Eks-staršynia Sajuzu piśmieńnikaŭ Volha Ipatava vystupiła ź inicyjatyvaj zboru hrošaj, kab raźličycca z uładami pa zapazyčanaści za arendu budynka Doma litaratara
Eks-staršynia Sajuzu piśmieńnikaŭ Volha Ipatava vystupiła ź inicyjatyvaj zboru hrošaj, kab raźličycca z uładami pa zapazyčanaści za arendu budynka Doma litaratara.
«Naša Niva»: Raskažycie padrabiaźniej pra inicyjatyvu zboru srodkaŭ, ź jakoj Vy vystupili na piśmieńnickaj naradzie.
Volha Ipatava: Dom litaratara staŭ siońnia symbalem movy, kultury, litaratury, urešcie, supracivu tatalitarnaj uładzie. Nam nielha adtul sychodzić ni ŭ jakim razie. Navat možna było b abjavić u Domie litaratara načnoje dziažurstva. Chaj tady piśmieńnikaŭ, jakija ŭvajšli va ŭsie encyklapedyi, vynosić AMON.
U sieradu ŭ nas budzie Rada, my źbiaremsia a 10-j, budziem vieści razmovu pra toje, kab nie pakidać budynak.
«NN»: A ci niemahčyma praviadzieńnia Rady raniej, bo ŭ sieradu ŭžo pryjduć sudovyja vykanaŭcy?
Volha Ipatava: Za dva dni Radu sabrać my nia zmožam, bo ludzi znachodziacca ŭ vioskach, a treba, kab byŭ kvorum. Urešcie, takija pytańni vyrašajucca za dziesiać chvilinaŭ, bo dalej adstupać užo niama kudy.
«NN»: Na Vaš pohlad Rada padtrymaje takuju inicyjatyvu?
Volha Ipatava: Dumaju, što tak. Sabrać takija hrošy samastojna Sajuz nia zmoža, bo ŭžo zaraz niamała litarataraŭ znachodziacca na miažy vyžyvańnia, kormiačysia tolki za košt ułasnych sotak u viosak. Piśmieńnikaŭ pazbavili amal usich mahčymaściaŭ svabodna zarablać hrošy.
«NN»: Ci mahčyma sabrać patrebnuju sumu - 55 miljonaŭ rubloŭ?
Volha Ipatava: Kaniečnie! Ja dumaju, što hramadzkaść užo pakazvała svaju salidarnaść, kali abaraniała «Našu Nivu» i «Narodnuju volu», Humanitarny licej. Takija akcyi, što niamała važna, hrupujuć i hartujuć hramadzkaść. Urešcie, padobnym čynam i pomniki ŭźnikajuć: Łarysie Hienijuš u Zelvie, Jaŭhienu Kuliku, Jazepu Drazdoviču ŭ vioscy Laplany. Ludzi ŭ Lidzie, niahledziačy ni na što, abaraniajuć kryž u honar ksiandza, udzielnika paŭstańnia 1863 h. Falkoŭskaha. Takija prykłady možna doŭžyć. Ja vieru ŭ cudy čałaviečaha duchu.
«NN»: Jakuju dapamohu Vy čakajecie ad Alaksandra Milinkieviča?
Volha Ipatava: My budziem radyja luboj dapamozie. Prynamsi, heta sprava nia tolki Sajuza. Nam niezaležnamu hramadztvu patrebna abaraniać adzin adnoha i trymacca razam.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary