Litva rychtuje Nacyjanalny płan masavaj evakuacyi

Ułady Litvy na fonie vajny RF va Ukrainie rychtujuć Nacyjanalny płan masavaj evakuacyi. Jak zajaviła ŭ paniadziełak ministr unutranych spraŭ krainy Ahnie Biłatajcie, adpaviedny prajekt budzie pradstaŭleny ŭžo ŭ kastryčniku, piša Deutsche Welle.

«U kožnaha samakiravańnia jość svoj płan evakuacyi, ale vidavočna, što my pavinny mieć płan nacyjanalnaha maštabu i być hatovymi da jaho realizacyi», — skazała jana.

«Vajna suprać Ukrainy praciahvajecca, krainy našaha rehijonu padviarhajucca hibrydnym i dezinfarmacyjnym napadam, a dyviersii — heta naša novaja realnaść», — dadała kiraŭnik litoŭskaha MUS.

Vilnia zapytaje finansavańnie ES

Sa słoŭ Ahnie Biłatajcie, Vilnia vyrašyła ŭzajemadziejničać u hetym pytańni ź inšymi krainami Bałtyi i padać zajaŭku na finansavańnie ad ES. «Zaklikajem pravieści acenku ryzyk na ŭzroŭni Jeŭrapiejskaha Sajuza, kab lepš zrazumieć pahrozy i zabiaśpiečyć miery hramadzianskaj abarony», — adznačyła ministr.

U MUS Litvy 6 vieraśnia skazali, što prapanujuć krainam rehijonu adaptavać hramadzianskuju biaśpieku da hibrydnych i vajskovych pahroz.

U viedamstvie ličać, što pry nieabchodnaści evakuacyja moža być praviedziena ŭ susiednija dziaržavy i inšyja krainy rehijonu.

Paśla raspracoŭki płanaŭ u Vilni prapanujuć «aprabavać ich padčas supolnych vučeńniaŭ». Da pracesu chočuć pryciahnuć hramadskija, niaŭradavyja arhanizacyi, biznes, mižnarodnyja struktury i instytuty ES.

«My bolš nie možam spadziavacca na miery hramadzianskaj abarony mirnaha času», — ličyć Biłatajcie.

U Litvie zaviaršajuć płan padrychtoŭki da mahčymaj avaryi na biełaruskaj AES

U krainie stvorana novaja madel kiravańnia nadzvyčajnymi i kryzisnymi situacyjami, aktyŭna pašyrajecca sietka schoviščaŭ, madernizujecca sistema apaviaščeńnia nasielnictva.

U municypalitetach i ministerstvach užo pracujuć 65 profilnych słužačych, adkaznych za hramadzianskuju biaśpieku, zaviaršajecca piacihadovy kompleksny płan mierapryjemstvaŭ pa padrychtoŭcy da mahčymaj avaryi na BiełAES.

Siejm Litvy zaćvierdziŭ Prahramu raźvićcia hramadzianskaj abarony da 2030 hoda, na jakuju vydzielena 285 młn jeŭra.

U Łatvii rychtujuć padziemnyja schoviščy

Miž tym ministr unutranych spraŭ Łatvii Rychards Kazłoŭskis zajaviŭ, što ŭłady buduć imknucca da taho, kab kala 5000 padziemnych zbudavańniaŭ da listapada byli hatovyja da vykarystańnia ŭ jakaści schoviščaŭ.

U svaju čarhu ŭ MUS Estonii nahadali, što ŭ pačatku hoda ŭłady zaćvierdzili čatyrochhadovy i dziesiacihadovy płany dziejańniaŭ u halinie hramadzianskaj abarony i hatovyja pry nieabchodnaści infarmavać nasielnictva z dapamohaj SMS-paviedamleńniaŭ i pa inšych kanałach.

U kancy žniŭnia stała viadoma, što Polšča ŭ 2025 hodzie na fonie vajny va Ukrainie pavialičyć vydatki na abaronu da rekordnaha ŭzroŭniu ŭ 186 młrd złotych (48,5 młrd jeŭra). Varšava — na pieršym miescy pa hetym pakazčyku ŭ NATA i ES.

• 12
• 0
• 2
• 2
• 1
• 1
• 0
• 0