Duda ab vyzvaleńni Pačobuta: Ja baču simptomy pieramien, my značna bližejšyja

Hetyja słovy Andžeja Dudy prahučali ŭ intervju Kanału Zero, pieradaje reform.news.

Jon raskazaŭ ab abmienie źniavolenymi, jaki adbyŭsia pamiž Rasijaj i zachodnimi krainami.

«My nie ŭdzielničali ŭ hetych pieramovach. Heta praŭda. Hetyja pieramovy viali amierykancy. Mienavita amierykancy razmaŭlali z Rasijaj. Mienavita jany viali hetyja pieramovy z samaha pačatku. Voś što ja mahu skazać z hetaj nahody.

Hetaja nievialikaja adliha ŭ płanie vyzvaleńnia źniavolenych taksama nastupiła paśla majho viartańnia z Kitaja. My roznymi sposabami, nie z učarašniaha dnia, damahajemsia vyzvaleńnia Andžeja Pačobuta. Roznymi sposabami. My nie zabyvajemsia na hetuju spravu, my imkniemsia da jaje.

My mahli b pasprabavać zabłakavać hety abmien špijonami. (…) Tamu što polskija ŭłady daviedalisia pra heta ŭ apošni momant. (…) Da nas, jak da sajuźnikaŭ, byŭ źviernuty zaklik, kab abmien adbyŭsia. Było pryniataje ciažkaje rašeńnie. Premjer-ministr pavinien byŭ pryniać hetaje rašeńnie, jon papiarednie pahavaryŭ sa mnoj. Ja razumieju, što heta było ciažkaje rašeńnie. Ja nie admaŭlaju hetaha rašeńnia».

Duda raskazaŭ pra situacyju z Andžejem Pačobutam i mahčymyja šlachi vychadu ź jaje. Pa słovach polskaha lidara, jon nie viedaje, jak pastaviŭsia b Andžej Pačobut da mahčymaści być abmianianym na rasijskich špijonaŭ.

«Adnak ja chaču vas zapeŭnić, što my pracujem nad spravaj Andreja Pačobuta. U mianie nie było mahčymaści parazmaŭlać z Andžejem Pačobutam pra hetuju spravu.

Niekalki hadoŭ tamu my prapanoŭvali roznyja varyjanty jahonaha vyzvaleńnia z turmy, pakolki jon pravioŭ u turmie šmat hadoŭ, jon nie pahadziŭsia na niekatoryja rašeńni, jakija my prapanoŭvali. Heta była praŭda na toj momant. Ja nie viedaju, ci chacieŭ by jon, kab jaho abmianiali na špijonaŭ, nie majučy mahčymaści viarnucca ŭ Biełaruś, biez mahčymaści, takim čynam, być sa svajoj siamjoj. Biez mahčymaści być narmalnym hramadzianinam.

My taksama ličym, što jon byŭ aryštavany niezakonna, što jon utrymlivajecca pad vartaj niezakonna, što jon nievinavaty, svabodny, sumlenny čałaviek. Tamu jaho śviatoje prava — vyjści z hetaj turmy i mieć mahčymaść pierasoŭvacca pa Biełarusi, dzie jamu padabajecca, jak volny čałaviek, jak hramadzianin Biełarusi.

Jon — hramadzianin Biełarusi. Jon padkreślivaŭ heta šmat razoŭ — ja hramadzianin Biełarusi. Tak, ja palak, heta majo pachodžańnie, heta maja kroŭ, heta maje hieny. Heta maja spadčyna — polskaść. Ale ja naradziŭsia ŭ Biełarusi, ja hramadzianin Biełarusi, ja znachodžusia na svajoj radzimie», — skazaŭ Duda.

«Času na pieramovy nie było. Kali b abmien zabłakavali i vyśvietliłasia, što heta było suprać voli Andžeja Pačobuta, u nas uźnikła b vielmi surjoznaja prablema», — dadaŭ jon.

Kažučy pra šancy na vyzvaleńnie Pačobuta, palityk zajaviŭ, što bačyć u pieramovach ź biełaruskim bokam «simptomy pieramien».

«Ja dumaju, što my značna bližejšyja. My nie na paŭkroki bližejšyja. (…) My dziejničajem vielmi aktyŭna, i ja baču simptomy pieramien na druhim baku. (…) My značna bližejšyja», — zajaviŭ jon.

Nahadajem, u lutym 2023 hoda Pačobuta pryhavaryli da 8 hadoŭ kałonii ŭzmocnienaha režymu. Praces prachodziŭ u zakrytym režymie. Žurnalista pryznali vinavatym u raspalvańni varožaści i zaklikach da sankcyj. Viarchoŭny sud pakinuŭ prysud bieź źmieny.

1 žniŭnia ŭ Ankary adbyŭsia najbujniejšy z časoŭ Chałodnaj vajny abmien rasijskimi i zachodnimi źniavolenymi. U apieracyi pa abmienie ŭdzielničali 24 źniavolenyja z ZŠA, Hiermanii, Polščy, Słavienii, Narviehii, Rasii i Biełarusi, a taksama dvoje dziaciej. Rasija vyzvaliła amierykancaŭ Evana Hierškoviča i Poła Uiłana, žurnalistku Ałsu Kurmašavu, palityka Uładzimira Kara-Murzu, dvuch hramadzian Hiermanii, u tym liku Ryka Kryhiera, asudžanaha da śmiarotnaha pakarańnia ŭ Biełarusi, a taksama šerah rasijskich palitviaźniaŭ. ZŠA i sajuźniki pieradali Rasii Vadzima Krasikava, asudžanaha za zabojstva ŭ Hiermanii, a taksama šerah asob, jakija abvinavačvajucca ŭ špijanažy.

U polskim MZS zajaŭlali, što pieramovy ab vyzvaleńni palitviaźnia žurnalista Andžeja Pačobuta viaducca naŭprost ź Biełaruśsiu. Kiraŭnica Sajuza palakaŭ Anžalika Borys, jakaja ŭviesnu mieła mahčymaść sustrecca z Pačobutam, kazała, što toj byŭ hatovy źjechać ź Biełarusi.

• 2
• 0
• 1
• 1
• 0
• 0
• 1
• 0