Biełaruś naraściła siły VPS i vojskaŭ SPA na miažy z Ukrainaj — kamandujučy
Biełaruś naraściła siły VPS i vojskaŭ SPA, zadziejničanyja dla niasieńnia bajavoha dziažurstva na miažy z Ukrainaj, raspavioŭ STB kamandujučy VPS i SPA US Biełarusi Andrej Łukjanovič. Taksama jon śćviardžaje, što NATA rychtujecca da vajny ź Biełaruśsiu i Rasijaj.
![](http://nashaniva.com/img/w840d4webp1/photos/z_2024_08/-uzk7f.jpg.webp)
U intervju STB Andrej Łukjanovič paćvierdziŭ słovy Łukašenki pra ŭzmacnieńnie vajskovaj hrupoŭki na miažy z Ukrainaj.
«Užo ŭzmocniena hrupoŭka. Jana datyčycca i avijacyi, i zienitna-rakietnych vojskaŭ, i radyjotechničnych vojskaŭ. Heta značyć hrupoŭku značna naraścili, i ŭ sapraŭdny momant jana niasie dziažurstva na paŭdniovych rubiažach našaj krainy», — skazaŭ Łukjanovič.
Pavodle jaho słoŭ, na Zachadzie idzie padrychtoŭka da adkrytaha supraćstajańnia suprać Biełarusi i Rasii.
Łukjanovič śćviardžaje, što za tydzień fiksujecca 30-40 palotaŭ raźviedvalnaj avijacyi krain NATA.
«Idzie pastaŭka sučasnych udarnych uzoraŭ uzbrajeńnia vajskovaj śpiecyjalnaj techniki ŭ Polšču. Heta amierykanskaj vytvorčaści i paŭdniovakarejskaj. Tanki «Abrams», tanki «K-2», «Čornaja pantera». I taksama ŭ bližejšych płanach u Polščy atrymać ad Złučanych Štataŭ Amieryki 32 samaloty F-35 i 96 viertalotaŭ, bajavych viertalotaŭ udarnych, heta «Apačy». Ad Polščy nie adstajuć krainy Bałtyi. Jany taksama zaraz madernizujuć svaju infrastrukturu i płanujuć zakupku i pastaŭki reaktyŭnaj sistemy załpavaha dnia «Chajmars», — skazaŭ jon.
Taksama jon raspavioŭ, što Biełaruś čakaje pastaŭki avijacyi.
«Prachodzić paetapnaja madernizacyja i abnaŭleńnie avijacyjnaj techniki. Uviesnu my atrymali čarhovuju partyju viertalotaŭ Mi-35M. Taksama ŭ nas u płanach u pačatku hoda jašče atrymańnie dźviuch partyj avijacyjnaj techniki. Heta viertaloty Mi-35 i jašče adnaho źviana samalotaŭ Su-30SM2», — skazaŭ jon.
Alaksandr Łukašenka ŭ intervju rasijskim prapahandystam zajaviŭ, što US Biełarusi raźmiaścili na miažy z Ukrainaj amal tracinu biełaruskaha vojska.
Ale pradstaŭnik dziaržaŭnaj pahransłužby Ukrainy Andrej Dziemčanka zajaviŭ, što situacyja na miažy ź Biełaruśsiu zastajecca bieź źmienaŭ, a słovy Łukašenki nie adpaviadajuć rečaisnaści.
Kamientary