Jak zamianić biełaruskaje paśviedčańnie kiroŭcy na polskaje ci litoŭskaje
Tłumačym, što treba dla zamieny biełaruskaha paśviedčańnia kiroŭcy, kamu heta nieabchodna rabić i kolki heta kaštuje.
Kali i čamu varta mianiać paśviedčańnie kiroŭcy
Nieabchodnaść zamianiać biełaruskija paśviedčańni kiroŭcy na polskija ci litoŭskija nastupaje paśla taho, jak čałaviek praviadzie ŭ krainie bolš za 185 dzion zapar. U vypadkach, kali biełaruski kiroŭca maje časovy DNŽ, z vyznačeńniem terminaŭ znachodžańnia ŭ krainie šmat błytaniny.
Ale kali dazvoł na žycharstva pastajanny, to ciaham šaści miesiacaŭ biełaruski kiroŭca abaviazany źmianić paśviedčańnie na miascovaje.
Polšča. Dastatkova sabrać dakumienty
Patreba zamianić biełaruskija pravy na polskija moža ŭźniknuć nie tolki pa pryčynie atrymańnia pastajannaha DNŽ. Z 16 červienia 2024 hoda ŭsie kiroŭcy, jakija zajmajucca pasažyrskimi pieravozkami, pavinny mieć miascovaje paśviedčańnie. Patrabavańnie raspaŭsiudžvajecca ŭ tym liku na taksistaŭ, jakija pracujuć praz servisy kštałtu Uber, Bolt.
Kab zamianić paśviedčańnie na polskaje, kiroŭcu treba mieć daviedku ź biełaruskaj DAI ab niepazbaŭleńni pravoŭ. Kaštuje jana 25 rubloŭ, vydajuć jaje, jak praviła, na nastupny dzień paśla padačy zajaŭki. Atrymać jaje možna jak samastojna, tak i pa davieranaści.
Toj, chto nie choča jechać pa daviedku ŭ Biełaruś, moža zrabić heta praz konsulstva abo pasolstva. Konsulski zbor składaje 50 jeŭra (kala 180 rubloŭ). Minimalny viadomy nam termin, praź jaki čałaviek zmoh atrymać daviedku takim čynam, składaje try tydni.
Biełarusam, jakija majuć status uciekača abo znachodziacca pad dadatkovaj abaronaj, źviartacca ŭ konsulskija ŭstanovy zabaroniena, tamu ad ich takuju daviedku nie patrabujuć.
Zapytvać daviedku ab niepazbaŭleńni pravoŭ polskija ŭžondy mohuć samastojna. Ale, jak pakazvaje praktyka, budzie našmat praściej i chutčej, kali vy zrobicie jaje samastojna.
Aproč daviedki z DAI, treba zrabić pierakład paśviedčańnia kiroŭcy i samoj daviedki z DAI. Pierakład abychodzicca ŭ 120-150 złotych (kala 30-35 jeŭra).
Z usim pakietam dakumientaŭ i pierakładami treba źviartacca ŭ miascovy ŭžond.
Za vydaču paśviedčańnia kiroŭcy treba zapłacić jašče 100 złotych (kala 25 jeŭra).
U zaležnaści ad vajavodstva, polski «płastyk» možna atrymać jak praź dziesiać dzion, tak i tolki praz try miesiacy paśla padačy.
Kali vam vydajuć polskaje paśviedčańnie kiroŭcy, to biełaruskaje zabirajuć. Pa zmoŭčańni, novyja pravy buduć mieć taki ž samy termin dziejańnia, jaki mieli biełaruskija.
Kali vy chočacie atrymać paśviedčańnie adrazu na dziesiać hadoŭ, to treba prajści ŭ Polščy miedkamisiju.
Litva. Biez ekzamienaŭ nie abyścisia
U adroźnieńnie ad Polščy, prosta zamianić biełaruskaje paśviedčańnie na litoŭskaje nie atrymajecca. Ale i nijakich daviedak ad biełaruskaj DAI nie treba.
Spačatku treba prajści kursy akazańnia pieršaj miedycynskaj dapamohi, a taksama miedycynskuju kamisiju. Kursy i ispyt pa pieršaj miedycynskaj dapamozie kaštujuć 20 jeŭra (kala 70 rubloŭ), mieddaviedka — 35 jeŭra (kala 120 rubloŭ).
Pierakład biełaruskaha paśviedčańnia na litoŭskuju kaštuje kala 10 jeŭra (35 rubloŭ).
Z usim hetym možna iści zdavać tearetyčny ispyt, apłaciŭšy 10 jeŭra (kala 35 rubloŭ). Tearetyčnuju častku ŭ Litvie možna zdavać na litoŭskaj, ruskaj abo anhlijskaj movach.
Zdača praktyčnaj častki abydziecca ŭ 41 jeŭra (kala 140 rubloŭ). Z praktyčnym ekzamienam — jak pašancuje. Kali ekzamienatar vałodaje ruskaj, to i praktyčny ekzamien možna zdavać pa-rusku. Kali nie, to daviadziecca brać z saboj «pierakładčyka». Im moža być absalutna luby čałaviek, jaki vałodaje litoŭskaj.
Sam «płastyk» kaštuje 15 jeŭra (kala 50 rubloŭ). Novy dakumient budzie hatovy praz 15 dzion. Paskoranaja vydača (ciaham troch dzion) kaštuje 23 jeŭra. Za terminovuju vydaču (ciaham 1 pracoŭnaha dnia) treba zapłacić 37 jeŭra.
Pakolki ŭ Litvie vy faktyčna nanova zdajacie na pravy, litoŭskaje paśviedčańnie vydajuć na 10 hadoŭ niezaležna ad taho, kali musili skončycca biełaruskija pravy.
Ale ŭ hrafie, dzie paznačana pieršaja data atrymańnia katehoryi, paznačać datu jaje adkryćcia ŭ Biełarusi. To-bok biełaruski staž vałodańnia pravami ŭ Litvie ŭličvajecca. Pry hetym, jak i ŭ Polščy, pry vydačy litoŭskaha paśviedčańnia biełaruskaje zabirajuć.
Kali termin dziejańnia pravoŭ kiroŭcy skončyŭsia padčas pražyvańnia ŭ Litvie, ich možna pamianiać na praciahu hoda z momantu prybyćcia ŭ Litvu.
Zamianić biełaruskaje paśviedčańnie kiroŭcy mohuć tolki tyja biełarusy, jakija pražyli ŭ Litvie bolš za 185 dzion.
Kamientary
A bez propiski nie primut zajawlenie), i jesze mnogo czego nado sdelat. Google w pomosz))
I daviedka patrebnaja ab sapraŭnaści paśviedčańnia, a nie ab "niepazbaŭleńni".