Bujnoha minskaha biznesmiena, jaki zajmaŭsia vyrabami sa škła, pasadzili za palityku

Ramanu Hrycalu 48 hadoŭ. Pa źviestkach Digital Intelligence Team, rodam jon ź vioski Razdolnaje Prymorskaha kraju Rasii, ale daŭno žyvie ŭ Biełarusi i maje biełaruskaje hramadzianstva. Skončyŭ Biełaruski dziaržaŭny ekanamičny ŭniviersitet.

Paśla ŭniviersiteta pajšoŭ u biznes. Bolš za dziesiać hadoŭ, z 2003 hoda, jon pracavaŭ dyrektaram biełaruska-amierykanskaha Zavoda škłopakietaŭ i architekturnaha škła (GlassBel). Heta pradpryjemstva zajmałasia vyrabami sa škła dla architektury, budaŭnictva, prajektnym dyzajnam, rašeńniami dla transparta i inšym.

Naprykład, technałohija, raspracavanaja na pradpryjemstvie, lahła ŭ asnovu stvareńnia škłopakietaŭ dla ašklanieńnia rasijskaha marskoha fłotu. A ŭ 2007-m Raman atrymaŭ hramatu na konkursie «Za najlepšaje dasiahnieńnie ŭ budaŭničaj halinie» za toje, što na zavodzie naładzili vytvorčaść škłopakietaŭ z padahrevam.

U 2008 hodzie Raman atrymaŭ premiju «Pradprymalnik hoda» jak adzin z najlepšych pradprymalnikaŭ-eksparcioraŭ — kala 80% pradukcyi zavoda išło na ekspart, u asnoŭnym u Rasiju i Ukrainu. U toj ža hod jaje atrymali i Viktar Babaryka ź Biełhazprambankam u katehoryi «Najlepšy bank dla pradprymalnikaŭ».

Pavialičyć

Z 2013 hoda Raman staŭ dyrektaram Zavoda supraćpažarnych vyrabaŭ. Jon vyrablaje supraćpažarnyja kanstrukcyi z vykarystańniem škła — dźviery, vokny, pieraharodki, leśvicy i inšaje.

Da aryštu ŭ 2024-m Hrycal byŭ dyrektaram firmy «Hłas Inžynirynh» i jaje filijała ŭ Rasii, firmy «Sovtransmaš», taksama maje IP. Uvieś biznes pa toj ža temie — ašklanieńnie, prajektavańnie i mantaž kanstrukcyj sa škłom dla kvateraŭ, budynkaŭ i transparta.

U mužčyny jość žonka i dvoje dziaciej — paŭnaletniaja dačka i niepaŭnaletni syn. Žonka zajmajecca biznesam razam ź im.

Data zatrymańnia Hrycala nieviadomaja, ale apošni raz jon niešta pisaŭ u čatach u telehramie ŭ lipieni 2024 hoda. Byŭ zatrymany nie paźniej za vosień 2024 hoda. 

Sud nad im pačaŭsia 6 sakavika 2025 hoda. Jamu zakidali dva artykuły — «raspalvańnie varožaści» (č. 1 art. 130 KK) i «arhanizacyja abo ŭdzieł u dziejańniach, što hruba parušajuć hramadski paradak» (č. 1 art. 342 KK). Ramanu pahražała da piaci hadoŭ kałonii, ale sutnaść abvinavačańnia nieviadomaja.

Biznesmienu prysudzili chimiju z nakiravańniem ci kałoniju. Adnak pakolki Raman paśla suda tak nie ŭvajšoŭ u sacsietki i miesiendžary, a ŭ telehramie byŭ «vielmi daŭno», možna mierkavać, što jamu dali termin u kałonii.

• 5
• 1
• 2
• 5
• 4
• 6
• 20
• 0