Jano nie kamientuje abvinavačańniaŭ u płahijacie, pradjaŭlenych u ZŠA ŭ dačynieńni da stvaralnikaŭ sieryjała «Tearetyki».
Staličnaje telebačańnie (STV) nie kamientuje abvinavačańni ŭ płahijacie, pradjaŭlenyja ŭ ZŠA ŭ dačynieńni da stvaralnikaŭ sieryjała «Tearetyki». Pra heta paviedamili ŭ pres‑słužbie telekanała.
Kamiedyju «Tearetyki» kanał STV pačaŭ zdymać u kancy minułaha hoda. Pavodle infarmacyi aficyjnaha sajta telekanała, scenaryj napisany stvaralnikami papularnaha telesieryjała «Sałdaty». U hałoŭnych rolach zaniatyja ŭdzielniki kamandy KVZ «ČP» Dźmitryj Tankovič i Jaŭhien Smaryhin, a taksama akciory teatra i kino Evielina Sakura, Taćciana Kalich, Hienadź Famin, Aleh Koc, Maksim Panimatčanka. Dziejańnie razhortvajecca ŭ internacie zakrytaha haradka atamščykaŭ, kudy pryjazdžajuć maładyja vučonyja zapuskać čarhovy enierhabłok AES.
9 lutaha hazieta The New York Times paviedamiła, što Čak Łare, pradziusier amierykanskaha sieryjała «Teoryja vialikaha vybuchu», u svaim błohu napisaŭ pra biełaruski sieryjał «Tearetyki».
Jon źviarnuŭ uvahu, što sieryjał całkam skapiravany z «Teoryi vialikaha vybuchu».
«Kali my paviedamili pra heta jurydyčnamu adździełu Warner Brothers, nam adkazali, što padać u sud za parušeńnie aŭtarskich pravoŭ u Biełarusi praktyčna niemahčyma, bo televizijnaja kampanija, jakaja vypuskaje hetu kopiju, naležyć i kirujecca ŭradam Biełarusi», — napisaŭ Čak Łare.
Jak zaznačyŭ ź ironijaj Łare, pakolki inšaha vychadu niama, biełarusy, jakija zdymajuć «Tearetykaŭ», moža być, pračytajuć jaho słovy, «adčujuć vinu» i dašluć jamu «paru fietravych kapielušoŭ».
Kamientary