i tolki donaram), kali jon pryjedzie z Maskvy ŭ Minsk padčas majoj avulacyi. Kaža, što takaja kamandziroŭka nie prablema, bo «s Biełoruśsijej u nas žie bieźviz». Rastłumačyŭ by mužčynie chto, što z «Biełoruśsijej» jaho šancy začać dzicia ŭ Biełarusi imkliva nabližajucca da nula, ale ja nie budu.
Jašče adzin maskvič pužaje mianie amal u pieršym paviedamleńni. Abiacaje dapamahčy z začaćciem z «pazityŭnym i sumlennym padychodam» — i smajlik. Udakładniaje: «Čamu darmova? Tamu što na žyćcio ja zarablaju inšym miescam». Udakładniaje ŭzrovień vałodańnia anhlijskaj movaj, kolery svaich dypłomaŭ (čyrvony i sini), a taksama toje, što ŭ jaho jość siamihadovy syn.
Samomu Ł. «32 hodziki» — heta dasłoŭna. Pryjarytet — štučnaja insieminacyja, ale mahčymy i naturalny varyjant — pry ŭzajemnaj simpatyi i poŭnym prachodžańni miedycynskaha abśledavańnia. Nie viedaju, jak inšych žančyn, ale mianie naściarožvajuć 32-hadovyja «chłopčyki». Ł. nie zdajecca dziela našaha budučaha dziciaci i, nie atrymaŭšy adkaz, potym jašče šmat razoŭ šle mnie «???».
V. nie hatovy jechać da mianie ŭ Minsk, ale z radaściu dapamoža mnie ź bijałahičnym materyjałam, kali ja sama pryjedu ŭ Maskvu: «Možacie pakinuć mianie ŭ jakaści zapasnoha varyjantu, kali nie znojdziecie kahości bližej».
B. z Rasii piša pra siabie, što jon vysoki, pryhožy i zhrabny, zajmajecca płavańniem. Maje dvuch dziaciej, adzin ź jakich byŭ začaty šlacham štučnaj insieminacyi ŭ chatnich umovach. Zdajecca, nie biez honaru adznačaje, što adbyłosia heta ź pieršaj sproby. Na pytańnie pra matyvacyju adkazvaje ramantyčna: pa-pieršaje, choča, kab jaho hieny žyli ŭ novym čałavieku, pa-druhoje, ličyć, što kožny maje prava na ščaście być baćkam. Jon hatovy dapamahać žančynam, jakija z peŭnych pryčyn (niama partniora, biaspłodździe muža, leśbijskaja siamja) nie mohuć vyrašyć pytańnie samastojna. Abiacaje nikoli nie źjaŭlacca ŭ žyćci dziciaci.
Piacidziesiacihadovy A. z Maskvy, naadvarot, razhladaje tolki varyjant sumiesnaha baćkoŭstva. Jon vielmi choča prymać udzieł u žyćci dziciaci i hatovy rehularna pryjazdžać z Maskvy, kab bavić čas razam z małym.
Damova pamiž baćkami
Na sajcie jość i prykład damovy, jakuju mohuć zaklučyć pamiž saboj patencyjnyja baćki. Varta adznačyć, što źmiest dakumienta i jaho jurydyčnuju siłu treba ŭsio ž taki abmiarkoŭvać z advakatam.
Ale jość niamała važnych punktaŭ, jakija prapanujecca abmierkavać da pieršych sprob začaćcia.
Naprykład, ci budzie ŭpisana imia baćki ŭ paśviedčańnie ab naradžeńni dziciaci, ci budzie mužčyna bačycca ź dziciem i prymać u tym liku finansavy ŭdzieł u jaho žyćci, a taksama, što budzie rabić para, kali ŭ pracesie ciažarnaści ci ŭžo paśla rodaŭ vyśvietlicca, što ŭ dziciaci jość ciažkaje zachvorvańnie.
Sudziać hiendyrektara BiełAZa. Pahražaje da 15 hadoŭ8
Kamientary