Pra pajezdki troch dačok kiraŭnika Čačni stała viadoma z bazy pierasiačeńnia miežaŭ, piša «Ahienstvo».
Dočki Ramzana Kadyrava Karyna, Tabaryk i Chiedzi Kadyrava jeździli ŭ Jeŭropu pad inšym proźviščam.
U 2017 hodzie — da taho času ich baćka ŭžo byŭ pad sankcyjami ES — jany lotali ŭ Paryž na biznes-džecie Kadyrava Airbus ACJ319. Usiaho na borcie, zhodna z uciečkaj, byŭ jak minimum 21 čałaviek.
Karyna, Tabaryk i Chiedzi vykarystoŭvali pašparty na proźvišča Musajeva. Pry hetym u dakumientach u ich było imia pa baćku Ramzanovna i sapraŭdnyja daty naradžeńnia. Usie try pašparty, jakija vykarystoŭvali dočki Kadyrava, da hetaha času ličacca jak dziejsnyja.
Tady ž na borcie była Facima Chazujeva, druhaja žonka Kadyrava. U Paryž lotała i dačka Chazujevaj Ašura, jakaja vykarystoŭvała dakumienty z proźviščam maci. Kadyraŭ nazyvaje jaje dačkoj pieršaj žonki Miedni, a z paviedamleńniaŭ čačenskich uładaŭ vynikaje, što jana nosić proźvišča kiraŭnika Čačni.
Na borcie taksama byŭ načalnik Centra haspadarčaha i servisnaha zabieśpiačeńnia MUS Čačni Raman Sulejmanaŭ, a taksama aficer SACHR «Cierak» Masvar Adałajeŭ — ich Kadyraŭ nazyvaŭ «darahimi bratami».
Jašče adna dačka Kadyrava Ajšat kiruje modnym domam Firdaws, jaki pravodziŭ pakazy ŭ tym liku ŭ Paryžy. Toj ža biznes-džet jak minimum adnojčy, u 2020 hodzie, lotaŭ u francuzskuju stalicu ŭ dzień pakazu Firdaws.
Ramzan Kadyraŭ trapiŭ pad jeŭrapiejskija sankcyi jašče ŭ 2014 hodzie, u 2017-m jaho ŭklučyli ŭ sankcyjny śpis ZŠA. U 2022 hodzie pad jeŭrapiejskija sankcyi taksama trapili jahonyja dočki Ajšat i Karyna, a ZŠA ŭviali sankcyi i suprać jahonych troch žonak — Miedni Kadyravaj, Facimy Chazujevaj, Aminat Achmadavaj, a taksama Firdaws. U 2023 hodzie amierykanskija sankcyi ŭviali suprać maci Kadyrava Ajmani, u 2024 hodzie jana trapiła i pad sankcyi ES.
Ciapier čytajuć
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary