«Dajcie choć što-niebudź». Pucin zahadaŭ terminova stvaryć dla jaho leki ad stareńnia
Ab hetym vydańniu «Mieduza» i prajektu «Sistema» paviedamili adrazu niekalki krynic z navukova-daśledčych instytutaŭ Rasii, jakija atrymali adpaviednuju dyrektyvu ad Minzdaroŭja. Pa słovach inšych surazmoŭcaŭ, blizkich da Kramla, usim pracesam pošuku vakcyny ad stareńnia kiruje «lubimy fizik Pucina», jaki ŭznačalvaje Kurčataŭski instytut i viadomy svaimi antynavukovymi vykazvańniami.
U sumiesnym rasśledavańni «Mieduzy» i «Sistemy» (žurnaliscki prajekt «Nastojaŝieho vriemieni» i rasijskaj słužby Radyjo Svaboda) vyśvietliłasia, što bližejšaje atačeńnie Uładzimira Pucina skamandavała Ministerstvu achovy zdaroŭja Rasii terminova znajści leki ad stareńnia. Viedamstva jašče ŭ pačatku červienia razasłała adpaviednuju dyrektyvu ŭ mnohija rasijskija navukova-daśledčyja instytuty (NDI), raspaviadajuć krynicy, jakija bačyli tekst dyrektyvy.
Pavodle zahadu Minzdaroŭja, rasijskija NDI pavinny chutka pakazać usie ekśpierymientalnyja napracoŭki, jakija zdolnyja:
- Źnižać ciažar ci kupiravać uskładnieńni ad stareńnia kletak (paśpiachova zmahacca z takimi zachvorvańniami, jak sarkapienija, starečaja astenija, asteaparoz i inšyja).
- Papiaredžvać kahnityŭnyja i sensarnyja parušeńni.
- Karektavać imunnuju sistemu «na asnovie vyjaŭlenych u joj krytyčnych pakazčykaŭ stareńnia».
- Ažyćciaŭlać «bijadrukavańnie novych orhanaŭ».
Toje, što dyrektyva sapraŭdnaja, paćvierdzili niekalki miedycynskich śpiecyjalistaŭ, jakija pracujuć u navukova-daśledčych miedycynskich centraŭ, a taksama supracoŭnik adnaho z akademičnych instytutaŭ. Chutkaść i nastojlivaść, ź jakoj Minzdaroŭja zapatrabavała ad navukoŭcaŭ pradastavić napracoŭki, uraziła śpiecyjalistaŭ, pišuć «Mieduza» i «Sistema».
«Nas prasili terminova dasłać usie našy raspracoŭki, pryčym list pryjšoŭ, skažam tak, siońnia, a adpravić usio treba było jašče ŭčora. Upieršyniu ŭ žyćci ja z takim sutykajusia, bo zvyčajna padobnamu papiaredničaje šerah narad z udziełam roznych śpiecyjalistaŭ, niejkaje publičnaje abmierkavańnie», — dzielicca supracoŭnik adnaho z rasijskich NDI, kudy pryjšła dyrektyva ad Minzdaroŭja.
Inšy navukoviec ź jašče adnaho NDI taksama vyraziŭ ździŭleńnie «cyničnaści takoha zahadu, jaki patrabuje kinuć usie astatnija zadačy pa miedycynskim adnaŭleńni zvyčajnych ludziej padčas vajny na karyść vyratavańnia ad staraści hetych starych pnioŭ (majucca na ŭvazie pažyłyja rasijskija palityki)».
Prakamientavaŭ zahad i doktar adnoj z maskoŭskich NDI, nazvaŭšy dyrektyvu Minzdaroŭja «dzivactvami pažyłoha palitbiuro».
«Tekst dakumienta składzieny pa pryncypie «dajcie choć što-niebudź». Samy vialiki načalnik pastaviŭ zadaču, i čynoŭniki kinulisia jaje ažyćciaŭlać usimi mahčymymi sposabami», — miarkuje daśledčyk.
Pavodle inšych apytanych navukoŭcaŭ, zapatrabavanyja napracoŭki jany dahetul nikudy nie adpraŭlali, bo adpraŭlać niama čaho z pryčyny vielizarnaj daražyni daśledavańniaŭ, asabliva padčas vajny.
Chto asnoŭny aŭtar dyrektyvy i ci jość šaniec u Pucina?
Jak pišuć «Mieduza» i «Sistema», pošuki vakcyny ad śmierci prykryvajucca novym nacyjanalnym prajektam urada Rasii pa stvareńni ajčynnych pieradavych lekaŭ, aficyjnaj metaj jakoha zajaŭlena «źbieražeńnie zdaroŭja sotniaŭ tysiač rasijskich hramadzian». Ab prajekcie ŭ pačatku hoda publična zahavaryŭ sam Uładzimir Pucin, paabiacaŭšy pieršyja paśpiachovyja vyniki ŭžo da 2030 hoda.
Pa infarmacyi troch krynic, blizkich da Kramla, sapraŭdnaja pryčyna źjaŭleńnia nacprajekta — «nazojlivaja apantanaść, pamnožanaja na łabizm». I asnoŭnym łabistam idei źjaŭlajecca kiraŭnik Instytuta Kurčatava Michaił Kavalčuk, jakoha nazyvajuć «lubimym fizikam Pucina» i prychilnikam antynavukovych teoryj.
«Heta Miša Kavalčuk, blizki siabar Pucina, jaki apantany idejaj viečnaha žyćcia i «hienomam ruskaha čałavieka», dabieh da prezidenta z prapanovaj spynić stareńnie. Kavalčuk taksama kiruje fiederalnaj prahramaj pa ajčynnych raspracoŭkach u halinie hienietyki — u joj udzielničaje i starejšaja dačka Pucina, endakrynołah Maryja Varancova», — dzielacca krynicy.
Niahledziačy na vysokija navukovyja pasady, Kavalčuk viadomy svaimi vykazvańniami nakont paradaksalnych teoryj, jakija iduć nasupierak ćviarozamu rozumu, adznačajuć «Mieduza» i «Sistema». Naprykład, toj vieryć u stvareńnie bijałahičnaj zbroi, nakiravanaj vyklučna na rasijan.
Akramia hetaha, Kavalčuk pałochaŭ rasijskich sienataraŭ «słužbovymi ludźmi» — madyfikavanymi bijałahičnymi rabami, štučna stvoranymi ŭ ZŠA. Pradstaŭniki hetaha padvida, tłumačyŭ Kavalčuk u Saviecie Fiederacyi Rasii jašče ŭ 2015 hodzie, vałodajuć «abmiežavanaj śviadomaściu», siłkujucca «tannym hienna-madyfikavanym kormam», razmnažajucca «pad kantrolem Rakfieleraŭ» i «razam z ŁHBT i čajłdfry źjaŭlajucca častkaj zadumki elit ZŠA pa ścirańni nacyjanalnych dziaržaŭ i źmianšeńni kolkaści nasielnictva płaniety».
U kanśpirałahičnyja teoryi Kavalčuka achvotna vieryć i sam Pucin, adznačajuć «Mieduza» i «Sistema».
Navat kali nie źviartać uvahi na Kavalčuka, šancaŭ na stvareńnie ajčynnych lekaŭ ad stareńnia ŭ Rasii vielmi mała, upeŭnienyja krynicy ź liku ekśpiertaŭ rasijskich arhanizacyj i kampanij pa baraćbie sa stareńniem.
«Da pačatku vajny ŭ Rasii byli ŭsie šancy atrymać značnyja vyniki ŭ baraćbie sa stareńniem, a siarod samych cytujemych daśledčykaŭ u hetaj halinie było šmat navukoŭcaŭ, jakija pracavali ŭ Rasii. Ciapier z-za vajny i masavaj emihracyi śpiecyjalistaŭ situacyja dla stvareńnia revalucyjnych bijatechnałahičnych mietodyk drennaja», — adznačaje krynica, blizkaja da kiraŭnictva paśpiachovaha rasijska-sinhapurskaha startapa Gero, staršynioj praŭleńnia jakoha źjaŭlajecca biełaruski IT-miljanier Juryj Mielničak, jaki vystupiŭ suprać režymu Łukašenki ŭ 2020-m.
Inšyja ekśpierty-amatary «zvyšdoŭhaha žyćcia» taksama akcentuć uvahu na katastrafičnych nastupstvach vajny i palityki elit dla rasijskaj navuki.
«Pieraadoleć ułasnuju biurakratyčnuju mašynu niemahčyma, a ŭ Pucina harać terminy, kab paśpieć stvaryć leki ad stareńnia. Asvoić biudžety možna, ale kamu stvarać technałohii? Nichto ŭ Rasii nie moža pachvalicca publikacyjami ŭ navukovym časopisie Nature pa temie stareńnia, bo vielmi nizki ŭzrovień navuki», — zajaviŭ były prezident rasijskaha fondu «Navuka za padaŭžeńnie žyćcia» Michaił Bacin.
U mahiloŭskaj kałonii pamior 22-hadovy palitźniavoleny Dźmitryj Šlethaŭer9
Kamientary